N‑yoonn mu ubɔrkpaan Ataksekes aagbaŋ ngbaan fuu Rehum, ni Simsai, ni biŋeen aatɔtiib na, le bi ŋa mala ki buen Jerusalem ni, ki di mpɔɔn kiir Juu yaab ke bi taa ki maa kitiŋ ngbaan.
“Kigbaŋ kee nyan ni Rehum, u ye uyidaan na, ni waagbaŋmeer Simsai, ni biŋeen aatɔtiib, bi ye bibɔjirb, ni bininkpiib biken, bi ye Elam aapepel aatim Erek, ni Babiloŋ, ni Susa ni yaab na,
Naa nan yunn, le Yufrates aamɔɔl aawilir wɔb aapepel aayidaan Tatenai, ni Setar Bosenai, ni baaninkpiib biken kpaan dan Jerusalem, ki nan baa bi ke, “Ŋma tii nimi nsan ke ni maa Uwumbɔr Aadichal lee ki toor li?”
Le Darius nan di tibɔr timina tun ke: “Yufrates aamɔɔl aawilir wɔb aapepel aayidaan Tatenai, ni Setar Bosenai, ni niŋeen aatɔtiib, taa ki bɔ Uwumbɔr Aadichal ngbaan aabɔr ni man,
Bi nan ki nyan ubɔrkpaan ngbaan aah nan tii bi kigbaŋ ki na ki di tii Yufrates Aamɔɔl aawilir aapepel aayidaan ni waaninkpiib, le bi nan tii bi nterm, ni Uwumbɔr Aadichal ni aadoon aaterm.
