Esra 1:2 - Uwumbɔr aagbaŋ

² “Pesia aanaan aabɔr Sairus le siin nkaal mue. Uwumbɔr u ye Paacham Aadindaan na le ŋa mi dulnyaa wee mɔmɔk aajojoor, le ki tii mi lituln ke m maa lidichal Jerusalem aatiŋ ki bi Juda aatiŋ ni na tii u.

Esra 1:2 ပူးပေါင်းရင်းမြစ်များ

1 Bibɔrb 8:27

“Tɔ, Uwumbɔr, m nyi ke saan ŋmaa koo taab do. Hali paacham mɔmɔk aa waa sakpen ki ga ŋeer si, kina pu na, Lidichal li m maa na par ke aa li koo li ponn ni.

2 Bibɔrb Aabɔr 2:12

Li pak Israel yaab Aadindaan Uwumbɔr man, u naan paacham ni taab na. U tii Ubɔr David ubolandaan u kpa ŋuntii, ki nyi tiwan sakpen, ki ŋa nlandak ke u maa lidichal tii Uwumbɔr, ki maa ubaa aabɔrdichal mu na.

Esra 1:5

Le Juda aamaal yaab, ni Benjaminn aamaal yaab aayidam, ni bitotoorb, ni Liifai yaab, ni unii umɔk Uwumbɔr koo usui ni na, gor ke bi ti gir maa Uwumbɔr Aadichal, Jerusalem ponn ni.

Esra 3:7

Binib ngbaan nan tii ŋimombil ke bi di pa binib bi kpii ŋitakpal na, ni binib bi lar ki duur ŋikpan na, ki tii tijikaar, ni ndaan, ni olif aakpan ke bi di tun ti kpeln Taya ni Saidonn yaab chee santina aasui, Lebanonn aatiŋ ni. Le bi ga di kina aasugen di deen ni nnyusakpem ni ki nan saa Jopa aatiŋ mɔk. Pesia aabɔrkpaan Sairus le nan tii nsan ke bi ŋa kina mɔmɔk.

Esra 4:3

Le Serubabel, ni Josua, ni itaŋaal ngbaan aayidam bui bi ke, “Taa ban nimi aaterm ke ti di maa Tidindaan Uwumbɔr Aadichal. Pesia aabɔrkpaan Sairus aah bui timi pu na, timi tibaa le ga maa li.”

Esra 5:15

Ubɔrkpaan ngbaan nan bui u ke u di ni giin ti siin Uwumbɔr Aadichal ponn ni, Jerusalem aatiŋ ni, ki ki gir maa Lidichal ngbaan, laah nan si nin chee na.

Esra 6:10

Ni li ŋani kina, aan bi li ŋmaa toor kitork ki ga piir Uwumbɔr u bi paacham na aasui, ki mee u ke u ŋa waanyoor ŋa m ni njapɔtiib pu.

Esra 6:3

“Ubɔrkpaan Sairus aah nan jin nnaan na aajan aabiln ponn ni, le u nan siin nkaal, ke bi ki gir maa Uwumbɔr Aadichal li nan bi Jerusalem ponn ni na, aan bi li toor kitork nima, ki kpee kitork ki bi joo seer mmii ni na mu. Uwumbɔr Aadichal ngbaan aapaacham aafɔfɔk li ye ŋitaa imonko inaa ni kipiik, ki li waa kina mu.

Esra 7:12

“Kigbaŋ kee nyan ni ubɔrkpaan Ataksekes chee la, le ki cha Esra u ye utotoor, ni ugbanbae, u nyi Uwumbɔr u bi Paacham na Aakaal na chee.

Nehemia 1:4

Maah ŋun tibɔr ngbaan mɔmɔk na le m kal ki wii pam. Iwiin pam nan jer le m bi wii ikpowiil, kaa ji nibaa. M nan mee Uwumbɔr ke,

Nehemia 1:5

“Uwumbɔr u ye Paacham Aadindaan na, aa ye unikpaan la, le ti san si ijawaan. Binib bi gee si ki ŋani saakaal aah len pu na, aa joo saah puu tipuur ti tii bi na mbamɔm.

Ilahn 136:26

Di idoon tii Uwumbɔr u bi paacham na man; waageehm aa kpa ndoon.

Ilahn 85:2

Aa di saanib aatunwanbir pinn bi, ki di baataani mɔmɔk pinn bi.

Ŋiyataŋak 21:1

Uwumbɔr aah mɔk ubɔr aalandak ke i tun pu na, ni waah mɔk nkpen mu aah ga dii pu na aa pɔɔ u chee kpala.

Aisaya 41:2

Ŋma nan joo ni ubɔrkpaan u nyan ni liwipuul wɔb ki cha u nyaŋ binib bimɔk u ni bi jan na? Ŋma cha u nyaŋni bibɔrb ni ŋitimbol? Waajaak aajuk nan bii binib ke naah ye kitangbaak le u per lir na. Waapiin nan cha bi san yaa tɔb chee ke libuln aah daar timoor yaani tɔb chee pu na.

Aisaya 44:26

Le maatutunn ma yaa len ke tiwan ni ga ŋa na kan, bee m yaa ti ki tun ni maatuun ke u nan kpiir maalandak tuk binib kan, m cha ilandak ngbaan ni tibɔr ngbaan gbiini la. M tuk Jerusalem ke binib ga ki gir koo ni ki ponn ni, ki ga gir maa Juda aatisakpem na mɔmɔk. Ntisakpem ngbaan ga fii nyan ni mu aah nan ber pu na ni.

Aisaya 44:28

Le m ga bui ubɔrkpaan Sairus ke, ‘Sin le ga joo maanib; aa ga ŋa maah ban ke aa ŋa pu na: aa ga cha bi ki gir maa Jerusalem, ni Maadichal aadinyikl mu.’”

Aisaya 45:1

Uwumbɔr lee Sairus ke u ŋa u ubɔrkpaan. U lee u ke u to butɔb ki nyaŋ ŋitimbol; u tun u ke u ti nyan bibɔrb baanaan ni; Uwumbɔr le ga piir ntisakpem aabisamɔi tii u. Uma Uwumbɔr bui Sairus ke,

Aisaya 66:1

Uwumbɔr bui ke, “Kitaapaak le ye maabɔrjal, le kitiŋ ye ntaa aah taa ni pu na. Ni ga maa ba aadichal aaboln ki tii mi, ba aapaan ni ga kan tii mi aan m li koo nima?

Jeremia 10:11

Tɔ, nimi le ga bui bi ke ŋiwaa le aa nan naan taab ni paacham; ŋi ga nan kuln. Ŋaan nan ki li bi dulnyaa wee ni nibaa chee.

Jeremia 27:5

“Maapɔɔnsakpiin pu le m naan dulnyaa wee, ni unibɔn, ni tiwakor ti mɔmɔk bi kitiŋ pu na; le ki joo ki tii unii umɔk m gee na.

Jeremia 29:10

“Uwumbɔr ki len ke, ‘Babiloŋ aabin imonko itaa ni kipiik na yaa jer kan, m ga mɔk nimi maah neen nimi pu ki joo tipuur ti m nan puu ke m ga giin ni nimi nido na.

Daniel 1:21

Daniel nan beenin bi ubɔr aachiln ni le Pesia Aabɔrkpaan Sairus nan nyaŋ Babiloŋ yaab butɔb ni.

Daniel 2:21

Uma le joo n‑yoonn, ni tiwan nimɔk bi na; u kaani bibɔrb ki nyani bibɔrb; ni ye uma le tii nlan ni mbeem.

Daniel 2:28

Tɔ, Uwumbɔr ubaa u bi paacham, ki ŋmaa kpiir iwaan aawan mɔk na baanja le ga ŋmaa ŋa kina. Uma le tuk mpɔɔndaan tiwan ni ga ŋa n‑yoonn mu choo na. M ga tuk si tidaŋ ti aa nan dɔ geen ki daŋ na.

Daniel 4:25

Bi ga jenn nyan si binib chee, le aa ni ipeel ga ti li kpaan koo tɔb chee. Aa ga ŋmɔ timoor ke unaa na ki doo lipaal, nin chee limaln ga li lir aa pu na, ki ti saa ŋibin ŋilole. N‑yoonn ngbaan le aa ga tii naadii ke Uwumbɔr u kaa kpa ŋeen aatɔ na le kpa mpɔɔn unibɔn aanaan mɔmɔk pu, le ki ga ŋmaa di mu tii unii umɔk u gee na.

Daniel 4:32

Bi ga jenn nyan si binib chee, le aa ni ipeel le ga li kpaan koo tɔb chee, le aa li ŋmɔ timoor ke unaa na ki ti saa ŋibin ŋilole. N‑yoonn ngbaan le aa ga tii naadii ke Uwumbɔr u kaa kpa ŋeen aatɔ na kpa mpɔɔn unibɔn aanaan mɔmɔk pu, ki ga di mu tii unii umɔk u gee u na.”

Daniel 5:23

Aa tun Paacham Aadindaan tiwan ni kaa ŋan na, ki yoor tiyikur ni ŋisambil ŋi nyan ni Waadichal ni na; le sin, ni saaninyuum, ni aapuutiib, ni aabɔtiib nyun ndaan tiyikur ni ŋisambil ngbaan ponn ni, ki pak ŋiwaa ŋi bi di salmaa, ni tikunabr, ni tikumann, ni tikur, ni idɔ, ni ŋitakpal naan ŋi na, ŋiwaa ŋi kaa waa, kaa ŋun tibɔr, kaa nyi nibaa na, kaa tee nyuŋni Uwumbɔr u lik ke aa ga li bi, bee aa ga kpo, ki joo tiwan ni mɔmɔk aa ŋani na.

Daniel 6:25

Le Ubɔrkpaan Darius ŋmee kigbaŋ tii ŋitimbol mɔmɔk, ni ŋinibol mɔmɔk, ni iliin mɔmɔk aanib kitiŋ kee pu ke: “M dooni ni mɔmɔk.

Jona 1:9

Le Jona gar bi ke, “M ye Hiibru aanii la. M dooni Uwumbɔr u ye paacham Aadindaan, ki naan kitiŋ, ni nnyusakpem na la.”