Aisaya 5:15 - Uwumbɔr aagbaŋ

¹⁵ Inimɔɔn ga chuu unibɔn mɔk, le bigaadam na ga sunn bibaa taab.

Aisaya 5:15 ပူးပေါင်းရင်းမြစ်များ

2 Samuel 22:28

Aa gaal binib bi sunn bibaa taab na lir, le ki sunn binib bi kpa kigaak na taab.

Ilahn 131:1

Uwumbɔr, m di cha kigaak aatuln kaa ki kpa kalimbaani. Ntafal aa bi tibɔr ti jer mi na ni, kaa bi tiwan ni pɔɔ jer maalan na ni.

Ilahn 62:9

Unibɔn naahn litakpiln libaa aabuln la; binikpaam ni biwaatiib mɔmɔk aa kpa tinyoor. Di bi tɔŋ likakl pu, le aa ga bee ke baa nyuun kpala, libuln nyuun jer bi.

Nnyam 9:17

Linimbaasaln limina mɔmɔk ponn ni, ni mɔmɔk yɔli, aa pɔɔk aasui ki yii ke maanib ngbaan taa buen.

Ŋiyataŋak 30:13

Binib bibaa bi, ki dak ke bi ŋan sakpen, bi po dak ke bi ŋan ni ti nyaŋ la.

Aisaya 10:12

Uwumbɔr nan ki bui ke, “M yaa doo maah bi tun lituln li Sionn Aajool pu ni Jerusalem ni na kan, m ga daa Asiria aabɔrkpaan ngbaan aatafal, waah puk tipupuur timɔk na, ni waamakl ngbaan pu.”

Aisaya 10:33

Tɔ, Uwumbɔr Mpɔɔnsakpiindaan ga daa bi lii ni ke baah gaa bar isubon lir ni kitiŋ pu na. Bininyuum ni kigaadam mɔmɔk ga doon kitiŋ le ki kpaln yaansara aanib.

Aisaya 13:11

Uwumbɔr len ke, “M ga joo ni falaa kitiŋ kee pu aan ki daa titunwanbirdam mɔmɔk aatafal baatunwanbir pu. Umɔk kpa kigaak ni mbiin na, m ga daa utafal ki sunn bigaadam mɔmɔk taab.

Aisaya 2:11

Nwiin mubaa choo, buyoonn unibɔn aagaak ga doo aan kalmbaani mu kuln na. N‑yoonn ngbaan le Uwumbɔr baanja ga kan bunyuŋ.

Aisaya 2:12

Liyaadaal ngbaan Uwumbɔr Mpɔɔnsakpiindaan ga sunn mpɔɔndam, ni kalmbaanidam, ni kigaadam mɔmɔk taab.

Aisaya 2:17

Unibɔn aagaak ga doo, le unibɔn aakalmbaani mu kuln. Ŋiwaa mɔmɔk ga kuln, le Uwumbɔr baanja le ga kan kipak ni nnyuŋ nwiin ngbaan daal.

Aisaya 2:9

Bi mɔmɔk ga ji inimɔɔn. Uwumbɔr, taa di cha pinn bi.

Aisaya 37:23

Aa dak ke ŋma aa bi seei ki ŋani u mbɔnyun? Saa pak mi, Israel yaab Aawumbɔr u bi chain na kpala.

Aisaya 37:29

M ŋun saah kpa liŋuusakpeln ni kigaak pu na, le dandana m ga di njapiin di pui aamɔfal ni, le ki di itangar mu di ŋa aamɔb ni, ki di si giin dii nsan mu aa dii ni ki dan na.”

Jeremia 5:9

M taa daa bitafal nimina pu ki teen kina aatimbol aa?

Daniel 4:37

“Le dandana wee, min Nebukadnesar pak ki nyuŋ Paacham Aabɔrkpaan ngbaan ki tii u kipak. Waah ŋani tiwan nimɔk na ye mbamɔn ki tok, le u ga ŋmaa sunn binib bi kpa kigaak na taab.”

Sefania 3:11

N‑yoonn ngbaan na, nimi maanib aan ki san inimɔɔn ke ni nan nyan mpuwɔb. M ga nyan binib bi mɔmɔk kpa kigaak ni kipupuk na ni ponn ni, le naan ki li kpa kalimbaani maagongoln li bi chain na pu daalbaadaal.

1 Piita 5:5

Nimi bi kaa por na, ni li keei binib bi kpeln nimi na aamɔb. Ni mɔmɔk li sunni nibaa taab, ki li ter tɔb. Ba pu? Uwumbɔr Aagbaŋ len ke, “Uwumbɔr yiil kalmbaanidam, le ki lik faar binib bi sunni bibaa taab na.”