Bibɔjirb 7:20 - Uwumbɔr aagbaŋ

²⁰ le ŋigetek ŋilee na mu ŋa kina. Bi mɔmɔk nan joo imii biŋangan ni, le ki joo ikpiin biŋangii ni, le ki teen mpɔɔn pu ke, “Uwumbɔr ni Gideonn aajaak aajuk pu.”

Bibɔjirb 7:20 ပူးပေါင်းရင်းမြစ်များ

Aisaya 27:13

Nwiin ngbaan daal yaa nan fuu ni kan, kakaan ga wii ki yin Israel yaab bi bi Asiria ni Ijipt aatim ni tinaagbiir ni na ke bi gir ni. Bi ga dan ki nan doon Uwumbɔr, Jerusalem aatiŋ ponn ni, waajool paab.

Jeremia 47:6

Ni wii ke, ‘Uwumbɔr aajaak aajuk, saan di cha timi ii? Gir koo saajufuuk ni, ki ti li bi nima ki fuur.’

1 Korenti 15:52

Kakaan yaa wii kookoo yaan kan, libuul ngbaan ni le ti ga kpeln. Naan pii linimbil aah ga kab pu na. Kakaan ga nan wii, le binib bi kpo na ga fikr nkun ni, kaan ki bur. Le Uwumbɔr ga kpeln timi aawon.

2 Korenti 4:7

Timi bi kaa kpa mpɔɔn na, Uwumbɔr di tibɔnyaan ti kpa mpɔɔn sakpen na ŋa tiŋaal ni, aan binib bee ke tibɔnyaan ngbaan aapɔɔn nyan Uwumbɔr chee, naa ye ti chee.

1 Tesalonika 4:16

Ba pu? Tidindaan ubaa ga nyan ni paacham ki sunn ni. U yaa sunn ni kan, le ti ga ŋun nneel sakpiin, ni Uwumbɔr aatuuntiib aaninkpel aaneel, ni Uwumbɔr aakakaan aawiil.

Hiibru Yaab 11:4

Abel nan gaa Uwumbɔr ki kii, nima le cha u nan toor kitork ki ŋan ki jer ukpel Keenn aah toor pu tii Uwumbɔr na. Waah gaa Uwumbɔr ki kii pu na, le Uwumbɔr len ke waabimbin ŋan, le ki gaa waah toor kitork ki tii u na. U kpo, le waah gaa Uwumbɔr ki kii pu na pu, u beenin len.

Josua 6:16

Nfum mulole aayoonn ngbaan aah fuu na, le bitotoorb bi pii ikpiin na aah ban bi kpaan nfum mubaa pu ki pii sakpen buyoonn na, le Josua lii waanib bumɔb ke bi faa ikaa, le ki bui ke, “Uwumbɔr le di kitiŋ kee tii nimi.

Josua 6:20

Josua aah len ti doo na, le bitotoorb na pii iyiin, le bijab faa ikaa, le ligoln sakpeln ngbaan lir kitiŋ. Le bijab ngbaan san koo kitiŋ ngbaan ni, ki ton bi butɔb, le ki nyaŋ kitiŋ ngbaan aanib.

Josua 6:4

Nyan bitotoorb bilole, bi mɔmɔk ubaabaa ga li joo ikpiinja aayiin, ki loln binib bi tu Uwumbɔr Aakaal Aadakaa na pu nsan. Winlole daal kan, aa ni saajab ga chuun mann kitiŋ ngbaan nfum mulole, n‑yoonn ngbaan le bitotoorb bi joo ikpiinja aayiin na pii ikpiin.

2 Piita 1:15

Le m ga pɔɔk mbaa ki tii nimi kigbaŋ ki ga li teer nimi tibɔr tee n‑yoonn mɔmɔk, ki joo cha maakundaal aapuwɔb na.

Bibɔjirb 7:19

Joo cha ni kinyetaasiik, le Gideonn ni waajab nkub na nan fuu baadim ngbaan aakakaa aagbaan, n‑yoonn ngbaan le bikikiib nan gaa tɔb lituln. Gideonn ni waajab nan pii baakpiin, le ki gbaa wii mbubim mu bi nan joo joo na,

Bibɔjirb 7:21

Uja mɔmɔk nan nyal sil ki mann goln baadim aakakaa ngbaan, le baadim aajab mɔmɔk san ki gbaa ikuun cha.

1 Samuel 11:11

Kitaak aah ti bi wolni na, le Sɔɔl yakr waajab ŋigetek ŋitaa pu, le lichakpitaawoln bi buen baadim Amonn yaab aah kuun dɔ nin chee na, ki ti tak bi. Joo cha ni nwiin pu na, bi ku doo bi. Bijab bi ŋmar na nan san yaa tɔb chee, bimɔk san ban bibaa.