Jeremia 25:11 - Uwumbɔr aagbaŋ

¹¹ Kitiŋ kee mɔmɔk ga kpaln tilangbenn le ki li kpa ijawaan, le kaanib ni ŋitimbol ŋi bi gbɔk na ga li tun tii Babiloŋ aabɔr ki ti saa ŋibin imonko itaa ni kipiik.

Jeremia 25:11 ပူးပေါင်းရင်းမြစ်များ

2 Bibɔrb Aabɔr 36:20

U nan di binib bi mɔmɔk aa kpoi na buen Babiloŋ ni, le bi ti bi nima ki tun linaagbiituln tii u ni uyaabitiib ki ti saa n‑yoonn mu Pesia Aanaan nyan paacham na.

Aisaya 5:6

Maan ki kuur ki ponn ni aan timoor muun ki ponn ni. Maan ki per isui ngbaan aan i ki kpenn, kaan ki toor i taab; m ga cha ukokongɔkr ni ikokon gaa ki ni. M ga jenn utaal u taa ki nu ki ponn ni.”

Jeremia 25:12

Nee aapuwɔb le m ga daa Babiloŋ aatiŋ ni kaabɔr aatafal baatunwanbir pu. M ga kuln kitiŋ ngbaan ki cha ki kpaln tilangbenn ki ti saa n‑yoonn mu kaa kpa ndoon na.

Jeremia 25:38

Uwumbɔr siir cha waanib ke uchinn aah siir cha waatakpaluŋ pu na la. Butɔb aajawaan, ni Uwumbɔr aaŋuusakpeln cha kitiŋ ngbaan kpaln nteersakpiin a.

Jeremia 27:22

Bi ga yoor li buen Babiloŋ aatiŋ ni ki ti saa n‑yoonn mu m ga fenn maalandak toŋ li wɔb na. Le m ga giin ni li ki nan di siin libuul lee ni. Min Uwumbɔr le len kina.”

Jeremia 27:7

Ŋitimbol mɔmɔk ga tun tii u, ki ga tun tii ujapɔɔn, ni uyaabil ki ti saa buyoonn waatimbol ga lir na. N‑yoonn ngbaan le waatimbol ga li tun tii ŋitimbol ni bibɔrkpaam bi kpa ipɔɔn na.

Jeremia 28:14

Uwumbɔr Mpɔɔnsakpiindaan, u ye Israel yaab Aawumbɔr na bui ke u ga di tikur aadɔ kina le leen ŋitimbol ŋee aasil ki cha bi li tun tii Babiloŋ Aabɔr Nebukadnesar. Uwumbɔr ki len ke u ga cha ipeel mu tun tii Nebukadnesar.”

Jeremia 29:10

“Uwumbɔr ki len ke, ‘Babiloŋ aabin imonko itaa ni kipiik na yaa jer kan, m ga mɔk nimi maah neen nimi pu ki joo tipuur ti m nan puu ke m ga giin ni nimi nido na.

Jeremia 4:26

Kitiŋ ki nan nyuun ki kpa tijikaar na nan kpaln nteersakpiin la; kaatim nan ber doo, Uwumbɔr aaŋuusakpeln pu.

Jeremia 4:27

Tɔ, Uwumbɔr nan bui ke kitiŋ kee mɔmɔk ga kpaln nteersakpiin la, u mu aan tee bii ki doo.

Jeremia 43:10

ki bui bi ke min Uwumbɔr Mpɔɔnsakpiindaan, u ye Israel yaab Aawumbɔr na, ga cha maatutunn u ye Babiloŋ Aabɔr Nebukadnesar na dan do, u ga nan di waabɔrjal siin ŋitakpal ŋi aa di sub na pu, le ki taln nnaan aakekeln biin ŋi pu.

Jeremia 44:22

Din wee na, nimi aatiŋ dɔ nkuun, le ubaa aa bi ki pu. Binib gur san ki ijawaan la, le Uwumbɔr aah kaa nan ki ŋmaa gaa nimi aabiin ni titunwanbir pu na, le binib gur joo kaayimbil puuni lir biken pu.

Esekiel 12:19

Tuk ŋitimbol ngbaan mɔmɔk ke Aadindaan Uwumbɔr aabɔr ti u joo tii Jerusalem aanib bi beenin koo kitiŋ ngbaan pu na sɔ: Bi yaa bi ji tijikaar kan, bi ga li jii la, ki yaa bi nyu tiwanyukaan kan, biwon ga li gbaa ijawaan pu. Binib bi mɔmɔk koo nima chee na aah kaa joo ikaal pu na, baatiŋ ga doon nkuun.

Esekiel 29:11

Unibɔn, bee kiwakork aan ki chuun nima. Nibaa aan li bi ki pu ki ti saa ŋibin imonko ilee.

Esekiel 6:14

Mbamɔn, m taln ŋŋaal le ki kuln baatiŋ. M ga cha ki kpaln nkuun, ki nya ŋŋangii wɔb nteersakpiin ni, ki ti saa Ribla aatiŋ ki bi ŋŋangan wɔb na, kaan di cha nin chee mɔk Israel yaab koo na. Le unii mɔk ga bee ke min le ye Uwumbɔr.”

Daniel 9:2

Waah nan jin nnaan ngbaan na aajan aabiln ponn ni, le m nan bi bae Uwumbɔr aagbann ponn ni, ki dakl lik ŋibin imonko itaa ni kipiik ŋi ponn ni Jerusalem ga li bi libiil ni na. Uwumbɔr nan di libiil ngbaan aabɔr kpiir tuk waabɔnabr Jeremia la.

Liifai Yaab 26:32

M ga bii nimi aatim, kina pu na, nimi aadim bi ga gaa mu na aasui ga gar maah ga ŋa mu pu na.

Maika 7:13

Tɔ, kitiŋ kee tee ga kpaln nteer ŋmeen, binib bi bi ki pu na aatunwanbir pu.

Sekaria 1:12

Le ntuun ngbaan bui ke, “Uwumbɔr Mpɔɔnsakpiindaan, saaŋuul nan fii Jerusalem ni Juda aatim pu ki ti saa ŋibin imonko itaa ni kipiik le na. Bayoonn aan aa ga san mu kinimbaak?”

Sekaria 7:5

U nan bui ke, “Bui kitiŋ ngbaan aanib ni bitotoorb ngbaan ke baah nan lulni bumɔb ki wii ikpowiil ŋmaŋmu ni ŋmalole ni ŋibin imonko itaa ni kipiik ŋi jer na, naa nan ye maanyuŋ pu le bi nan ŋani kina.