Hosea 11:9 - Uwumbɔr aagbaŋ

⁹ Maan daa aatafal maaŋuul ponn ni; maan ki kuln Israel yaab, ba pu? M ye Uwumbɔr la, maa ye unibɔn. Min u bi chain na bi ni chee. Maan dan ni chee maaŋuul ponn ni.

Hosea 11:9 ပူးပေါင်းရင်းမြစ်များ

2 Samuel 20:10

Amasa aa nan gor kiir kijuk ki Joab nan joo uŋaal muken na ni na, le Joab di ki saa gbir upuul, le Amasa aaneer nyan lir ni kitiŋ. U nan kpo libuul ngbaan ni la, le Joab aa ki gir saa u lelee. Le Joab ni unaal Abisai di paan Seba pu.

Ilahn 46:5

Uwumbɔr bi kitiŋ ngbaan ni, kina pu na, kaan bii daalbaadaal; lichakpitaawoln le u ga dan nan ter ki.

Ilahn 78:38

Le Uwumbɔr ma nan san waanib kinimbaak. U nan di cha pinn bi baatunwanbir kaa kuln bi. N‑yoonn n‑yoonn pam le waa di waaŋuul tun lituln, ki chuu waaŋuusakpeln.

Ilahn 85:4

Uwumbɔr u gaal timi lir na, giin ni timi aabaa chee, ki cha aasui li piin ti pu.

Aisaya 12:6

Cha unii umɔk bi Sionn na teen ki gaa ilahn ke, Israel yaab Aawumbɔr u bi chain na ye Uwumbɔrkpaan la, le ki bi waanib chee.”

Aisaya 31:1

Binib bi chaa Ijipt ti ban nterm na aamɔfal junn a. Bi lik Ijipt aajab bi chaa butɔb na, ni baataan ni baataan aatɔroku tiib aawiwiir la. Baa tee fenn lik Uwumbɔr, u ye bima Israel yaab Aadindaan ki bi chain na, ke u ter bi.

Aisaya 41:14

Uwumbɔr bui ke, “Israel yaab, naah par kaa ki kpa mpɔɔn mu pu na, taa san man ijawaan, m ga ter nimi. Min, u ye nimi Israel yaab Aawumbɔr u bi chain na, min le ye u gaal nimi lir na.

Aisaya 41:16

Ni ga di ki mee yaa paacham; le libuln ga daa ki buen, le kitaabuŋ daa ki yaa. Le ni ga mɔɔr nimi ke min le ye nimi Aawumbɔr; ni ga pak mi, nimi Israel yaab Aawumbɔr u bi chain na.

Aisaya 48:9

Maah ban ke binib nyuŋ maayimbil na, nima le m chur maaŋuul; m kiir li ke m taa kuln nimi la.

Aisaya 5:24

Kina pu na, timokuun ni ikpakpaabi aah wu mmii ni pu na, kina le nimi aanyaan ga bur, le nimi aafar mu kuur aan libuln daa ti buen, ba pu? nimi Israel yaab, ni yii Nimi Aawumbɔr Mpɔɔnsakpiindaan u bi chain na aah mɔk timi pu na.

Jeremia 26:3

Nibaakan, binib ngbaan ga ŋun ki di cha baatunwanbir aabimbin. Bi yaa ŋun kan, m ga kpeln maalandak ki taa ki cha libiil li m ba ga joo ni bi pu, baabiin aatuln pu na, dan bi pu.”

Jeremia 30:11

M ga dan ni chee ki nan gaa nimi lii. M ga kuln ŋitimbol ŋi mɔmɔk m cha ni yaa ki bi ŋi ponn ni na, maan kuln nimi ma. Maan di cha ki taa daa nitafal; m mu yaa daa nitafal kan, m ga daa ki ŋeer la. Min Uwumbɔr le len kina.”

Hosea 12:1

“Israel aanib aah tun pu kichakpiik ni ki ti saa kinyeek na aa kpa tinyoor, le ki ye libiil ŋmeen. Mbimbin mu pɔɔ na ni inyamɔn le moo kpae bi ponn ni. Bi ni Ijipt ni Asiria yaab kpaani kimɔbaan la.”

Hosea 14:4

Uwumbɔr bui ke, “M ga giin ni maanib mbaa chee. M ga li gee bi ni nsui mɔmɔk; maaŋuul aan ki fii bi pu.

Malakai 3:6

“Min le ye Uwumbɔr, maa kpelni. Kina pu na, nimi, Jakob aayaabitiib aa kee kuln doo.

Nkahm 23:19

Uwumbɔr aa ye unii ki geei inyamɔn, waa ye unibɔn le ki kpelni waalandak. U yaa puu ke u ga ŋa pu na kan, see u ŋa kina. U len, le ni ŋani kina.

Ikaal 13:17

Ni taa yoor tiwan ni Uwumbɔr bui ke ni bii, kitiŋ ngbaan ni na, ki li joo nibaa; nima kan, Uwumbɔr aaŋuusakpeln ga sɔŋ, le u ga san nimi kinimbaak. Ni yaa joo waakaal i m joo tuk nimi din wee na, ki ŋani waah gee pu na kan, le u ga san nimi kinimbaak, ki cha ni pɔr pam, ke waah nan puu pu tii niyaajatiib na.

1 Samuel 26:8

Le Abisai bui David ke, “Uwumbɔr di saadin ŋa aaŋaal ni kinyeek kee. Cha m di ubaa aakpaatuŋ saa u tam kitiŋ nfum mubaa, maan ban muleler.”