Ikaal 1:17 - Uwumbɔr aagbaŋ

¹⁷ Ni taa li kpa imaagann nimi aabɔjil ni, ni li dii nsanbaan ki toor ugiin ni uwankpadaan mɔmɔk aabɔr. Taa san ubaa ijawaan, Uwumbɔr le ga tii nimi nlan le ni len ibamɔn. Tibɔr ti jer nimi aapɔɔn na kan, ni li joo ni ti m chee, aan m nan toor ti.’

Ikaal 1:17 ပူးပေါင်းရင်းမြစ်များ

Mpiin 18:25

Mbamɔn, saan kpaan ki ku bininyaam ni titunwanbirdam kina. Sin Uwumbɔr aa kee ŋa kina, kaan kii ŋa kina mu. Aa yaa ŋa kina kan, bininyaam mu ga ji falaa titunwanbirdam chee. Saan kii ki ŋa kina. Sin Uwumbɔr u ye dulnyaa wee mɔmɔk aabɔjir na ga sil ŋa tiwan mɔmɔk ibamɔn ponn ni.”

2 Samuel 14:14

Ti mɔmɔk ga kpo, ti naahn nnyun mu kpir kitiŋ, aan baan ki ŋmaa faa mu na la. Hali Uwumbɔr ubaa aa cha binib bi kpo na ki gir ni limɔfal ni, le ubɔr ma tee ga ŋmaa kan nsan ki cha unii u san kikusɔŋ na gir ni.

2 Bibɔrb Aabɔr 19:5

U nan kaan bibɔjirb Juda aatiŋ kimɔk bi nan maa ŋigon gob ki na,

2 Bibɔrb Aabɔr 19:6

le ki tuk bi ke, “Ni li nyi naah ji binib tibɔr pu na; naa ye unibɔn aapɔɔn pu le ni tun, ni ye Uwumbɔr aapɔɔn pu la, le u bi ni chee buyoonn ni bi ji unii tibɔr na.

Job Aagbaŋ 31:34

Maa kee san binib aah ga len pu na aanimɔɔn; maa kee ka ŋmin, kaa kee bee kidiik ni, binib aalaar pu.

Ilahn 82:2

“Di cha nimi aabamɔn gangal ngbaan aabɔjil; taa ki joo ibamɔn tii bibiindam man.

Nnyam 18:18

Ni ga ŋun aa ni binib ngbaan mɔmɔk. Ni ga nyaŋ si.

Nnyam 18:22

Cha binib ngbaan aaboln le ye bibɔjirb biken pu n‑yoonn mɔmɔk. Tibɔr ti pɔɔ nyaŋ bi na kan, cha bi li joo ni ti aa chee, le tibɔr ti kaa kpaln na kan, bi ga ŋmaa toor ti bibaa. Bi yaa ter si kan, aa mu ga kan lifuur.

Nnyam 18:26

Bi nan tun libɔjil aatuln binib ngbaan chee n‑yoonn mɔmɔk, le ki tee joo ni tibɔr ti pɔɔ na Moses chee, le ki toor tibɔr ti kaa pɔɔ na bibaa.

Ŋiyataŋak 18:5

Naa ŋan ke aa kpee unii u jin libɔkpol na pu, ki cha unii u aabɔr ŋan na lann waabamɔn.

Ŋiyataŋak 24:23

Bilandam le ki len tibɔr timina mu: Naa ŋan ke ubɔjir li kpa imaagann.

Ŋiyataŋak 28:21

Njinjin aa ŋan; le bibɔjirb bibaa ma pɔɔni bibaa ki gaal igaŋgaŋlik.

Ŋiyataŋak 29:25

Aa yaa dii binib aah dak aa pu pu na kan, naa ŋan. Aa yaa tii Uwumbɔr naadii kan, le aa ŋmar.

Jeremia 1:17

Jeremia, gor ki buen ti bui bi maah bui si ke aa len pu na mɔmɔk. Taa san bi ijawaan dandana wee, naa ye kina kan, buyoonn aa bi bi chee na, le m ga cha ijawaan chuu si.

Liifai Yaab 19:15

“Ni yaa bi ji unii tibɔr kan, ni len ibamɔn ki li kpa kipak; ni yaa ji ugiin tibɔr kan, ni taa li kpa imaagann, ki mu taa li san biwankpadam ijawaan.

Malakai 2:9

Ni yii, kaa kii maa ban pu na. Ni yaa ji maanib tibɔr kan, ni ganni la. Nima pu na, m mu ga cha Israel yaab lik seen nimi.”

Matiu 22:16

Le bi tun baadidiliib ni Ubɔr Herod aanib bibaa Yesu chee, le bi ti bui u, “Umɔmɔkr, ti bee ke aa len mbamɔn la, ki mɔk timi Uwumbɔr aasan mbamɔm, kaa san unii ubaa ijawaan, kaa pak ubaa ki jer uken.

Tibɔnyaan ti Mak ŋmee ti na 12:14

Baah fuu ni u chee na, le bi bui u ke, “Umɔmɔkr, ti bee ke aa len mbamɔn la, kaa san ubaa ijawaan, kaa pak ubaa ki jer uken. Aa mɔk timi Uwumbɔr aasan mbamɔm la. Ni ŋan ti pa lampoo tii Ubɔrkpaan Siisa aan naa ŋan? Ti pa aan ti taa pa?”

Tibɔnyaan ti Luk ŋmee ti na 20:21

Le bi dan nan bui u, “Umɔmɔkr, ti nyi ke aa len mbamɔn, ki tuk binib Uwumbɔr aabɔr mbamɔm, kaa pak ubaa ki jer uken. Aa po mɔk bi Uwumbɔr aasan mbamɔm la.

Rom Yaab 2:11

ba pu? Uwumbɔr aa pak ubaa ki jer uken.

Efesusi 6:9

Dindatiib, ni mu li ŋani nimi aanaagbiib mbamɔm, ki taa faani bi, ki li nyi ke ni ni nimi aanaagbiib kpaan Dindaan baan le paacham. Uma aa pak ubaa ki jer uken.

Ikaal 10:17

Nidindaan Uwumbɔr le jer dindatiib mɔmɔk, le ki kpa mpɔɔn mu ki jer ipɔɔn mɔmɔk. Waah ye usakpiin ki kpa mpɔɔn na, le ni ŋeer ke ti li san u ijawaan. Waa kpa imaagann, le kaa gaal igaŋgaŋlik.

Ikaal 16:19

Bi taa di inyamɔn ni imaagann ji tibɔr, ki mu taa li gaal igaŋgaŋlik, ba pu? ŋimombil ga cha binib bi kpa nlan ki bi mbamɔm na jɔb, le kaan ki li nyi ibamɔn.

Ikaal 24:17

“Ni taa cha biwɔwɔm, ni nkpobim lann baabamɔn, ki taa gaa ukpopii aawanpeenkaan, waah pinn aa chee tiwan ni pu na, ki bui ke see u pan saawan tii si, le aa nin giin tii u.

Ikaal 25:1

“Nimi Israel yaab ŋmeen aajab bilee yaa kpa kijaak ki di tɔb buen libɔjil ni, aan ubaa ti jin mbamɔn, uken aabɔr bii kan,

Kolosiya 3:25

Unii umɔk tun lituln li kaa ŋan na, Uwumbɔr ga daa utafal waah ŋeer pu na. Uwumbɔr aa pak ubaa ki jer uken.

1 Tesalonika 2:4

N‑yoonn mɔmɔk ti nan len Uwumbɔr aah ban ke ti len pu na; ba pu? u nan lik taah bi pu na, le ki di waabɔnyaan ngbaan ŋa tiŋaal ni, ke ti tuk binib. Nima pu le ti ban ke ti piir Uwumbɔr aasui, naa ye binib aasui. Uma Uwumbɔr le lik timi aasui ni aah bi pu na.

Jemisi 2:9

Ni mu yaa pak ubaa ki jer uken kan, ni tun titunwanbir la. Uwumbɔr aakaal galn nimi ke ni bii mu la.

1 Piita 1:17

Ni yaa mee Uwumbɔr kan, ni yin u ke Nite la. Nima pu na, ni li san u buyoonn ni bi na; ba pu? waa pak ubaa ki jer uken. U ga ji binib mɔmɔk aabɔr baah tun pu na.

1 Samuel 16:7

Le Uwumbɔr bui u ke, “Taa lik waah fɔk ki ŋan pu na pu. M yii u; ba pu? maa dak ke unibɔn aah dak pu na. Unibɔn lik tiwon la, le m ma lik unii aasui ni.”

1 Samuel 2:25

Unibɔn yaa tun uŋeen aatɔ taani kan, nibaakan Uwumbɔr ga san u kinimbaak, tɔ, ŋma ga ter unii u tun Uwumbɔr titunwanbir na?” Le baa pel bite aah len pu na, ba pu? Uwumbɔr nan siin ke u ku bi.