1 Bibɔrb 8:9 - Uwumbɔr aagbaŋ

⁹ Moses aah nan di ŋitakpapapan ŋi ŋa u ponn ni, Sainai Aajool chee na baanja le bi Uwumbɔr Aakaal Aadakaa ngbaan ni, nibaa aa nan ki bi u ni ki kpee ŋi pu. Israel yaab aah nan nyan ni Ijipt aatiŋ ni, aan Uwumbɔr puu tipuur tii bi na, le Moses nan di ŋi ŋa u ponn ni.

1 Bibɔrb 8:9 ပူးပေါင်းရင်းမြစ်များ

1 Bibɔrb 8:21

M ki di Waakaal Aadakaa u ŋitakpapapan ŋilee na bi u ni na di siin Waadichal ngbaan ni. Ŋitakpapapan ngbaan pu le bi nan ŋmee kimɔbaan ki Uwumbɔr ni tiyajaatiib nan ŋa buyoonn uma Uwumbɔr nyan ni bi Ijipt aatiŋ ni na.”

2 Bibɔrb Aabɔr 5:10

Ŋitakpapapan ŋilee ŋi Moses nan gaa Sainai Aajool paab ki di ŋa u ponn ni na baanja le nan bi Nkaal Aadakaa ngbaan ni, nibaa aa nan ki bi u ni ki kpee. Israel yaab aah nan nyan ni Ijipt aatiŋ ni aan Uwumbɔr ni bima nan ŋa kimɔbaan Sainai Aajool chee na, le Moses nan ŋmee kimɔbaan ngbaan ŋitakpan na pu ki di ŋi ŋa Dakaa ngbaan ponn ni.

2 Bibɔrb Aabɔr 5:9

Unii yaa nan si Chain Chain Aapepel ngbaan aabisamɔb chee kan, le u ga li waa idɔ ngbaan aajuu aah kpii ni pu na, naa ye kina kan, saan li waa i. Idɔ ngbaan beenin bi nima din wee.

Nnyam 13:21

Nwiin pu kan, Uwumbɔr nan bi ntaalangbam ni, le ki loln binib ngbaan pu nsan, le kinyeek kan, u bi mmii ni, ki wiin bi pu, nima kan, bi ga ŋmaa li chuun nwiin pu ni kinyeek.

Nnyam 14:24

Naah ti chaa woln ni na, le Uwumbɔr bi ntaalangbam ni, mmii ponn ni, le ki lik waa Ijipt yaab aajab, le ki cha ijawaan chuu bi.

Nnyam 16:10

Aaronn aah bui bi kina na, le bi mɔmɔk fenn binimbil toŋ nteersakpiin wɔb, le libuul ngbaan ni Uwumbɔr aajinjiir aawiihn na nyan bi chee ntaalangbam ni.

Nnyam 16:33

Moses nan bui Aaronn ke, “Ban kichichibik, ki lee mana aajikaar ti ga gbiin kuruwaa ubaa na aan ki di ŋa ki ponn ni, ki di ti siin Uwumbɔr aanimbiin ni, aan tiyaabitiib mu nan kan ti.”

Nnyam 25:16

aan ki di ŋitakpapapan ŋilee ŋi ikaal kipiik i m ŋmee paan ŋi pu na di ŋa dakaa ngbaan ni.

Nnyam 25:21

Ni di ikaal aatakpal ŋilee na ki di ŋa dakaa ngbaan ni, aan ki di libiil ngbaan biin.

Nnyam 40:20

Le u di ŋitakpapapan ŋilee na ki di ŋa Uwumbɔr Aakaal Aadakaa ni. U nan di ŋidabil na ki di bɔn ibuen i dab baa dakaa ngbaan pu na, li ki di waabiil biin u pu.

Esekiel 10:4

Nwiihn mu deer ŋinimbil ki mɔk ke Uwumbɔr bi nima chee na nan fii tiwan ni kpa ifeen ngbaan na chee ki ti sil Uwumbɔr Aadichal aabisamɔb chee. Ntaalangbam na nan ti gbiin Lidichal ngbaan, le lichiln ni mɔmɔk woln chain.

Liifai Yaab 16:2

le Uwumbɔr len Moses chee ke, “Bui aakpel Aaronn ke u taa li koo Chain Chain Aapepel ni, nin chee likekeln gii Libool ngbaan ni na yɔl yɔl, see n‑yoonn mu u ga koo ni ponn ni na ti fuu, ba pu? nima chee le m bi ntaalangbam ni, Maakaal Aadakaa aabiil aapaacham. U yaa yii ki koo kan, u ga kpo.

Nkahm 17:10

Uwumbɔr nan bui Moses ke, “Di Aaronn aadabil giin ti bil Maakaal Aadakaa taab. Li ga li dɔ nima, ki ye nsurm ki tii Israel yaab bi yii mi na, ke bi yaa kaa di cha baah len tibɔr ti kaa ŋan na kan, bi ga kpo.”

Nkahm 9:15

Nwiin mundaal bi gaa Uwumbɔr Aabool doo na, le ntaalangbam dan nan biin li pu. Kinyeek kan, mu nan bi ke mmii na la.

Ikaal 31:26

“Yoor man kigbaŋ ki Uwumbɔr Aakaal bi ki ponn ni na, ki di bil gbaŋ Nidindaan Uwumbɔr Aakaal Aadakaa, aan ki li bi nima ki ye seeraa ki tii waanib.

Ikaal 4:13

U nan tuk nimi naah ga ŋa pu aan ki li joo waah nan puu tipuur ti tii nimi na pu na; ke ni pɔɔn nibaa ki kii tii ikaal kipiik i u nan ŋmee paan ŋitakpal ŋilee pu na.

Hiibru Yaab 9:4

Salmaa aatork aabimbiln nan bi ni ponn ni. Libimbiln ngbaan paab le bi seer tulalee aayon tii Uwumbɔr. Uwumbɔr aakaal aah nan bi dakaa u ponn ni na, mu nan bi ni ni. Bi nan di salmaa aakur le biin dakaa ngbaan pu. Tijikaar ti bi yin ti ke mana na, nan bi salmaa aasambil ponn ni, dakaa ngbaan ponn ni. Aaronn aadabil li nan ŋeen nsupuun na mu nan bi u ponn ni. Uwumbɔr aakaal aah nan ŋmee ŋitakpapapan ŋilee ŋi pu na, mu nan bi u ponn ni.

Tibɔkpiirkaan 15:8

Le Uwumbɔr aanyuŋ ni waapɔɔn cha iŋmanyuu gbiin waadichal. Ubaa aa ŋmaa koo lidichal ngbaan ni ki nan saa buyoonn falaa bilole bi Uwumbɔr aatuuntiib bilole joo ni bi na ga pii dulnyaa ni aanib ki doo na.