Ikaal 9:1 - Uwumbɔr aagbaŋ

¹ “Israel yaab, li pel man. Din wee na, ni ban ni puur Jɔɔdann Aamɔɔl aan ki gaa ŋinibol ŋi wiir ki kpa mpɔɔn jer nimi na aatiŋ la. Baatim ye mukpaan la, le bi maa ŋigon ŋi fɔk ti nyan paacham na gob mu.

Ikaal 9:1 ပူးပေါင်းရင်းမြစ်များ

Mpiin 11:4

le ki bui ke, “Cha ti maa kitiŋ aan ki maa kidifɔfɔŋ ki ponn ni, ki ti pii paacham, nima kan, ti ga li bi tɔb chee ki taa yaa, ki li kpa liyimbil dulnyaa wee ni.”

Nnyam 32:1

N‑yoonn mu binib ngbaan nan bee ke Moses yunn lijool ngbaan paab, kaa sunn ni, ki bi nima chee na, le bi kuun ni ki mann goln Aaronn, le ki bui u ke, “Taa nyi tiwan ni ŋa Moses u nan nyan ni timi Ijipt aatiŋ ni na aan waa gir ni na, nima pu na, ŋa liwaal tii timi, ti li dii li.”

Daniel 4:11

Bu nan moo filk ki filk kpae ki ti saa kitaapaak, le dulnyaa wee aanib mɔmɔk waa bu.

Amos 2:9

“Maanib, nimi pu le m nan ku doo Amonn yaab, bima le ye bijab bi nan fɔk ke santina aasui ki pɔɔ ke ŋikpan aasui na.

Nkahm 13:22

Njan bi nan pue buen Kanaann aatiŋ aaŋangii wɔb na la, le ki ti nyan Hebronn aatiŋ, nin chee Ahimann yaab, ni Sesai yaab, ni Talmai yaab aataŋaal pu aanib ka na, bi nan ye ŋiniwɔk ŋi bi yin ŋi ke Anak yaab na aayaabitiib la. Hebronn aatiŋ nan bi le ŋibin ŋilole aapuwɔb na Soann aatiŋ ki bi Ijipt ni na mu nin ŋa kitiŋ.

Nkahm 33:51

ke u bui Israel yaab tibɔr ti paa na: “N‑yoonn mu ni puur Jɔɔdann Aamɔɔl ki koo Kanaann aatiŋ ni na,

Ikaal 1:28

Ba pu aan ti ga buen nima? Ti san ijawaan la. Bijab bi ti tun bi na tuk timi ke binib bi koo nima na pɔɔ, ki fɔk jer timi, le ki mu ki bi ŋigon ŋi fɔk ti tuu kitaapaak na aatim ni la. Bi nan ki kan ŋiwɔk mu nima.’

Ikaal 11:23

Le u ga jenn nyan ŋinibol ŋimɔk ni tur koo ŋi ponn ni na, le ni ga gaa ŋinibol kpaan ŋi kpa mpɔɔn jer nimi na aatiŋ.

Ikaal 11:31

Ni ban ni puur Jɔɔdann Aamɔɔl, ki gaa kitiŋ ki Nidindaan Uwumbɔr ban u di tii nimi na la.

Ikaal 27:2

Bundaal ni puur Jɔɔdann Aamɔɔl doo, aan ki koo kitiŋ ki Nidindaan Uwumbɔr ban u di tii nimi na ni kan, ni ban ŋitakpal ŋi gbei na ŋibaa, ki di ŋi ŋum aan ki pɔ biin ŋi pu,

Ikaal 3:18

“N‑yoonn ngbaan, maah nan ki di tibɔr ti tuk bi na sɔ: ‘Tidindaan Uwumbɔr le di Jɔɔdann Aamɔɔl aawipuul aatiŋ kee tii nimi. Dandana wee, cha nimi aajab gor bibaa ki puur Jɔɔdann Aamɔɔl, ki loln Israel aanibol ŋi gur na nsan, aan ki ti ter bi mu bi gaa baatiŋ.

Ikaal 4:1

Moses nan bui Israel yaab ke, “Ni pɔɔn nibaa ki kii tii ikaal i m bi mɔk nimi na, nima le ga cha ni li bi, ki ti gaa kitiŋ ki Uwumbɔr, u ye niyaajatiib Aawumbɔr na, ban u di tii nimi na.

Ikaal 4:38

Naah tur koo binib ngbaan ponn ni na, le u nyaŋni ŋinibol ŋi kpa mpɔɔn jer nimi na, ke u di baatim tii nimi, le kitiŋ ngbaan laa beenin ye nimi yaan ki nan saa din wee.

Ikaal 6:10

“Nidindaan Uwumbɔr aah nan puu tipuur ti tii niyaajatiib Abraham, ni Aisak, ni Jakob pu na, u ga di kitiŋ ki kpa ntisakpem mu wiir, ki kpa liwangol, aan naa maa mu nibaa na, tii nimi.

Ikaal 7:1

“Nidindaan Uwumbɔr le ga di nimi koon kitiŋ ki ni cha ni ti gaa ki na ponn ni. Le ni yaa tur koo ki ponn ni kan, u ga jenn nyan ŋinibol pam. U ga jenn nyan Hef yaab, ni Girgas yaab, ni Amor yaab, ni Kanaann yaab, ni Peris yaab, ni Hif yaab, ni Jebus yaab. Ŋinibol ŋilole ngbaan wiir, ki kpa mpɔɔn jer nimi.

Josua 1:11

ke bi bɔ dii binib ngbaan ponn ni ki tuk bi ke, “Gor man ki ban tijikaar; ba pu? ni gur iwiin itaa, ti ga puur Jɔɔdann Aamɔɔl, ki koo kitiŋ ki Tidindaan Uwumbɔr ga di tii timi na ni.”

Josua 1:15

aan bi ti gaa ki koo kitiŋ ki bi Jɔɔdann aawilir wɔb aan Nidindaan Uwumbɔr di tii bi na. N‑yoonn mu u ti tii Israel aanibol mɔmɔk lifuur na kan, ni ga ŋmaa gir dan ki nan kal nibaa aatiŋ pu, Jɔɔdann aawipuul wɔb, kitiŋ ki Uwumbɔr aatutunn Moses nan di tii nimi na.”

Josua 14:12

Nima pu na, di ŋigongon pu aatiŋ tii mi, Uwumbɔr aah nan puu tipuur tii mi n‑yoonn ngbaan pu na. Ti nan tuk si liyaadaal ngbaan ke ŋiwɔk aanib, bi bi nan yin bi ke Anak yaab na, nan bi ntisakpem mu aagon fɔk na ni. Uwumbɔr yaa bi m chee ki ter mi kan, m ga jenn nyan bi ke waah nan len pu na.”

Josua 3:14

Ni nan ye tijikaar aacheen yoonn la, le limɔɔl ngbaan nan gbii nnyun, nwam mu nyan. N‑yoonn mu binib ngbaan nan fii ki ban bi puur Jɔɔdann Aamɔɔl na, le bitotoorb loln bi pu nsan, ki tu Uwumbɔr Aakaal Aadakaa ngbaan. Bitotoorb ngbaan aataa aah ti koo limɔɔl ngbaan aanyun ni buyoonn na,

Josua 3:16

le nnyun ngbaan sil, kaa ki puu, le ki ŋa ligoln kitiŋ ki bi yin ki ke Adam na chee; kitiŋ ngbaan nan bi dandar ki bi gbɔk Saretann aatiŋ la. Limɔɔl ngbaan aah puu ki ti lir N‑yaan Aanyusakpem ponn ni nin chee na mɔmɔk kpaln kitikuun la, le binib ngbaan puur Jeriko chee.

Josua 3:6

Josua nan bui bitotoorb ke bi yoor Uwumbɔr Aakaal Aadakaa aan ki loln binib ngbaan pu nsan, le bi ŋa waah len pu na.

Josua 4:19

Binib ngbaan nan puur Jɔɔdann Aamɔɔl njan aaŋmal aawiin kipiik daal la, le ki kal Gilgal aatiŋ ni, Jeriko aawipuul wɔb.

Josua 4:5

le ki bui bi ke, “Ni li cha Jɔɔdann Aamɔɔl ni, nin chee bi si tu Nidindaan Uwumbɔr Aakaal Aadakaa na. Ni mɔmɔk yoor litakpal libaabaa nibɔgbin pu, ŋi li si Israel yaab aanibol kipiik ni ŋilee na aasisii.