Ikaal 6:11 - Uwumbɔr aagbaŋ

¹¹ Ŋidichal ga li gbii tiwanyaan ni nimi nibaa aa di ŋa ŋi ponn ni na, inyunbun mu bi nima, ni mu aa ye nimi le gbii i, le ŋisubil aasui, ni olif aakpan aasui aasar ti nimi nibaa aa kon, kaa bun ti na, mu ga li bi nima. N‑yoonn mu Uwumbɔr ti di kitiŋ ngbaan tii nimi, aan ni kpa tijikaar ki ji babr na kan,

Ikaal 6:11 ပူးပေါင်းရင်းမြစ်များ

Nehemia 9:25

Saanib nan nyaŋ ntim mu bi maa ŋigon gob mu, ki kii mu na, ni ikpaakon i nyuun na, ni ŋidichal ŋi kpa liwangol na, ni inyunbun i binib puen gbii i na, ni nkpan aasui, ni ŋisubil aasui, ni ndaan aasubil aakpaakon. Bi nan jin baah gee pu na ki filk; bi nan jin mmɔɔn mumɔk aa nan di tii bi na.

Ilahn 105:44

U nan di binib biken aatim tii bi, ki cha bi gaa baakpaakon,

Ikaal 11:15

Timoor ga li bi, nimi aawakor ŋmɔ. Ni ga kan naah ban tijikaar ti na mɔmɔk.

Ikaal 14:29

Tijikaar ngbaan le Liifai yaab, ni biwɔwɔm, ni nkpobim, ni bikpopiib bi bi nimi aatim ni na mu ga li ji. (Liifai yaab aa kpa bibaa aakpaakon.) Nima chee le bi ga dan ki nan kan baah ban tijikaar ti na. Ni li ŋani kina, nima kan, Nidindaan Uwumbɔr ga ŋa tinyoor ŋa nimi aatuln mɔmɔk pu.

Ikaal 19:1

“Nidindaan Uwumbɔr yaa kuln binib bi u ban u di baatiŋ tii nimi na, aan ni gaa baatim, ni baadichal doo, ki kal nima na kan,

Ikaal 32:15

Uwumbɔr aanib ngbaan nan kan liwangol, le ki tee kpa tafalaaŋun. Bi nan ji ti babr, le ki filk. Bi nan yii Uwumbɔr u naan bi, ki ye Mpɔɔnsakpiindaan u gaa bi lii na.

Josua 24:13

Min le di ikpaakon i naa nan kon i ponn ni kpala na tii nimi, le ki di ntim mu naa nan maa mu na tii nimi. Le dandana wee, ni bi ntim ngbaan ni, ki ji ndaan aasubil, ni olif aakpan aasubil aasui i mu naa nan bun i na.’”

Bibɔjirb 3:7

Israel aanib suln Bidindaan Uwumbɔr bɔr; bi nan tun u titunwanbir le ki dooni liwaal Baal, ni liwaal Asera.