Bibɔjirb 20:26 - Uwumbɔr aagbaŋ

²⁶ Israel aanib mɔmɔk nan ki buen Betel aatiŋ ni ki ti wii ikpowiil. Bi nan ka Uwumbɔr aanimbiin ni, nima chee, kaa jin tijikaar le nwiin ti lir. Bi nan toor kimɔbaan aapiin aatork, ki di tiwakor ngbaan tibaa timɔnn see mmii ni, Uwumbɔr aanimbiin ni.

Bibɔjirb 20:26 ပူးပေါင်းရင်းမြစ်များ

Mpiin 28:19

le ki yin nima chee ke Betel. Bi nan yin kitiŋ ngbaan n‑yoonn mubaa ke Lus.

2 Samuel 3:35

Nwiin ngbaan daal, binib ngbaan nan pɔɔn bibaa ke bi cha David ji tijikaar, le u yii, ki puu tipuur ke, “M yaa ji nibaa din wee waahr aan nwiin mue nin lir kan, Uwumbɔr faa ku mi.”

2 Bibɔrb Aabɔr 20:3

Ijawaan nan chuu Jehosafat, le u mee Uwumbɔr ki ban nterm, le ki bui ke waatiŋ mɔmɔk aanib lul bumɔb.

Esra 8:21

Ahafa Aanyunsan ngbaan chee le m nan siin ke ti mɔmɔk lul bumɔb ki sunn tibaa taab, timi Aawumbɔr chee, ki mee u aan u cheen timi lisachuln ngbaan ni, ki li kii timi, ni timi aabim, ni timi aawan mɔmɔk.

Jeremia 36:9

Jehoyakim aah nan ye Juda aabɔr pu na aabiŋmuŋmur aaŋmawae ni, le binib ngbaan nan bi lulni bumɔb ke Uwumbɔr san bi kinimbaak. Binib bi mɔmɔk koo Jerusalem ni na, ni bi mɔmɔk nyan ni Juda aatim ni na, le nan lul bumɔb ngbaan.

Joel 1:14

Cha binib mɔmɔk lul bumɔb man; yin binib mɔmɔk aan bi kuun ni. Kuun binib bimɔk ye bisalolm na, ni Juda aatiŋ aanib mɔmɔk aan bi mɔmɔk dan Nidindaan Uwumbɔr Aadichal ni ki nan wii yin u.

Josua 24:1

Josua nan kuun Israel aanibol ngbaan mɔmɔk dan ubaa chee Sekem aatiŋ ni. U nan yin baaninkpiib, ni baasalolm, ni baabɔjirb, ni baayidam, le bi mɔmɔk kuun ni Uwumbɔr aanimbiin ni.

Josua 7:6

Josua ni Israel yaab aaninkpiib aasui nan bii, le bi dar kar baawanpeenkaan, le ki doon kitiŋ Uwumbɔr Aakaal Aadakaa aanimbiin ni, ki ti saa kijook wɔb, le ki faa titan puŋ biyil, ki mɔk ke bisui bii a.

Bibɔjirb 20:18

Israel yaab nan buen baah dooni Uwumbɔr nin chee na Betel aatiŋ ni. Nima chee le bi ti baa Uwumbɔr ke, “Lilanibol ga puen tak Benjaminn aanibol?” Uwumbɔr nan gar bi ke, “Juda aanibol le ga puen tak.”

Bibɔjirb 20:25

Benjaminn aatɔb aajab mu nan ki nyan ni Gibea aatiŋ ni. N‑yoonn mue ma, bi nan ku Israel yaab biken na aatɔb aajab ŋichur kipiik ni ŋiniin la.

Bibɔjirb 21:2

Tɔ, Israel yaab nan buen Betel aatiŋ ni ki ti ka Uwumbɔr aanimbiin ni nima le nwiin ti lir. Bi nan wii mpɔɔn pu, mpombiin pu ke:

Bibɔjirb 21:4

Kitaak aah woln na, kichakpinaanyeek ni, le binib ngbaan maa kitork aabimbiln nima chee, le ki toor kimɔbaan aapiin aatork, le ki di tiwakor ngbaan tibaa timɔnn see mmii ni tii Uwumbɔr.

1 Samuel 11:4

Ntuuntiib ngbaan aah nan ti fuu Gibea, nin chee Sɔɔl koo na, aan binib ngbaan ŋun tibɔr ngbaan na, le bi piin ki bi wii mpombiin pu.

1 Samuel 7:6

Kina pu le bi mɔmɔk kuun Mispa ni. Bi nan ban nnyun le ki kpir tii Uwumbɔr, le ki lul bumɔb liyaadaal, nwiin ti lir. Bi nan len ke, “Ti tun Uwumbɔr titunwanbir.” Mispa ni, nima chee, le Samuel nan toor Israel yaab bi nan kpa tɔb tibɔr na aakaasisik ni.