Uwumbɔr aabɔnabr Jeremia nan naan nkpolahn tii Ubɔr Josia, le ni kpaln nkaal Israel aatiŋ ni ke uja ni upii mɔk yaa ban u wii waakpuul kan, udaan gaa nkpolahn ngbaan. Waalahn ngbaan bi ikpolahn aagbaŋ ni.
Aa nan kan tiyaajatiib aah jin falaa sakpen pu Ijipt aatiŋ ponn ni na. Baah nan yin si ke aa ter bi buyoonn bi nan bi Nnyusakpem Mamam na chee na, aa nan kii.
U siin tiwan mɔmɔk aayoonn dee dee la. U cha ti kpa lineen ke ti li nyi n‑yoonn mu choo na aabɔr, le kaa tee tii timi nsan ke ti bee waah tun pu na aatataa mbamɔm.
Saah po ŋani bibiindam tiŋann na, baa kee bae ke bi ŋa ni ŋan na. Hali nin chee bininyaam bi na, bi beenin ŋani ni kaa ŋan na; bi yii, kaa bee ke aa kpa mpɔɔn sakpen.
Uwumbɔr aatork aabimbiln, li ye Jerusalem na, kuln a. Kitisakpeŋ ki ubɔr David nan koo ki ponn ni na kuln a. Cha libiln libaa bee ŋilee jer, ŋi ni ŋaajim, ni mu aawanpɔɔn aajim,
Baah ba ga li ŋmir tulalee pu na, bi ga li nu la; baan ki buu ŋigbapapan, bi ga li buu tichɔsɔnn aaŋmin la; baan ki li kpa tiyikpir ti ŋan na, bi ga li gur ye ŋiyikun ŋmeen la; baan ki gbab ŋikekenyaan, tikekekpir le bi ga li gbae; le baanyaan ga kpaln inimɔɔn.
Ni po bi nibaa pu la, kaa kpa ilandak ibaa; dandana ma kan, cha niwon li gbaa ijawaan pu. Gbabr nimi aakeken mee man, ki ban tiwankpir di gbin nichaŋ ni.
Ubɔrkpaan Hesekia aah ŋun baah len pu na, libuul ngbaan ni le u daa kar waawanpeenkaan, usui aah bii sakpen pu na, le ki di tiwanpeenkaan ni saak kuub na peen, le ki buen Uwumbɔr Aadichal ni,
le ki tun Eliakim, libɔrdichal ponn ni aaninkpel, ni Sebna, u ye nnaan aabɔr mɔmɔk aaninkpel na, ni Uwumbɔr aatotoorninkpiib, bi buen Uwumbɔr aabɔnabr Aisaya u ye Amos aajapɔɔn na chee. Binib ngbaan mɔmɔk mu nan pee tiwanpeenkaan ni saak kuub na la.
Binib ngbaan baa ke, “Ba ŋa ti lulni bumɔb, le Uwumbɔr aatafal aa bi ti ni? Ba ŋa ti sunn tibaa taab, le waa pel ti chee?” Uwumbɔr bui bi ke, “Mbamɔn aah ye pu na le ye ke n‑yoonn mu ni lul bumɔb na, le ni bi ban nibaa aageehn le ki muk nimi aatutum.
Israel aanib, taa ki ji nimi aajim ke binib bi kaa nyi Uwumbɔr na aah ŋani pu na. Ni fenn nipuwɔb tii nimi Aawumbɔr le kaa keei waamɔb. Kitiŋ kee mɔmɔk pu, ni di nibaa kooh ke upiidagoor na le ki di tii liwaal Baal, le ki gee tijikaar ti ni dak ke u joo pa nimi na.
Nimi bitotoorb bi dooni Uwumbɔr waatork aabimbiln taab na, peen tiwan ni saak kuub na ki li wii man. Li cha Uwumbɔr Aadichal ni ki ti li wii ikpowiil, ki taa geen man. Njikaabim ni ndaan aa bi ni di toor kitork tii nimi Aawumbɔr.
Bitotoorb bi tun Uwumbɔr aatuln, waatork aabimbiln ni Waadichal aabisamɔb aakaasisik ni na; ni li mee Uwumbɔr ni tinyunyunn ke: “Uwumbɔr, san saanib kinimbaak. Taa cha ŋinibol ŋiken lik timi fam ki ŋa timi mbɔnyun ki len ke, ‘Nimi Aawumbɔr ngbaan bi la?’”
M ga kpeln nimi aajim aayoonn ŋa ŋikpuu, ki kpeln nimi aamɔɔn aalahn ŋa inimbaalahn. M ga cha ni kuu nimi aayikpir ki peen tiwan ni saak kuub na, aan ki cha ni li naahn libibaal li kpo na aate ni una aah wii waakpuul pu na. Nwiin ngbaan daal ga li cho kina le ki ti saa mu aadoon.
Ninefa aabɔr aah ŋun tibɔr ngbaan na, le u fii libɔrjal pu, ki chuu peer waanaan aawanpeenkaan, le ki di tiwanpeenkaan ni saak kuub na peen, le ki kal nfatan ponn ni.
Juda aanib, kuu nimi aayikpir man ki li wii naah gee nimi aabim bi na pu. Kuu ŋiyikun ke nangba tiib na man, ba pu? bi ga di nimi aabim buen kitiyayaŋ ni ki cha nimi.