Jeremia 15:9 - Uwumbɔr aagbaŋ

⁹ Upii umɔk aabim mulole kpo na nan fik, kaa ki ŋmaa fuur. Waawiihn nan kpaln mbɔmbɔɔn la; u nan jin inimɔɔn, le usui bii. M ga cha nimi aadim ku nimi bi beenin fu na. Min Uwumbɔr le len kina.”

Jeremia 15:9 ပူးပေါင်းရင်းမြစ်များ

Aisaya 47:9

Naan yunn, liwinbaal le aa ga lann tiwan nilee ngbaan mɔmɔk. Hali saah kpa inyɔk i na aan ter si, le aa ga lann chal ni mbim mɔmɔk.

Jeremia 19:7

Do le m ga bii Juda ni Jerusalem aanib aalandak mɔmɔk. M ga cha baadim nyaŋ bi, ki ku bi butɔb ni. Le m ga di ŋinikpol ngbaan tii inyoon, ni ipeel, i di ŋa tijikaar.

Jeremia 21:7

Sin ma kan, aa ni saaninkpiib, ni binib bi ŋmar butɔb, ni nkon, ni iween ngbaan ni na, m ga cha Ubɔr Nebukadnesar, ni nimi aadim bi ban bi ku nimi na chur nimi. Nebukadnesar ga ti ku nimi. Waan di cha ni ponn ni ubaa, kaan san ubaa kinimbaak. Min Uwumbɔr le len kina.”

Jeremia 44:27

Maan ki cha ni ponn ni ubaa kan nkam, le ki tee kuln nimi. Ni mɔmɔk ga kpoi, ni ga kpoi butɔb ni, ni iween ni, ki ti saa n‑yoonn mu ubaa aan gur na.

Jeremia 50:12

le saatikpaan na ga ji inimɔɔn ki kpaln tilaar aawan. Babiloŋ le ga li gur ye kitiŋ ki kaa kpa liyimbil ŋitimbol mɔmɔk ni na: ki ga kpaln nteersakpiin mu kuun kaa kpa nnyun na.

Jeremia 6:4

Bi ga bui ke, “Gor ki ti tak Jerusalem man. Gor man. Nwiin aakaasisik ni le ti ga ti tak ki;” le ki ga tee bui ke, “Ti taan sakpen a, nwiin ban mu lir la, le ijooboon moo fɔk cha.

Jeremia 7:19

Tɔ, min le bi sil tii titotonn aa? Aayii, bibaa le bi tii titotonn, ki joo ni inimɔɔn bibaa pu.

Inandalahn 1:1

Jerusalem, kitiŋ ki nan gbii binib na gur ŋmin chii la. Dulnyaa mɔmɔk aanib nan pak kima la, le ki gur naahn ukpopii; kitiŋ ki nan kpa liyimbikpaan na aanib kpaln binaagbiib.

Inandalahn 4:10

Tibɔbir nan dan maanib pu ki joo ni ijawaan; natiib bi nan gee baabim sakpen na nan di bi ŋa tijikaar ki ŋaan bi.

Esekiel 5:12

Nimi aanib ŋiker ŋitaa ponn ni aaker libaa ga kpo iween, ni nkon aakun kitiŋ ngbaan ponn ni; le liker liken ga bee kijaak aajuk aakun ni, kitiŋ ngbaan aagbaan; le m ga di litatar na yaa tii libuln, ki di maajaak aajuk paan bi pu.

Esekiel 5:13

“Nimi le ga gaa maaŋuusakpeln ki ti saa buyoonn m ga bab na. Nimina yaa nan ŋa kan, le ni ga bee ke min Uwumbɔr le di maaŋuusakpeln na len ni chee, naah yii maah mɔk nimi pu na pu.

1 Samuel 2:5

Binib bi nan kpa ki ji babr na gur joo bibaa le kooh ki kpiini bibaa; nkon aah nan joo bi na gur ji gunni la. Upii u nan ye uŋoob na gur kpa mbim mulole la, le upii u nan kpa mbim pam na aa ki kpa ubaa gur.