2 Samuel 7:22 - Uwumbɔr aagbaŋ

²² Ndindaan Uwumbɔr, saapɔɔn nyaŋ sakpen. Ubaa aa ki bi ke sin na, ti puun nyi n‑yoonn mɔmɔk ke sin baanja le ye Uwumbɔr.

2 Samuel 7:22 ပူးပေါင်းရင်းမြစ်များ

2 Samuel 22:32

Uwumbɔr baanja le ye Tidindaan; Uwumbɔr baanja le ye u kii timi na.

1 Bibɔrb 8:23

le ki mee limeel ke, “Israel yaab Aadindaan Uwumbɔr, ubaa aa bi paacham, ni kitiŋ mɔmɔk pu ke sin na. Saanib yaa di bisui mɔmɔk kii tii si kan, le aa joo saah nan puu tipuur ti tii bi na, le ki mɔk bi saageehm.

1 Bibɔrb Aabɔr 16:25

Uwumbɔr aapɔɔn nyaŋ sakpen, le ni ŋan ke ti pak u sakpen; ti ga nyuŋ u ki taa ki nyuŋ ŋiwaa ma.

2 Bibɔrb Aabɔr 2:5

Timi Aawumbɔr aah jer ŋiwaa mɔmɔk na, m ŋa nlandak ke m maa Uwumbɔr Aadichakpaan la.

Ilahn 135:5

M nyi ke Uwumbɔr kpa mpɔɔn, u kpa mpɔɔn jer ŋiwaa.

Ilahn 145:3

Uwumbɔr kpa mpɔɔn, kina pu le ni ŋan ke ti pak u sakpen; waapɔɔn nyaŋ a.

Ilahn 44:1

Uwumbɔr, tiyaajatiib bui timi, le titafal ŋun saah nan tun ŋitukpaan ŋi baayoonn mu jer ki yunn na.

Ilahn 48:1

Uwumbɔr aapɔɔn nyaŋ sakpen, ni ŋan ke ti li pak u mbamɔm, waagongoln li bi chain na paab.

Ilahn 86:10

Saapɔɔn nyaŋ, le aa tun ŋitukpaan; sin baanja le ye Uwumbɔr.

Ilahn 86:8

Uwumbɔr, liwaal libaa aa bi ke sin na, ubaa aa kee ŋa tiwan ni aa ŋa na.

Ilahn 89:6

Uwumbɔr, ubaa aa bi paacham ki bi ke sin na; paacham yaab ubaa aaŋeen aatɔ aa ye si.

Ilahn 89:8

Tidindaan Uwumbɔr, Mpɔɔnsakpiindaan, ubaa aa bi ki kpa mpɔɔn ke sin na; Uwumbɔr, aa ŋani saah puu pu na mɔmɔk la.

Ilahn 96:4

Uwumbɔr aapɔɔn nyaŋ sakpen, le ni ŋan ke ti pak u sakpen; ti ga nyuŋ u ki jer dindatiib mɔmɔk.

Nnyam 10:2

le ni mu ga ŋmaa tuk nimi aabim, ni niyaabitiib, maah tun lijinjiir aatuln, ki cha Ijipt yaab kpaln bijɔrb pu na. Ni mɔmɔk ga bee ke min le ye Uwumbɔr.”

Nnyam 15:11

Uwumbɔr, lilawaal bi ke si na? Ŋma bi ke si na, aan saabimbin bi chain kina? Ŋma ba tee bi ki tun lijinjiir, ni ŋitun sakpiin ke saah tun pu na?

Nnyam 8:10

Ubɔr ngbaan nan bui ke, “Ni yaa fe woln kichakpiik ni kan, aa mee Uwumbɔr.” Le Moses bui u ke, “M ga ŋa saah ban pu na, nima kan, aa ga sil bee ke Uwumbɔr ubaa aa ki bi ki kpee Tidindaan Uwumbɔr ngbaan pu.

Nnyam 8:6

Nima pu na, Aaronn nan yoor waajaangbeek ngbaan paacham ki di mɔk nnyun ngbaan mɔmɔk, le ŋipulaatal nyan ni, ki gbiin kitiŋ ngbaan mɔmɔk ni.

Nnyam 9:14

N‑yoonn mue kan, maan ki daa saaninkpiib ni saanib ŋmeen aatafal, m ga daa aa mu aatafal kpee, nima kan aa ga bee ke ubaa aa ki bi dulnyaa wee ni ki kpa mpɔɔn ke min na.

Aisaya 40:18

Ti ga di Uwumbɔr ŋaŋ ŋma? Aa ga ŋa kinye ki mɔk waah bi pu na?

Aisaya 40:25

Ti ga di Uwumbɔr u bi chain na ŋaŋ ŋma? Ubaa ki bi ke uma na aa?

Aisaya 45:18

Uwumbɔr le naan kitaapaak, uma baanja le ye Uwumbɔr. Uma le ŋaŋ ki naan kitiŋ kee, u ŋa ki ki pɔɔ ki ga yunn pam. Waa nan ŋa ki kitiŋ ki bi yɔli kaa kpa nibaa na. U nan ŋa ki ke nin chee binib ga li koo na la. Uma le len ke, “Min le ye Uwumbɔr, uken aa ki bi ki kpee m pu.

Aisaya 45:22

Nimi binib bi mɔmɔk bi dulnyaa wee ni na, fenn gir ni m chee dandana aan ki ŋmar man. Min baanja le ye Uwumbɔr u bi na.

Aisaya 45:5

Min le ye Uwumbɔr, uken aa ki bi. Saa nyi mi; m mu tee ga tii si mpɔɔn mu aa ban na.

Esekiel 36:22

“Tɔ, di inaŋ i min Bidindaan Uwumbɔr joo tii bi na tuk bi ke: Maah ban m ŋa pu na aa ye nimi Israel yaab pu, maayimbil li ye chain aan ni jinn li inimɔɔn nin chee mɔmɔk ni buen na pu le m ban m ŋa.

Esekiel 36:32

Israel aanib, m ban ke ni li nyi ke naa ye nimi pu le m ŋani nimina. M ban ke ni ji inimɔɔn naah ŋani tiwan ni pu na la. Min Nidindaan Uwumbɔr le len kina.”

Daniel 2:45

Aa nan kan litakpal aah ker nyan ni lijool aamɔgbeln aan unii ubaa aa meeh li, le li nan yun tiwanaankaan ni bi di tikur, ni tikumann, ni tiyakr, ni tikunabr, ni salmaa naan ni na. Uwumbɔr u kpa mpɔɔn sakpen na bi tuk si tiwan ni ga ŋa n‑yoonn mu choo na la. M tuk si saah daŋ pu na ni taatataa mu chob la.”

Maika 7:18

Uwumbɔr, ubaa aa ki bi ke sin na; aa di cha pinn saanib bi ŋmar na aatunwanbir. Saa joo saaŋuul ni yunni, le ki tee gee ke aa mɔk timi ngeehm n‑yoonn mɔmɔk.

Ikaal 3:24

‘Ndindaan Uwumbɔr, m nyi ke aa piin ki mɔk mi saah ga ŋa tiwan sakpenn, ni iwaan aawan ni aa ban ke aa ŋa na. Liwaal libaa aa bi paacham, bee kitiŋ pu, ki ga ŋmaa ŋa tiwan sakpenn nimɔk aa ŋa na.

Ikaal 32:39

Min baanja le ye Uwumbɔr, ubaa aa ki bi; ŋiwaa ye nnyamɔn aawan la. Min le ga ku unii, min le ga tii unii limɔfal, min le tii unii iween, min le sɔŋni unii aaween, le ubaa aan ŋmaa kpak mi maatuln ni.

Ikaal 4:35

Uwumbɔr ubaa le mɔk nimi kina, ke u kpiir mɔk nimi ke uma Uwumbɔr baan baanja le bi, ubaa aa ki bi ki kpee u pu.

Ikaal 4:39

Nima pu na, teer din wee man, ki taa suln kpala ke Uwumbɔr le ye Uwumbɔr u joo paacham ni kitiŋ kee na. Uwumbɔr uken aa ki bi.

1 Samuel 2:2

Ubaa aa bi chain ke Uwumbɔr na; ubaa aa bi ke uma na, ukikiir ubaa aa bi ke timi Aawumbɔr na.