Jeremia 2:20 - Uwumbɔr aagbaŋ

²⁰ Tidindaan Uwumbɔr le len ke, “Israel yaab, naah yii maamɔb na, ni yunn pam; ni yii, kaa kii maamɔb, kaa dooni mi. Ni dooni ŋiwaa ŋi ni bui ke ŋi kpa timar na ŋigongon ŋi paa na pu, ni bususoom mɔmɔk taab.

Jeremia 2:20 ပူးပေါင်းရင်းမြစ်များ

1 Bibɔrb 12:32

Jeroboam nan ki siin ŋiwaa aajim mubaa ŋmaniin aawiin kipiik ni iŋmu daal, ke baah ŋani Uwumbɔr aajim Juda aapepel ni pu na. Betel aatiŋ ngbaan aatork aabimbiln pu, le u nan toor kitork tii waah di salmaa naan inaajabi i na, le ki ban bitotoorb bi tun waah maa tiwaadir ti na ponn ni lituln nan kaan Betel ni, nima.

1 Bibɔrb 14:23

Bi nan maa maa nin chee bi dooni ŋiwaa ŋi ye fam na, le ki maa ŋibimbifɔfɔŋ, ni liwaapii Asera aanaŋ ŋigongon paab, ni isui i kpa mboon na taab.

Ilahn 107:14

U nan nyan bi baapombiin ni mbɔmbɔɔn ni, ki geei baakululn na yuk yuk.

Ilahn 2:3

Bi len ke, “Cha ti gaa tibaa bi chee man, cha ti di baasan mee man.”

Ilahn 78:58

Bi nan cha waaŋuul fii baah dooni ŋiwaa nin chee na pu, ki cha usui fii baawaa ngbaan pu.

Nnyam 19:8

Le binib ngbaan mɔmɔk kpaan kii ke, “Ti ga ŋa tiwan nimɔk Uwumbɔr bui ke ti ŋa na.” Le Moses gir ki ti tuk Uwumbɔr kina.

Nnyam 24:3

Moses nan buen ti tuk binib ngbaan Uwumbɔr aah bui u pu ki siin waakaal pu na mɔmɔk, le binib ngbaan mɔmɔk kpaan ki kii, ki bui ke, “Ti ga ŋa Uwumbɔr aah len pu na mɔmɔk.”

Nnyam 3:8

Nima pu le m sunn ni ki dan ke m nan gaa bi lii, ki nyan bi Ijipt yaab aatiŋ ni, ki tii bi kitiŋ ki ŋan, ki wiir, ki kpa tiwakor aamoŋmɔpaan ni ŋisubil sakpen na; kitiŋ ngbaan le Kanaann yaab, ni Hef yaab, ni Amor yaab, ni Peris yaab, ni Hif yaab, ni Jebus yaab laa bi ki ponn ni na.

Aisaya 1:21

Kitiŋ ki nan bi chain kaa kpa tijɔŋ tibaa na le gur tun ke upiidagoor na. N‑yoonn mubaa bininyaam ŋmeen le nan gbii ki ni, le dandana ma binikurb le gur bi ki ni.

Aisaya 10:27

N‑yoonn ngbaan yaa fuu ni kan, m ga gaa nimi lii, ki nyan nimi Asiria yaab aapɔɔn ni. Baamukl aan ki li bi ni pu.”

Aisaya 14:25

M ga kuln Asiria yaab bi bi maatiŋ Israel ni na, ki taa taa bi pu maajoo pu, ki nyan maanib falaa u Asiria yaab ŋani bi na ni, ki gaa bi lii.

Aisaya 9:4

ba pu? aa gaa bi baatun ŋi nyuun ki nyaŋ bi na, ni likugeln li nyiibaa bibɔgbin pu na. Aa nyaŋ linibol li muk bi ki ŋa bi bijakaab na, ke saah nan nyaŋ Midiann aajab n‑yoonn mu jer na pu na.

Jeremia 13:27

U kan nimi, ni tun tijɔŋ aatuln. U kan naah chuun ban ŋiwaa ŋigongon paab, ni ikpaakon ni, ke uja aah neen uŋeen aatɔ aapuu pu, bee utanja aah neen utaninkpel pu na. Jerusalem aanib, nimi aamɔfal junn a. Bayoonn aan ni mu ga ŋaŋ?

Jeremia 17:2

Nimi aanib dooni ŋiwaa kitork aabimbin chee, naah naan liwaapii Asera u na aanaŋ bususoom mɔmɔk taab, ni ŋigongon paab,

Jeremia 2:31

Israel aanib, li pel maah len pu na man. M bi ke nteersakpiin mu bɔɔn ki kpa tiwanbir na le ni chee ee? Tɔ, ni ŋa kinye aan ni bui ke ni ga ŋa naah gee pu na, ke naan ki gir ni m chee kpala?

Jeremia 3:13

Kii ke ni tun taani, ke ni nyan Nidindaan Uwumbɔr aapuwɔb. Kpiir ke ni di nimi aageehn tii ŋiwaa, bususoom mɔmɔk taab, kaa kii maamɔb. Min Uwumbɔr le len kina.

Jeremia 30:8

Uwumbɔr Mpɔɔnsakpiindaan ki bui ke: “Liyaadaal ngbaan yaa nan fuu ni kan, m ga kool inaaja i ko na aadɔ i bi di leen bisil na ki chuu nyan baakululn na mu, le baan ki li ye biwɔwɔm aanaagbiib.

Jeremia 5:5

M ga buen binib bi bi mpɔɔn ni na chee le ti ti gbaa tibɔr. Nibaakan, bima ga li nyi Baawumbɔr aah gee pu na, bima ga li nyi Uwumbɔr aah ban ke bi ŋa pu na.” Le bi mu mɔmɔk yii Uwumbɔr aamɔb ki nyan upuwɔb.

Esekiel 16:28

“Biken aah kaa lee saakpeek na, le aa san dii Asiria yaab. Sin le nan ye baapiidagoor, le bi mu aa nan lee si kikpeek.

Esekiel 16:31

Aa maa baah dooni ŋiwaa nin chee, ki tun kidagook aatuln na kitiŋ ponn ni aasan mɔmɔk ni. Aa mu aa tee ban ŋimombil ke upiidagoor aah ban pu na.

Esekiel 16:41

Bi ga see saadichal lii, ki cha kipiipaak kan saatafadaan. M ga cha aa di cha kidagook aatuln, ki cha aa taa ki tii aabɔtiib ipiin.

Esekiel 20:28

M nan di bi fuu ni kitiŋ ki m nan puu ke m ga di tii bi na pu. Baah kan ŋigongon ŋi paa na, ni isusoon na, le bi toor kitork ni mɔmɔk chee tii ŋiwaa. Bi nan cha maaŋuul fii kitork ki bi di see mmii ni na, ni ndaan mu bi nan joo nan tii ŋiwaa ipiin na pu.

Esekiel 23:5

Ohola nan ye mpuu, le ki mu beenin ye udagoor, ki neen ubɔtiib bi nyan ni Asiria aatiŋ ni na.

Hosea 1:2

Uwumbɔr aah nan puen di Israel yaab aabɔr ti tuk Hosea na, u nan bui Hosea ke, “Ti ban upii ki yoor, aapuu ngbaan aan li ye upii kpala, le waabim mu ga li bi ke uma na la. Kina le maanib mu yii mi, kaa ye binib bi dii mi na.”

Hosea 3:3

M nan bui u ke u ga kal ni yunn pam, ki taa tun kidagook aatuln, ki kiir mi, le n‑yoonn ngbaan na m ga li ka kii u.

Hosea 4:13

Ŋijoo paab le bi toor ŋiwaa, le ki seer nnyɔknii isui sakpiin i aabon taln buen dandar na taab, ŋigongon pu, isui aaboon aah mɔ ni chee na, kina pu le nibisatiib joo bibaa kooh, le nibipuutiib mu kpaln bidagoob.

Hosea 9:1

Israel aanib, taa ki ji nimi aajim ke binib bi kaa nyi Uwumbɔr na aah ŋani pu na. Ni fenn nipuwɔb tii nimi Aawumbɔr le kaa keei waamɔb. Kitiŋ kee mɔmɔk pu, ni di nibaa kooh ke upiidagoor na le ki di tii liwaal Baal, le ki gee tijikaar ti ni dak ke u joo pa nimi na.

Liifai Yaab 26:13

Min, Nidindaan Uwumbɔr le nyan ni nimi Ijipt aatiŋ ni, ke ni taa ki li ye binaagbiib. Min le nyan nimi mpɔɔn mu nan joo nimi na ni, le ki cha ni chuun aan niyil yaa paacham.”

Nahum 1:13

Dandana wee ma m ga kuln Asiria yaab aapɔɔn mu bi nan kpa ni pu na, ki kii tikululn ti nan buu nimi na.”

Ikaal 12:2

Ni kuln naah ban ni gaa kitiŋ ki na aanib ngbaan aah dooni baawaa nin chee na, nima le ye ŋijoofɔfɔk pu, ni ŋigongon pu, ni tiwaachur aasui taab.

Ikaal 15:15

Teer ke ni mu nan ye binaagbiib le Ijipt aatiŋ ni, le Nidindaan Uwumbɔr gaa nimi lii, nima pu le m joo nkaal ngbaan tuk ni mu.

Ikaal 26:17

Ni len din aataak kee, ke Nidindaan le ye nimi Aawumbɔr, ki puu tipuur ke ni ga kii tii u, ki ŋa waah len pu na, ki joo waakaal mɔmɔk mbamɔm.

Ikaal 4:20

Nimi ma kan, uma le nyan nimi Ijipt yaab aamuk ni. U nyan ni nimi ke u di nimi ŋa waanib, ke naah ye waanib din wee pu na.

Ikaal 4:34

Liwaal libaa kee buen litimbol yayan ni, ki ti nyan ni binib, ki di bi ŋa laanib, ke Nidindaan Uwumbɔr aah ŋa nimi pu Ijipt aatiŋ ni pu na aa? Ninimbil ni, le u nan di waapɔɔn sakpiin tun, ki joo ni iween, ni butɔb, ki ŋa iwaan, ni lijinjiir aatun, ki cha ijawaan aawan ŋa.

Ikaal 5:27

Moses, gir buen aan ki ti pel Tidindaan Uwumbɔr aah ga len tibɔr timɔk na, ki ki gir ni ki nan tuk timi waah len pu na. Ti ga pel ti, ki gaa ti mɔmɔk.’

Josua 1:16

Le bi kii tii Josua ki gar u ke, “Ti ga ŋa saah tuk timi pu na, ki buen saah ga tun timi nin chee na mɔmɔk.

Josua 24:24

Le binib ngbaan bui Josua ke, “Ti ga li dii Tidindaan Uwumbɔr la, ki ga kii waah len pu na.”

Josua 24:26

Josua nan ŋmee ikaal ngbaan Uwumbɔr aakaal aagbaŋ ponn ni. U nan yoor litakpasakpeln libaa, le ki di ŋum likpaln aasub taab, Uwumbɔr Aabool chee,

Tibɔkpiirkaan 17:1

Le Uwumbɔr aatuuntiib bilole bi joo ŋisambil ŋilole ngbaan na ubaa dan ki nan len m chee ki bui mi ke, “Dan do, aan m nan mɔk si Uwumbɔr aah ga daa upiidagookpaan u bi nnyunkpaan chee na aatafal pu na.

Bibɔjirb 10:6

Israel aanib nan ki piin ki dooni ŋiwaa Baal, ni Astaate, le ki tun Uwumbɔr titunwanbir. Bi nan ki dooni Siria yaab, ni Saidonn yaab, ni Moab yaab, ni Amonn yaab, ni Filistia yaab aawaa mu. Bi nan suln Uwumbɔr bɔr, kaa ki dooni u.

Bibɔjirb 2:11

Le Israel aanib piin ki dooni ŋiwaa ŋi bi yin ŋi Baal na ki tun Uwumbɔr titunwanbir.

Bibɔjirb 2:13

Bi nan di cha Uwumbɔr aadoon, le ki dooni liwaal Baal, ni liwaal Astaate.

1 Samuel 12:10

Le bi wii ki yin Uwumbɔr ke u ter bi, ki bui ke, ‘Uwumbɔr, ti tun titunwanbir; ti fenn tipuwɔb tii si, ki dooni ŋiwaa ŋi bi yin ŋi ke Baal ni Astaate na. Gaa timi, timi aadim chee lii, aan ti li dooni si.’