1 Samuel 5:8 - Uwumbɔr aagbaŋ

⁸ Kina pu le bi nan tun yin ni Filistia aabɔrb biŋmu ngbaan nan kpaan, ki baa bi ke, “Ti ga ŋa Uwumbɔr Aakaal Aadakaa wee kinye?” Le bi bui ke, “Di u buen Gaf aatiŋ ni man;” le bi di u buen Gaf aatiŋ ponn ni, ki mu ki ye Filistia yaab aatiŋ kiken la.

1 Samuel 5:8 ပူးပေါင်းရင်းမြစ်များ

1 Bibɔrb Aabɔr 7:21

ni Sabad, ni Sutela. Efraim nan ki kpa mbijabim mulee ki kpee Sutela pu. Bima le nan ye Eser ni Elead. Bi nan ban bi su Gaf yaab aawakor le bi ku bi.

Amos 6:2

li cha ti lik man Kalne aatisakpeŋ na, ki buen man Hamaf aatisakpeŋ ki kpa mpɔɔn na, ki sunn buen Filistia yaab aatisakpeŋ Gaf chee. Mu aa ŋan ki jer Juda ni Israel aanaan. Le mu aatingbaan mu aa wiir jer nimi yoo.

Sekaria 12:3

Tɔ, n‑yoonn ngbaan yaa nan fuu ni kan, m ga cha Jerusalem nyuŋ ke litakpal sakpeln na. Le litimbol li pɔɔn libaa ke li yoor li na kan, li kan titotonn. Dulnyaa aatimbol mɔmɔk ga kuun nan kpaan ke ŋi tak Jerusalem.

Josua 13:3

ki kpee Afim yaab aatiŋ ki bi ŋŋangii wɔb na. (Kitiŋ ki dɔ Sihor aabun chee, ki bi Ijipt yaab aatiŋ aanaanmɔk na, ki yoor ti ker ŋŋangan wɔb, Ekronn aatiŋ mɔk na ye Kanaann yaab aatiŋ la; Filistia yaab aabɔrb le nan bi Gasa, ni Asdod, ni Askelonn, ni Gaf, ni Ekronn aatim ni.)

Josua 15:11

Kitiŋ ngbaan aanaanmɔk ki yoor kina, ki dii buen ligongoln li bi Ekronn aaŋangan wɔb na, ki fenn kpaa Sikeronn, ki dii Baala Aajool aataab, le ki ti ker Jamnia aatiŋ, ki nan ti doo Kaasisik ni Aanyusakpem chee la.

1 Samuel 17:4

Bi nan yin Filistia aaja ubaa ke Goliaf, u ye Gaf aanii na, le u nyan ni Filistia yaab aakakaa ni, ki nan kpak Israel yaab ki mɔk bi waapɔɔn. U nan ye liwɔkl, le ki fɔk ti nyaŋ,

1 Samuel 17:52

Israel aajab ni Juda aajab nan faa ikaa le ki san dii bi. Bi nan dii bi ti nyan Gaf ni Ekronn aatim aabisamɔi. Filistia yaab nan kan titotonn ki kpoi nsan mu cha Saarayim aatiŋ ni na, ki ti saa Gaf ni Ekronn aatim ni.

1 Samuel 29:6

Nima pu na, Akis nan yin David le ki bui u ke, “M puu Israel yaab Aawumbɔr u bi n‑yoonn mɔmɔk na ke aa kii tii mi mbamɔm, le ni ba ga li mɔ mi ke ni dii mi buen ki ti jan butɔb bue ni. Saah fuu ni do bundaln ki nan saa din wee na, maa kan saataani ubaa m ga ŋmaa di galn si. Tɔ, bibɔrb biken na aa kii tii si.

1 Samuel 5:11

Le bi ki gir yin Filistia aabɔrb biŋmu na ki nan bui bi ke, “Giin man Israel yaab Aakaal Aadakaa buen waabuul ni, aan u taa ku timi ni timi aadichal ni yaab.” Ijawaan nan bi kitiŋ ngbaan mɔmɔk ponn ni; ba pu? Uwumbɔr nan bi dar bitafal sakpen.

1 Samuel 5:7

Baah kan tiwan ni bi ŋani bi na, le bi bui ke, “Israel yaab Aawumbɔr le bi dar timi ni timi aawaal Dagonn aatafal. Taan ki cha Waakaal Aadakaa ngbaan li bi do.”

1 Samuel 6:2

le binib ngbaan yin ni bitotoorb, ni binib bi joo inyɔk tun lituln na, ki nan baa bi ke, “Ti ga ŋa Uwumbɔr Aakaal Aadakaa ngbaan kinye? Ti yaa di u ke ti di giin waah nyan ni nin chee na kan, ti ga di ba kpee u pu ki di u giin?”