Jeremia 22:15 - Uwumbɔr aagbaŋ

¹⁵ Aa yaa di santina maa saadichal ke li li ŋan jer biken yaan kan, kina ga ŋmaa ŋa si ubɔrnyaan ki jer biken aa? Aate nan jin waamɔɔn u nan bi chob ki kpa ibamɔn, le ki nan kan tinyoor waatuln mɔmɔk ni.

Jeremia 22:15 ပူးပေါင်းရင်းမြစ်များ

2 Samuel 8:15

David nan joo Israel aanib mɔmɔk, le ki nan ŋani waanib mɔmɔk mbamɔm.

1 Bibɔrb 10:9

Li pak Aadindaan Uwumbɔr. U mɔk si waah gee si sakpen pu na le ki di si ŋa Israel yaab aabɔr. Waah gee Israel yaab n‑yoonn mɔmɔk pu na, le u di si ŋa ubɔr ke aa cha waakaal ni ibamɔn li bi.”

2 Bibɔrb 22:2

Josia nan ŋani tiwan ni piir Uwumbɔr aasui na la; u nan dii uyaaja Ubɔr David aah nan dii nsan mu na, le ki joo Uwumbɔr aakaal kin kin.

2 Bibɔrb 23:25

Ubɔr ubaa aa nan ki bi ki di usui mɔmɔk, ni waalandak mɔmɔk, ni waapɔɔn mɔmɔk tii Uwumbɔr, ki joo Moses Aakaal ke uma na; ubaa aa nan puen u ki jin nnaan ki bi ke uma na, le waah kpo na, ubaa aa ki paan u pu ki bi kina.

1 Bibɔrb Aabɔr 3:15

Josia nan ma mbijabim munaa la; Johanann, ni Jehoyakim, ni Sedekia, ni Joahas.

2 Bibɔrb Aabɔr 34:2

U nan ŋa tiwan ni piir Uwumbɔr aasui na; u nan dii uyaaja Ubɔr David aah nan dii nsan mu na, ki joo Uwumbɔr aakaal kin kin.

2 Bibɔrb Aabɔr 35:22

Tɔ, Josia nan neen kijaak sakpen. U nan yii, kaa pel Uwumbɔr aah nan cha Ubɔr Neko len pu na, le ki ŋa ubaa ke nifam ubaa na, ki buen butɔb ni, Megido aatiŋ ki bi taar na pu.

2 Bibɔrb Aabɔr 35:26

Josia aatun mɔmɔk, waah nan di ubaa tii Uwumbɔr pu na, ni waah nan joo Uwumbɔr aakaal pu na,

Ŋiyataŋak 20:28

Ubɔr yaa joo ibamɔn, ni mbimbinyaan, ki ŋani binib mɔmɔk naah tok pu na kan, u ga yunn nnaan ni.

Ŋiyataŋak 21:3

Ŋa ni ŋan ki tok na. Nima le piir Uwumbɔr aasui ki jer saah kɔr tiwakor ti ke aa toor kitork tii u na.

Ŋiyataŋak 25:5

Chuu nyan titunwanbirdam ubɔrkpaan chee aan bi li nyi waanaan bɔr ibamɔn pu.

Ŋiyataŋak 29:4

Ubɔrkpaan u aatafal bi ibamɔn ni na aatiŋ kpa mpɔɔn, le ubɔr u aatafal bi ŋimombil ni na aatiŋ ga kuln.

Ŋiyataŋak 31:9

Len tii bi, ki li ye ubɔjirbamɔnn. Li kii bigiim ni bifalaadam aabamɔn.”

Ulandaan 10:17

Tɔ, kitiŋ ki aabɔr ŋani ubaa aalandak, aan kaasalolm mu ji baajikaar tijikaar aajim aayoonn, ki joo bibaa mbamɔm kaa nyu ndaan gbii na, kpa nsisiinyaan.

Ulandaan 2:24

Tiwan ni ŋan ke unibɔn ŋa na le ye ke u ji, ki nyu, ki li mɔɔni waah tun ki kan pu na pu. Le m ki kan ke nimina mu nyan ni Uwumbɔr chee la.

Aisaya 3:10

Binib bi aabimbin bi chain na ga li kpa mpopiin, le baawan mɔmɔk ga li dii nsan. Baah tun ki kan pu na, bi ga ji ni ni mpopiin.

Aisaya 33:16

Nima kan ni ga ŋmar; ni ga fuur ke naah bi lijool li pɔɔ ki fɔk na paab le na. Ni ga li kpa tijikaar ni ji, ki kpa nnyun mu ni nyu.

Aisaya 9:7

Waanaan aapɔɔn aan li kpa ndoon. Waanaan ga li kpa nsuudoon n‑yoonn mɔmɔk. Uwumbɔr ga tii u uyaaja Ubɔr David aanaan. U ga li joo nnaan ngbaan ki cha mu li kpa mpɔɔn, ki ga tii binib baabamɔn ki cha mbimbinyaan li bi ki ti saa dulnyaa aadoon. Uwumbɔr Mpɔɔnsakpiindaan puu ke u ga ŋa kina.

Jeremia 22:18

Le Uwumbɔr nan len Josia aajapɔɔn Jehoyakim, u nan ye Juda aabɔr na aabɔr ke, “Ubaa aan wii waakpuul, kaan len ke, ‘Ni kpa mpombiin sakpen, njɔ, ni kpa mpombiin sakpen a.’ Ubaa aan wii u pu, kaan moo u pu ke, ‘Maaninkpel, maabɔr.’

Jeremia 22:3

“Min Uwumbɔr bui ke ni li ŋani tiwan ni ŋan ki ye ibamɔn na. Ni sil unii u uken bi ji u na aapuwɔb. Taa ŋa biwɔwɔm, ni nkpobim, ni bikpopiib mbiin; ki taa ku binib bi kaa tun taani ubaa na do chee na.

Jeremia 23:5

Uwumbɔr ki bui ke, “N‑yoonn choo le m ga nyan Ubɔr David aayaabitiib ponn ni ubɔr u aabimbin ŋan na. Ubɔr ngbaan ga di nlan le joo waanib ki li ŋani tiwan ni ŋan ki tok na kitiŋ ngbaan pu.

Jeremia 42:6

Ni yaa ga bii tisui, bee ni yaa ga piir tisui kan, ti ga kii Tidindaan Uwumbɔr u ti bui ke aa mee u tii timi na aamɔb. Ti yaa kii tii u kan, ni ga li ŋan tii timi.”

Jeremia 7:5

“Kpeln mbimbin mu ni bi na, ni tiwan ni ni ŋani na man. Ni li ŋani unii mɔmɔk tiŋann.

Tibɔnyaan ti Luk ŋmee ti na 11:41

Di naah kpa tiwan ni na tii bigiim, ki di nibaa mu tii bi. Ni yaa ŋa kina kan, tijɔŋ tibaa aan ki li bi ni chee.

Lituln 2:46

Idaa mɔmɔk bi nan kuuni Uwumbɔr Aadichal ni, ki kpaani bido ki ji tijikaar, ki pak Uwumbɔr, ki kpa mpopiin, ni tibulchinn. Le binib mɔmɔk pak bi. Tidindaan nan joo binib bi ŋmar na kpae waanib pu idaa mɔmɔk la.

1 Korenti 10:31

Maah len pu na le ye ke ni yaa jin kan, jim ke ni nyuŋ Uwumbɔr; ni yaa nyun kan, nyum ke ni nyuŋ Uwumbɔr; ni yaa ŋani tiwan nimɔk na kan, ni li ŋani ke ni nyuŋ Uwumbɔr.

Ikaal 4:40

Ni li joo waakaal imɔk m di tuk nimi din wee na, le tiwan mɔmɔk ga li bi mbamɔm tii nimi, ni niyaabitiib. Nima kan, ni ga li bi kitiŋ ki Nidindaan Uwumbɔr ga di tii nimi na pu, ki li ye nimi yaan ki cha n‑yoonn mu kaa kpa ndoon na.”