Hiibru Yaab 11:23 - Uwumbɔr aagbaŋ

²³ Moses aate ni una aah nan gaa Uwumbɔr ki kii pu na, le bi nan di u bɔr iŋmal itaa. Bi nan kan ke u ye ubo u ŋan sakpen na, kina pu na, baa nan san Ubɔr Faro aah nan siin ke bi ku bima Israel yaab aabijabim pu na aakaal.

UWONBƆR A GBƆNPƆŊ LIKƆƆNL

²³ Yada bu le Moziz a baa nin u na nan ta u ki woon iŋmal itaa, baah nan maa u a bɔɔn. Bi nan kan ke Moziz ye kibiŋiŋaŋ kan kaa jɔɔ kpiɛg le, mambu baa nan san ubɔr a siimin ni.

Hiibru Yaab 11:23 ပူးပေါင်းရင်းမြစ်များ

Ilahn 118:6

Uwumbɔr bi m chee, kina pu na, maan san ijawaan; ubaa aan ŋmaa ŋa mi nibaa.

Ilahn 56:4

M kpa Uwumbɔr pu gaakii le kaa san ijawaan; m pak u waah puu tipuur ti na pu. Unibɔn aan ŋmaa ŋa mi nibaa.

Nnyam 1:16

“Ni yaa ban ni ter Hiibru yaab aapii u imalween chuu u na kan, ubo ngbaan yaa ye ubijabo kan, ni ku u, u yaa ye upiibo kan, ni taa ku u.”

Nnyam 1:22

Gbelngbeln na, ubɔr ngbaan nan siin nkaal ki bui waanib mɔmɔk ke bi di Hiibru yaab aabijabim bi bi laa ma bi na ki di mee lii Nail aamɔɔl ni, tɔ, bi taa ku mpiibim ma.

Aisaya 41:10

Taa san ijawaan man. M bi ni chee. Min le ye nimi Aawumbɔr, taa cha nibaa faan nimi man. M ga tii nimi mpɔɔn ki ter nimi; m ga li kii nimi ki nyan nimi tibɔr ni.

Aisaya 41:14

Uwumbɔr bui ke, “Israel yaab, naah par kaa ki kpa mpɔɔn mu pu na, taa san man ijawaan, m ga ter nimi. Min, u ye nimi Israel yaab Aawumbɔr u bi chain na, min le ye u gaal nimi lir na.

Aisaya 51:12

Uwumbɔr bui ke, “Min le pɔɔk nitaakpab. Ba ŋa ni san unibɔn u ga kpo na ijawaan? Ba ŋa ni san unibɔn u ga kpo mala ke timoor na?

Aisaya 51:7

Li pel man, nimi bi nyi tiwan ni ye mbamɔn na, binib bi di maamɔkm ŋa bisui ni na, li pel man. Binib yaa ŋani nimi mbɔnyun ki seei nimi kan, ni taa san ijawaan;

Daniel 6:10

Daniel aah ŋun ke ubɔr di waanaŋ nyii nkaal ngbaan pu na, le u kun linampal. U nan ti koo paacham aadiik ni, waadichal ponn ni. Kidiik ngbaan aatakolu tiib bibaa nan lik Jerusalem aatiŋ wɔb la. Nima chee, le u nan gbaan ke waah ti ŋani pu n‑yoonn mɔmɔk na, takolu tiib bi piir na chee, ki mee Uwumbɔr nfum mutaa nwiin mubaa.

Matiu 10:28

Ni taa san binib ijawaan man. Bi ga ŋmaa ku nimi aawon baanja la. Baan ŋmaa ku nimi aawiin. Ni li san Uwumbɔr u ga ŋmaa bii tiwon ni nwiin mɔmɔk mmii mu kaan junn na ponn ni na.

Lituln 7:20

N‑yoonn ngbaan le bi ma Moses, u nan ye ubo u ŋan sakpen na la. Le bi kpiin u ute do iŋmal itaa.

Hiibru Yaab 13:6

Nima pu le ti ga li kpa lipobil ki bui ke, “Uwumbɔr ye maateter la. Maan san ijawaan. Ubaa aan ŋmaa ŋa mi nibaa.”