Aisaya 15:2 - Uwumbɔr aagbaŋ

² Dibonn yaab jon ligongoln paab ki ti wii kiwaachuk ni. Moab yaab wii Nebo ni Medeba aatim aanib pu; bi kuu biyikpir ni bilangban mpombiin pu.

Aisaya 15:2 ပူးပေါင်းရင်းမြစ်များ

2 Samuel 10:4

Le Hanunn chuu David aatuun ngbaan, ki kuu bilangban lipepel libaabaa, ki gii gii baawanpeenkaan mu bichaŋ mɔk, ki di bi lii, ke bi li cha.

1 Bibɔrb Aabɔr 19:4

Le Hanunn chuu David aatuuntiib ngbaan, ki kuu bilangban lipepel libaabaa, ki gii gii baawanpeenkaan mu bikpimɔju mɔk, ki di bi lii ke bi li cha.

Job Aagbaŋ 1:20

Le Job fii sil, ki daa kar waawanpeenkaan nsuugar pu. U nan kuu uyil, le ki lir lichichikr,

Aisaya 14:31

Nimi Filistia aatim mɔmɔk, li wii ki gbei ki ban nterm man. Ni mɔmɔk san ijawaan man. Kitangbaak sakpeŋ kibaa nyan ni ŋŋangan wɔb ki choo, ni ye bijakaab ŋmeen la, bijawaandam aa bi bi ponn ni.

Aisaya 15:3

Binib bi chuun kitiŋ ponn ni na pee tiwan ni saak kuub na la; kitiŋ ponn ni, ni ŋidichal paab mɔmɔk binib kaani le ki wii ikpowiil.

Aisaya 16:12

Moab aanib ŋani bibaa falaa ki chaa baatingban, ni baameen aadir ni ke bi ti mee baawaa, le naan ŋa bi tinyoor tibaa.

Aisaya 16:7

Moab aanib ga wii baafalaa u bi jin na pu. Bi mɔmɔk yaa teer baah nan ji tijikaar nyaan ti Kir Heres ni na pu kan, bi ga wii. Biwon ga yɔl.

Aisaya 22:12

Nidindaan Uwumbɔr Mpɔɔnsakpiindaan, nan bi yin nimi ke ni nan wii, ki wii ikpowiil, ki kuu niyil, ki peen tiwan ni saak kuub na aawanpeenkaan.

Aisaya 3:24

Baah ba ga li ŋmir tulalee pu na, bi ga li nu la; baan ki buu ŋigbapapan, bi ga li buu tichɔsɔnn aaŋmin la; baan ki li kpa tiyikpir ti ŋan na, bi ga li gur ye ŋiyikun ŋmeen la; baan ki gbab ŋikekenyaan, tikekekpir le bi ga li gbae; le baanyaan ga kpaln inimɔɔn.

Jeremia 3:21

Israel yaab aah suln Bidindaan Uwumbɔr pu ki tun titunwanbir aatuln na, le kifuuk faa ŋijoo paab, ki ye Israel yaab aah wii ki gaŋni pu na aafuuk la.

Jeremia 47:2

U nan bui ke. “Lik man. Nnyun le fii ŋŋangan wɔb ki san ke limɔɔl le aa nyan nwam na. Mu ga biin kitiŋ ni tiwan ni mɔmɔk bi ki pu na, mu ga biin ntim ni binib bi koo mu ponn ni na pu. Binib ga wii ki ban nterm; kitiŋ kee pu aanii mɔmɔk ga wii pam.

Jeremia 47:5

Mpombiin sakpiin fuu ni Gasa aanib chee a, le Askelonn aanib ŋmin chii. Filistia yaab bi gur na ga wii ikpowiil ti saa bayoonn?

Jeremia 48:1

Uwumbɔr Mpɔɔnsakpiindaan aah nan len Moab yaab aabɔr ti na sɔ: “Nebo aanib aatiŋ kuln a, san bi kinimbaak man. Bi nyaŋ Kiriataim aatiŋ a, bi wii kaadir ti pɔɔ ki fɔk na, le kaanib jin inimɔɔn.

Jeremia 48:18

Nimi bi koo Dibonn aatiŋ ni na, sunn ni kinyuŋ aakakaa chee ki nan kal kitiŋ, titan ni man; unii u ban u bii Moab na fuu ni a, le ki ber kaadir ti fɔk ki pɔɔ ki kpa tijawan na lii.

Jeremia 48:31

Kina pu le m ga wii Moab aatiŋ, ni Kir Heres aatiŋ aanib mɔmɔk pu.

Jeremia 48:35

Maan ki cha Moab aanib see kitork mmii ni, baah dooni baawaa nin chee na, ki taa ki toor kitork tii ŋi. Min Uwumbɔr le len kina.

Jeremia 49:3

Hesbonn aanib, li wii man. Ai aatiŋ kuln a. Raba aapiib, li wii ikpowiil man. Di tiwanpeenkaan ni saak kuub na ki di peen ki li wii. Li san gonni man. Bi ga yoor nimi aawaal Milkom buen tinaagbiir ni, ki kpaan yoor laatotoorb ni laawaadabim mu.

Jeremia 7:29

“Jerusalem aanib, li wii ikpowiil man; kuu niyikpir ki di mee man. Gaa nkpolahn ŋigongon paab man, ba pu? min Uwumbɔr aaŋuul fii, le m yii maanib.

Esekiel 27:31

Aa pu le bi kuu biyikpir le ki pee tiwan ni saak kuub na. Bi wii, le bimɔi ti choŋ.

Esekiel 30:2

“Unibɔn, nabr ki moon min Dindaan Uwumbɔr aah len pu na. Aa teen ŋimɔbon ŋimina mpɔɔn pu ke: Ijawasakpiin aawiin mubaa choo,

Esekiel 7:18

Bi ga peen tiwan ni saak kuub na, le biwon gbaa tɔtɔk. Biyil ga li ye ŋiyikun la, le bi mɔmɔk ga ji inimɔɔn.

Liifai Yaab 13:40

Uja aayikpir yaa gui ugbangbataab bee uyigbeer kan, nima aan cha u ŋa tijɔŋdaan.

Liifai Yaab 21:5

“Utotoor ubaa taa kuu uyikpir, bee u chee ulangbaln, bee u gii uwon nibaa chee ke u wii ikpowiil.

Amos 8:10

M ga kpeln nimi aajim aayoonn ŋa ŋikpuu, ki kpeln nimi aamɔɔn aalahn ŋa inimbaalahn. M ga cha ni kuu nimi aayikpir ki peen tiwan ni saak kuub na, aan ki cha ni li naahn libibaal li kpo na aate ni una aah wii waakpuul pu na. Nwiin ngbaan daal ga li cho kina le ki ti saa mu aadoon.

Nkahm 21:28

N‑yoonn mubaa, Hesbonn aatiŋ ni, Sihonn aajab nan tun tijar ke mmii na, le ki bii Ar aatiŋ ki bi Moab aatiŋ ni na, le ki kuln ŋigongon ŋi bi Anonn Aamɔɔl aapaacham na.

Nkahm 21:30

Le n‑yoonn mue, baamaal bii doo, ki yoor Hesbonn aatim mɔmɔk, ki ti ker Dibonn aatiŋ, ki ki yoor Nasim aatiŋ ni, ki ti ker Nofa aatiŋ ki bi gbɔk Medeba aatiŋ na.”

Nkahm 32:3

“Uwumbɔr aah ter timi Israel yaab aan ti gaa lipepel limina, Atarof, ni Dibonn, ni Jaser, ni Nimra, ni Hesbonn, ni Eleale, ni Sibma, ni Nebo, ni Beonn aatim mu na ŋan tiwakor pam, le ti mu kpa tiwakor ti wiir sakpen na.

Nkahm 32:38

ni Nebo, ni Baal Meonn, bi nan kpeln kitiŋ kee aayimbil, ni Sibma aatim. Baah nan ki gir maa ntim ngbaan na bi nan kpeln mu aayimbil la.

Ikaal 14:1

“Ni ye Nidindaan Uwumbɔr aanib la. Nima pu na, nimi aanii yaa kpo kan, ni taa di kijuk gii niwon nibaa chee, ki mu taa kuu niyigbeer pu aayikpir lii, ke ŋinibol ŋiken aah ŋani pu na.

Ikaal 34:1

Moses nan nyan Moab aateer ni, le ki buen Nebo Aajool wɔb, ki ti jon Pisga Aajool li bi Jeriko aawipuul wɔb na. Lijool ngbaan paab, le Uwumbɔr nan mɔk u kitiŋ ngbaan mɔmɔk; u nan mɔk u Gilead aapepel mɔmɔk, ki yoor kina ki ti ker Dann aatiŋ, ŋŋangan wɔb,