5 Juda aanib mu ga nan wii nwiin pu ke bi di bibaa tii Ijipt aatimbol li kaan ŋmaa ter bi na; buyoonn bi ban nterm na kan, litimbol ngbaan aan ŋmaa ter bi.”
Kina pu na, Uwumbɔr yaa daa nitafal kan, ni ga ŋa kinye? Uwumbɔr yaa cha tibɔbir nyan ni dandar ki nan lir ni pu kan, ni ga ŋa kinye? La chee aan ni ga san ti ban nterm? La chee aan ni ga ti di nimi aawangol di bɔr?
Ni tee fenn le ke ni san ŋmar nimi aadim chee, itaan i ŋmaa san na pu. Ni ye mbamɔn la, ni san ŋmar baanja le ni ga ŋa. Ni dak ke nimi aataan ŋmaa san mala la, le binib bi san dii nimi na aataan ŋmaa san mala sakpen ki ti nyaŋ nimi aataan.
Ni ka dak ke Ijipt yaab le ga ter nimi, tɔ, kina mu ga li naahn unii u di likal di ŋa waajaangbeek na la, li ga koo le ki saa uŋaal. Ijipt aabɔrkpaan bi kina le ki tii umɔk mak u pu na.”