Aisaya 41:2 - Uwumbɔr aagbaŋ

² Ŋma nan joo ni ubɔrkpaan u nyan ni liwipuul wɔb ki cha u nyaŋ binib bimɔk u ni bi jan na? Ŋma cha u nyaŋni bibɔrb ni ŋitimbol? Waajaak aajuk nan bii binib ke naah ye kitangbaak le u per lir na. Waapiin nan cha bi san yaa tɔb chee ke libuln aah daar timoor yaani tɔb chee pu na.

Aisaya 41:2 ပူးပေါင်းရင်းမြစ်များ

Mpiin 11:31

Le Tera nan yoor ujapɔɔn Abram, ni uyaabil Lot u aate nan ye Harann na, ki kpee ubipuu Sarai, u ye Abram aapuu na, le ki di bi nyan Ur aatiŋ ki nan bi Babiloŋ yaab aatiŋ ni na, le ki di bi nyan ki cha Kanaann yaab aatiŋ ni. Bi nan ti fuu Harann aatiŋ ni, le ki kal nima.

Mpiin 17:1

Buyoonn Abram nan ti saa ŋibin imonko inaa ni kipiik ni ŋiwae na, le Uwumbɔr nan dan u chee ki nan bui u ke, “Min le ye Uwumbɔr Mpɔɔnsakpiindaan. Tii mi naadii, ki li ŋani ni ŋan na n‑yoonn mɔmɔk.

2 Samuel 22:43

M gbaa bi, le bi kpaln kitangbaak; m taa bi pu kitiŋ ponn ni ke tikpakpar na la.

2 Bibɔrb 13:7

Jehoahas aa nan ki kpa bijab bi kpa tijawan na; bitandam piiŋmu, ni tɔroku tiib kipiik, ni bitaabɔndam ŋichur kipiik baanja le nan gur. Siria aatiŋ aabɔr nan taa taa bi gur na ŋmal titan ni ke kitangbaak na ki kuln bi.

2 Bibɔrb Aabɔr 36:23

“Pesia aanaan Aabɔr Sairus le siin nkaal mue. Uwumbɔr u ye paacham Aadindaan na, uma le ŋa mi dulnyaa wee mɔmɔk aajojoor, le ki tii mi lituln ke m maa lidichal, Jerusalem aatiŋ ki bi Juda aatiŋ ni na tii u. Tɔ, ni mɔmɔk bi ye Uwumbɔr aanib na, li cha man nima, aan Nidindaan Uwumbɔr li bi ni chee.”

Esra 1:2

“Pesia aanaan aabɔr Sairus le siin nkaal mue. Uwumbɔr u ye Paacham Aadindaan na le ŋa mi dulnyaa wee mɔmɔk aajojoor, le ki tii mi lituln ke m maa lidichal Jerusalem aatiŋ ki bi Juda aatiŋ ni na tii u.

Aisaya 40:24

Bi naahn tiwan ni laa punn, kaa kee kpa inyaan na la. Uwumbɔr yaa tun ni libuln kan, bi kuur la, le libuln daa bi buen ke likakl na.

Aisaya 41:25

M lee uja u bi liwipuul wɔb na; m ga cha u nyan ni paacham wɔb ki nan tak nimi. U taar bitinjoob ŋmalni titan ni ke baah ye tikpakpar le na, ke uyakmaal aah nyani tiyakr pu na.

Aisaya 41:3

U san dii bi, kaa kani tibɔbir tibaa; u nan san mala sakpen, le ni naahn ke waah fiir paacham le na.

Aisaya 42:6

“Min Uwumbɔr le yin si ki tii si mpɔɔn ke aa cha ibamɔn dan dulnyaa wee ni. Sin pu le m ga puu tipuur tii binib mɔmɔk; sin pu le nwiihn ga dan ŋinibol mɔmɔk pu.

Aisaya 45:1

Uwumbɔr lee Sairus ke u ŋa u ubɔrkpaan. U lee u ke u to butɔb ki nyaŋ ŋitimbol; u tun u ke u ti nyan bibɔrb baanaan ni; Uwumbɔr le ga piir ntisakpem aabisamɔi tii u. Uma Uwumbɔr bui Sairus ke,

Aisaya 45:13

Min mbaa le pɔɔk ubɔrkpaan Sairus aataakpab ke u tun maatuln ki cha tiwan mɔmɔk sil chob. M ga naar isan imɔk u chuun i pu aan i gɔr na. U ga gir maa maatiŋ Jerusalem, ki gaa maanib lii. Ubaa aa tii u ipiin ke u di tun lituln limina.” Uwumbɔr Mpɔɔnsakpiindaan le len kina.

Aisaya 46:11

M bi yin ni uja ubaa ke u nya ni liwipuul wɔb; u ga boon ni ke kaasaa na ki nan ŋa maah dak pu na. Min le len, le ni ga ŋa kina.

Aisaya 48:15

Min le nan len ki yin u; m loln u pu nsan ki cha u kan maah ban pu na.

Inandalahn 1:15

Uwumbɔr nan yuul maajab bi kaar na. U nan tun ni bijab le bi nan kuln maanachipɔm. U nan muen muen maanib ke baah mueni ndaan aasubil pu na la.

Hiibru Yaab 7:1

Melkisedek ngbaan nan ye Salem aatiŋ aabɔr, ki nan ye Uwumbɔr u kaa kpa ŋeen aatɔ na aatotoor la. Abraham aah nan ku bibɔrb bi ye waadim na ki gir ni na, le Melkisedek tooh u nsan pu ki ti ŋa Uwumbɔr aanyoor ŋa u pu.

Tibɔkpiirkaan 16:12

Le Uwumbɔr aatuun loloob mu di falaa u bi waasambil ni na kpir limɔɔsakpeln li bi yin li ke Yufrates na ni. Le laanyun foor, ki ŋa nsan ki tii bibɔrb bi nyan ni liwipuul wɔb na.

Tibɔkpiirkaan 7:2

Le m kan Uwumbɔr aatuun uken nyan ni liwipuul wɔb ki dan paacham, ki joo ni Uwumbɔr u ye limɔfal daan na aadaan, ki nan teen mpɔɔn pu, ki tuk Uwumbɔr aatuuntiib binaa bi Uwumbɔr tii bi mpɔɔn ke bi bii kitiŋ ni nnyusakpem na ke,