1 Tesalonika 4:16 - Uwumbɔr aagbaŋ

¹⁶ Ba pu? Tidindaan ubaa ga nyan ni paacham ki sunn ni. U yaa sunn ni kan, le ti ga ŋun nneel sakpiin, ni Uwumbɔr aatuuntiib aaninkpel aaneel, ni Uwumbɔr aakakaan aawiil.

UWONBƆR A GBƆNPƆŊ LIKƆƆNL

¹⁶ Uyudaan baan tɔɔl li nya papaab ki jiirin, ki nan sei bimɔb nin nkukɔ pɔɔn wee ti gbir malakam a ninkpelu a kukɔl nin Uwonbɔr a natun yinkaagin a mɔr, le bininfob ban nan gaa Yisa wee ki nin kpe-n li chinn fii nkumin.

1 Tesalonika 4:16 ပူးပေါင်းရင်းမြစ်များ

Ilahn 47:1

Binib mɔmɔk, faa ŋibambaan mpopiin pu man. Gaa ilahn mpɔɔn pu ki pak Uwumbɔr man.

Ilahn 47:5

Uwumbɔr jon kal waabɔrjal pu. Mpopiin aafuuk ni kakaan mam wii n‑yoonn mu Uwumbɔr cha paacham na la.

Nnyam 19:16

Nwiin tatar daal ngbaan aachakpiik ni, le utaal tar ki moor, le ntaalangbam mu bɔn chin chin na jɔnn lijool ngbaan pu, le bi ŋun kakaan aah wii sakpen pu na. Le binib ngbaan mɔmɔk aawon gbaa ki jii ijawaan pu.

Nnyam 20:18

N‑yoonn mu binib ngbaan nan ŋun utaal gben, ni kakaan aawiil, ki kan utaal moor, ni iŋmanyuu Sainai Aajool ngbaan pu na, le ijawaan chuu bi, le biwon gbaa, le bi san ti sil dandar.

Aisaya 27:13

Nwiin ngbaan daal yaa nan fuu ni kan, kakaan ga wii ki yin Israel yaab bi bi Asiria ni Ijipt aatim ni tinaagbiir ni na ke bi gir ni. Bi ga dan ki nan doon Uwumbɔr, Jerusalem aatiŋ ponn ni, waajool paab.

Joel 2:11

Uwumbɔr tar ke utaal na ki tuk waatɔb aajab baah ga ŋa pu na. Waajab bi kii tii waamɔb na wiir ki kpa mpɔɔn. Uwumbɔr aawiin ngbaan daal kan, ubaa aan li wii aan uŋeen aatɔ ka laa. Ubaa aan ŋmar nwiin ngbaan daal.

Sekaria 4:7

Ŋimuk ŋi filk ke ŋijoo na ga san cha si. Aa ga ki gir maa Maadichal; aa yaa ti di kookoo aatakpal di paan kan, le binib ngbaan ga teen mpɔɔn pu ke, ‘Kinyaan, kinyaan.’”

Sekaria 9:14

Uwumbɔr ga li bi paacham ki di ubaa mɔk waanib, u ga too waapiin ke utaal aah moor pu na la. Bidindaan Uwumbɔr le ga pii ukpiin; u ga li chuun titaabunn ti nyan ni ŋŋangii wɔb na ni la.

Sekaria 9:9

Li mɔɔni man, Sionn aanib, li mɔɔni man. Nimi Jerusalem aanib, li tar mpopiin pu man. Lik, nimi aabɔrkpaan choo ni chee la. U ye ubimbinyaandaan le ki joo linyaŋ choo, u sunn ubaa taab le ki dik ubon pu, u dik ubon u laa diin na pu la.

Nkahm 23:21

Maah kan pu na, Israel yaab aan kan tibɔbir, bee limukl libaa. Bidindaan Uwumbɔr bi bi chee; bi mooni ke u ye baabɔr la.

Matiu 16:27

Min Unibɔn Aabo ga fuu ni ki ga li kpa Nte Uwumbɔr aapɔɔn. Le Uwumbɔr aatuuntiib ga li dii mi. N‑yoonn ngbaan le m ga tii binib mɔmɔk lipal, baatuln aah ŋeer pu na.

Matiu 16:28

M tuk nimi mbamɔn la, binib bi si do na ponn ni bibaa aan kpo see bi puen kan min Unibɔn Aabo jin maanaan waahr.”

Matiu 25:31

“Min Unibɔn Aabo ni maatuuntiib ga fuu ni. Le m ga li kpa mpɔɔn sakpen ki kal maabɔrjal pu ke ubɔrkpaan na.

Matiu 26:64

Le Yesu bui u, “Ni ye saah len pu na. M tuk nimi la, n‑yoonn mu choo na, ni ga kan min Unibɔn Aabo ka Uwumbɔr aaŋangii wɔb, ki ga kan mi ntaalangbam ni paacham ki choo.”

Lituln 1:11

ki baa bi, “Galilee aanib, ba pu ni si lik paacham kina? Yesu, u Uwumbɔr nyan u ni chee buen paacham na, u ga gir ni. Ni kan waah buen pu na. Kina, le u ga nan ki gir ni.”

1 Korenti 15:18

Binib bi nan dii Yesu ki kpo na mu, ni mɔk ke bi mu bee yɔli.

1 Korenti 15:20

Tɔ, ni ye mbamɔn la, Uwumbɔr sil fikr Kristo nkun ni. Uma le ye njan aanii u puen fikr nkun ni na, le ki mɔk ke binib bimɔk kpo na mu ga nan fikr nkun ni.

1 Korenti 15:23

Kina le bi ga li paa tɔb pu. Kristo le ye njan aanii u puen fikr nkun ni na. U yaa gir ni kan, binib bi ye uyaab na mu ga fikr nkun ni.

1 Tesalonika 1:10

le ni kii bundaln Ujapɔɔn Yesu ga nyan ni paacham ki gir ni na. Uma le Uwumbɔr nan fikr u nkun ni. Uma le nyan timi ntafadaan mu choo na ni.

1 Tesalonika 3:11

M mee Tite Uwumbɔr ni Tidindaan Yesu ke bi tii timi nsan aan ti dan ni chee.

2 Tesalonika 1:7

ki tii timi ni nimi bi ji falaa na lifuur. Ti ga kan lifuur ngbaan bundaln Tidindaan Yesu ga nyan ni paacham ki mɔk waah bi pu na. U ni waatuuntiib ga nyan ni paacham ni mpɔɔn,

2 Tesalonika 2:1

Tinaabitiib, ti ban ke ti len ni chee ki joo cha bundaln Tidindaan Yesu Kristo ga gir ni ki nan kuun timi u chee na aabɔr la.

2 Piita 3:10

Tidindaan aawiindaal ga fuu ni ke unaayuk aah fuur ni pu na la. Liyaadaal ngbaan le paacham ga faa kifuuk sakpen ki jer. Mmii mu ton sakpen na ga donn paacham aawan mɔmɔk. Kitiŋ, ni tiwan nimɔk bi kitiŋ pu na mu ga gaa mmii.

Juud 1:9

Maikel u ye Uwumbɔr aatuuntiib aaninkpel na aa nan gee ke u sii kinimbɔŋ. U ni kinimbɔŋ nan kpak kinikpakpak Moses aawon pu, ke ulau ga yoor u. Maikel mu aa gee ke u sii kinimbɔŋ ki bii ki. U nan po bui ki ke, “Uwumbɔr li kae si.”

Tibɔkpiirkaan 1:10

Tidindaan aakpaakool daal le Uwumbɔr Aafuur Nyaan nan fir m pu. Le m ŋun nneel sakpiin len mpuwɔb ke kakaan na,

Tibɔkpiirkaan 1:7

Lik, u ga dii ntaalangbam ni ki dan. Binib mɔmɔk aanimbil ga kan u. Binib bi nan saa u na mu ga kan u. U pu, le ŋinibol ŋimɔk bi dulnyaa wee ni na ga wii. Ni ye mbamɔn la. Amii.

Tibɔkpiirkaan 14:13

Le m ŋun nneel len paacham ke, “Ŋmee ke: Bitekpiib bi nan dii Tidindaan na, waanyoor bi bi pu dandana wee ki joo cha.” Le Uwumbɔr Aafuur Nyaan kii ke, “Ni ye mbamɔn; ba pu? bi nan tun litunyaan linimaln. Baah kpo na, le bi fuur. Baah tun pu na mu dii bi.”

Tibɔkpiirkaan 8:13

Le m kan libɔrwiin laani paacham, ki ŋun li teen mpɔɔn pu ke, “Uwumbɔr aatuuntiib bitaa bi gur kaa kee pii baakakaan na yaa pii kan, tibɔbir sakpenn ga lir dulnyaa aanib pu.”

Tibɔkpiirkaan 8:2

Le m kan Uwumbɔr aatuuntiib bilole bi si Uwumbɔr aanimbiin ni na. Le bi tii bi kakaan tiib bilole.