Jeremia 15:2 - Uwumbɔr aagbaŋ

² Bi yaa baa si ke bi ga buen la chee kan, tuk bi ke min le bui ke, Iween le ga ku bibaa, baah ga buen nin chee na le na. Bibaa mu ga kpo butɔb ni, baah ga buen nin chee na le na. Nkon le ga ku biken mu, baah ga buen nin chee na le na. Bidim ga chur biken mu buen tinaagbiir ni, baah ga buen nin chee na le na.

Jeremia 15:2 ပူးပေါင်းရင်းမြစ်များ

Aisaya 10:4

Bi ga ku nimi butɔb ponn ni la, bee bi chuu nimi ki dar buen ke binaagbiib na. Nimina mɔmɔk aapuwɔb na, Uwumbɔr aaŋuul aan sɔŋ; u ga li beenin ban ke u moo daa nitafal.

Aisaya 24:18

Unii umɔk pɔɔn ubaa ke u nya ijawaan ni na ga lir libuul ni; le umɔk pɔɔn ubaa ke u nya libuul ni na, gaawɔb ga chuu u. Ntaanyusakpem ga nya paacham ki lir ni, le ŋitinyik ga deŋ.

Jeremia 14:12

Hali bi yaa lul bumɔb kan, maan pel baaterm aawiil; le bi yaa toor kitork ki see ki mmii ni tii mi, ki tii mi njikaabim aapiin kan, nsui aan piir bi pu. Maah ga ŋa pu na le ye ke m ku bi butɔb, ni nkon, ni iween ni.”

Jeremia 14:16

Baah di tibɔr tee tuk binib bi na mu ga kpo nkun baan ngbaan la. Bi ga di baanikpol mae Jerusalem aatiŋ ponn ni, le ubaa aan li bi ki sub bi. Nimina ga ŋa bi mɔmɔk, bi ni bipuutiib, ni bijapɔtiib, ni bibisatiib. M ga cha bi pa baatunwanbir pu.”

Jeremia 16:4

Iween i bir sakpen na le ga ku bi, le ubaa aan li bi ki wii baakpuul, ubaa mu aan ki li bi ki sub bi. Ŋinikpol ngbaan ga li dɔ kitiŋ ke tinaabin na la. Butɔb ni le bibaa ga kpoi, le nkon ku biken mu, le ŋinikpol ngbaan ga li ye inyoon ni ipeel aajikaar.

Jeremia 19:7

Do le m ga bii Juda ni Jerusalem aanib aalandak mɔmɔk. M ga cha baadim nyaŋ bi, ki ku bi butɔb ni. Le m ga di ŋinikpol ngbaan tii inyoon, ni ipeel, i di ŋa tijikaar.

Jeremia 43:11

Nebukadnesar ga dan ki nan nyaŋ Ijipt aatiŋ. Maah siin ke iween ku binib bi na ga kpo iween aakun; maah siin ke bi ga di bi buen tinaagbiir ni na mu ga buen, le maah siin ke bi ga kpo butɔb ni na, ga kpo butɔb ni.

Esekiel 12:11

Bui bi ke saah ŋa tiwan ni na le ye tiwan ni ga ŋa bi na aamɔkl, ke bi ga li ye bikusam ni binaagbiib la.

Esekiel 14:21

Aadindaan Uwumbɔr aah len pu na sɔ: “M ga cha maatafadaan munaa mu bir sakpen na le dan Jerusalem aatiŋ pu. Muma le ye butɔb, ni nkon, ni ipeel i bir na, ni iween, aan ni nan kuln binib ni tiwakor mu.

Esekiel 33:27

“Tuk bi ke min Bidindaan Uwumbɔr sak bi ke maah ye Uwumbɔr u bi n‑yoonn mɔmɔk na pu, bi ga ku binib bi koo tilangbenn aatim ngbaan ni na. Ipeel le ga ŋmɔ binib bi koo itingbaan ni na. Iween mu le ga ku binib bi bɔr ŋijoo ni titakpalunn ni na.

Esekiel 5:12

Nimi aanib ŋiker ŋitaa ponn ni aaker libaa ga kpo iween, ni nkon aakun kitiŋ ngbaan ponn ni; le liker liken ga bee kijaak aajuk aakun ni, kitiŋ ngbaan aagbaan; le m ga di litatar na yaa tii libuln, ki di maajaak aajuk paan bi pu.

Esekiel 5:2

Butɔb aajab aah ŋa tiwan ni mɔmɔk ki gob Jerusalem aatiŋ na yaa nan jer kan, aa di liker libaa ŋa mmii ni, kitiŋ ngbaan ponn ni. Di saajaak aajuk chɔi chɔi liker liken buyoonn aa nyan kitiŋ ngbaan ni ki bi chuun na. Di liker li gur na yaa libuln ni, aan m di maajaak aajuk paan ti pu.

Daniel 9:12

Aa nan ŋa saah nan bui ke aa ga ŋa timi, ni binib bi joo timi na mɔmɔk pu na. Kitiŋ kibaa aa ki bi taab do ki kan ntafadaan mu aa nan di tii Jerusalem na.

Amos 5:19

Ni ga nan li naahn ke unii aah san uchinn chee ki ti tooh upeenaamuun nsan ni pu na la, ki li bi ke unii u kun ni linampal ki nan di uŋaal paan ligoln pu aan uwaa kpaan juu u pu na la.

Sekaria 11:9

Le m bui ipiih ngbaan ke, “Maan ki li ye unii u kpaa nimi na. Cha i ga kpo na kpo. Cha baah ga kuln i na, bi kuln i. I gur na le ga kuln tɔb.”

Tibɔkpiirkaan 13:10

Binib bi Uwumbɔr len ke bi ga chuu bi tinaagbiir na, bima le bi ga chuu bi tinaagbiir. Unii umɔk joo kijaak aajuk ku binib na, kijaak aajuk le ga ku u mu. Nima le cha ni ŋan ke Uwumbɔr aanib li ban limɔr ke bi dii Uwumbɔr mbamɔm.”