Hosea 12:4 - Uwumbɔr aagbaŋ

⁴ u ni Uwumbɔr aatuun nan mɔn le u nyaŋ mu. U nan wii ki mee ban tinyoor. Le Uwumbɔr dan tiyaaja Jakob chee Betel aatiŋ ni, ki nan len u chee tibɔr.

Hosea 12:4 ပူးပေါင်းရင်းမြစ်များ

Mpiin 25:26

Ubo u nan paa na nan nyan ni le ki joo Esɔ aataagbeln, nima pu na, bi nan yin u ke Jakob. Aisak nan ye ŋibin imonko itaa le ki ma bijaam ngbaan.

Mpiin 32:24

le u nan labr ti doon ubaa, lipepel liken na wɔb. Nima chee le Uwumbɔr aatuun dan kinyeek ngbaan, le bi nan mɔn kitaak ti ban ki woln.

Mpiin 32:25

Uwumbɔr aatuun ngbaan aah kan ke waa ŋmaa nyaŋ u na, le u nyii Jakob aakpiik, le ki kper.

Mpiin 32:26

Le ntuun ngbaan bui u ke, “Ni ban ni woln la, di mi lii, aan m li cha.” Le Jakob bui u ke, “Maan cha aa buen, see aa ŋa tinyoor ŋa m pu.”

Mpiin 32:29

Le Jakob bui ke, “Aa mu tuk mi saayimbil.” Le u nan baa u ke, “Ba ŋa aa ban ke aa bee maayimbil?” Le u ŋa tinyoor ŋa Jakob pu.

Mpiin 35:15

le ki yin nima chee ke Betel.

Mpiin 48:15

le ki mee tinyoor ŋa Josef pu ke: “Uwumbɔr u ye ntetiib Abraham ni Aisak Aawumbɔr na, ŋa tinyoor ŋa mbim bee pu. Cha Uwumbɔr u lik mi ki nan saa din wee na, ŋa tinyoor ŋa bi pu.

Ilahn 66:6

U cha nnyusakpem kpaln kitikuun; tiyaajatiib chuun bitaa pu le ki puur limɔɔl. Nima chee le ti nan mɔɔni waah tun pu na pu.

Aisaya 63:9

Kina pu le u nyan bi baafalaa ni. Naa nan ye waatuun, uma Uwumbɔr ubaa le nan gaa bi lii. Waageehm ni waanimbaasaln pu le u gaa bi lii. N‑yoonn mu jer na le u nan kii bi,

Malakai 3:1

Tɔ, Uwumbɔr Mpɔɔnsakpiindaan gar ke, “M ga tun ni maatuun aan u nan toor nsan siin mi. Le Dindaan u ni ban na ga fuu ni libuul ngbaan ni, Waadichal ni. Ntuun mu ni neen sakpen ke ni kan mu na ga dan ki nan di maah puu tipuur ti na moon.”

1 Tesalonika 4:17

Njan, Yesu aanib bi kpo na le ga fikr nkun ni, le Uwumbɔr nin kpaan yoor bi ni waanib bi mu ga li bi n‑yoonn ngbaan na, le bi ti tooh Tidindaan ntaalangbam ni, paacham. Kina le ti ga li bi Tidindaan chee n‑yoonn mu kaa kpa ndoon na.

Hiibru Yaab 5:7

Buyoonn Yesu nan ye unibɔn na, u nan wii tinyunyunn mpɔɔn pu, ki gaŋ Uwumbɔr u ga ŋmaa nyan u nkun ni na. Waah san Uwumbɔr na, le u ŋun waameel.