Amos 5:14 - Uwumbɔr aagbaŋ

¹⁴ Cha tiwan ni ŋan na li ye tiwan ni ni ban na, ki taa li ban kinimbɔŋ aabɔr, ki li kpa limɔfal; le Uwumbɔr Mpɔɔnsakpiindaan ga sil li bi ni chee, ke naah len ke u bi ni chee pu na.

Amos 5:14 ပူးပေါင်းရင်းမြစ်များ

Mpiin 39:23

Uwumbɔr aah nan bi Josef chee aan u tun lituln mbamɔm pu na, unaagbiijool ngbaan aa ki muk ubaa lituln li u di ŋa Josef aaŋaal ni na pu.

1 Bibɔrb Aabɔr 28:20

Ubɔr David nan bui ujapɔɔn Solomonn ke, “Li si chob ki taa san ijawaan. Piin lituln ngbaan ki taa cha nibaa kiir si. Tidindaan Uwumbɔr u m dii na ga li bi aa chee. Waan siir cha si, see lituln li aa ban aa tun Waadichal pu na ti doo.

2 Bibɔrb Aabɔr 15:2

le u buen ki ti tooh Ubɔr Asa nsan pu. U nan teen ki len ke, “Ubɔr Asa, ni Juda, ni Benjaminn aanib bee mɔmɔk, n‑yoonn mumɔk ni bi Uwumbɔr chee na, u mu bi ni chee. Ni yaa ban u kan, u ga cha ni kan u, le ni yaa fenn nipuwɔb tii u kan, u ga di nimi lii.

Ilahn 46:11

Uwumbɔr Mpɔɔnsakpiindaan bi ti chee; uma u nan ye Jakob Aawumbɔr na le ye timi aabɔbɔryaan.

Ilahn 97:10

Uwumbɔr gee binib bi kaa gee titunwanbir na; u kii waanib aamɔfal; u gaal bi bibiindam chee lir.

Nnyam 3:12

Le Uwumbɔr bui u ke, “M ga li bi aa chee, le buyoonn aa nyan ni bi Ijipt aatiŋ ponn ni na, ni ga li dooni mi lijool lee paab la. Nimina le ga mɔk ke min le tun si.”

Ŋiyataŋak 11:27

Unii umɔk ban ke ni li ŋan na ga kan kipak, le umɔk ban tibɔr na ga kan kina.

Aisaya 55:2

Ba ŋa ni joo ŋimombil daa tiwan ni kaan gbiin lipuul na? Ba ŋa ni ji nimi aapal aan nkon beenin joo nimi? Li pel ki ŋa maah len pu na man, aan ki ji tijikaar ti mɔ sakpen na.

Aisaya 8:10

Kpokl naah ga ŋa pu na man. Bi mu aan tee ŋman. Len naah gee pu na man. Ni mɔmɔk ye fam la; ba pu? Uwumbɔr bi ti chee.

Amos 3:3

Bijab bilee aan ŋmaa kpaan piin lisachuln kaa puen kpokl waahr.

Amos 5:6

Li cha man Uwumbɔr chee ki ti kan limɔfal. Ni yaa kaa ŋa kina kan, u ga dan Israel yaab pu ke kimosakpeŋ aamii na la. Mmii ngbaan ga wu Betel yaab, le ubaa aan ŋmaa junn mu.

Maika 3:11

Igaŋgaŋlik pu le kitiŋ ngbaan aajojoob joo ki, le bitotoorb tuk binib Uwumbɔr Aakaal ki gaal tipar, le bibɔnabr mu kpiir Uwumbɔr aah len pu na ŋimombil pu, le bi mɔmɔk len ke Uwumbɔr bi ti chee. Bi len le ke, “Tibɔbir tibaa aan dan ti chee. Uwumbɔr bi ti chee.”

Maika 6:8

Aayii. Uwumbɔr bui timi tiwan ni ŋan na. Waah ban tiwan ni ti chee na sɔ: ke ti ŋa tiwan ni tok ki ŋan na, ki li kpa ngeehm n‑yoonn mɔmɔk, ki li bi suuna timi Aawumbɔr chee.

Sefania 2:3

Fenn gir ni Uwumbɔr chee, nimi binib bi mɔmɔk sunn nibaa taab ki kii waakaal na, fenn gir ni u chee man. Ŋa tiwan ni ŋan na man, ki sunn nibaa taab Uwumbɔr aanimbiin ni. Nibaakan, ni ga nan nya ntafadaan ni, bundaal aan Uwumbɔr ga nan nyan waaŋuul paacham na.

Nkahm 16:3

Bi nan kuun sil Moses ni Aaronn chee, le ki bui bi ke, “Ni yoor nibaa paacham ki ti chaar jer a. Uwumbɔr le yeh binib ngbaan mɔmɔk, le ki bi ti mɔmɔk ubaabaa chee. Nima pu na, ba ŋa si Moses dak ke aa ŋan jer Uwumbɔr aanib ngbaan mɔmɔk, aan ki yoor aabaa paacham sakpen kina?”

Matiu 1:23

“Usapɔɔn u kaa nyi uja na ga nan dek lipuul ki maa ubijabo, bi ga li yin u ke Imanuel.” (Imanuel aatataa le ye ke “Uwumbɔr bi ti chee”.)

Matiu 28:20

ki tuk bi ke bi li keei maah tuk nimi pu na mɔmɔk. Teer man ke m bi ni chee n‑yoonn mɔmɔk, ki nan saa dulnyaa aadoon.”

Matiu 6:33

Ni li ban Uwumbɔr aanaan, ni waasanyaan le waahr; le u ga di tiwan ngbaan mɔmɔk kpee nimi.

2 Timoti 4:22

Tidindaan li bi saawiin chee. Uwumbɔr ŋa tinyoor ŋa ni pu.

Josua 1:9

Teer ke m tuk si ke aa pɔɔn aabaa ki li kpa lipobil. Taa san ijawaan, ki taa cha aawon yɔl. Min, Aadindaan Uwumbɔr ma kan, m ga li bi aa chee saah cha nin chee na mɔmɔk.”