Sabi 5:3 - Hdi

³ Ka i Musa nda Haruna mantsa: « Marava mara Lazglafta la Hebru da aŋni. Kdəkkdək, zliŋnis zla ka dzaʼa ŋni da mbaɗa ka fitik hkən ma mtak, ka planata ŋni ta ghəŋ ta Yawe, Lazglafta ŋni, kada kwala tsi ta vzaŋnaghatá zləmnda, ka kafay a tsi, » ka həŋ.

Sabi 5:3 ပူးပေါင်းရင်းမြစ်များ

2Mgh 17:25

Tsaw ma fitika zlrafta taŋ ta nzata hada, tsəlɓa a həŋ ta tsəlɓu ŋa Yawe wa. Ka ghunadaghatá Yawe ta rveriha dika həŋ, ka pslatá ndəghata mnduha mataba taŋ.

2Rus 30:8

Ma təŋanaf kuni ta ghəŋ manda ŋa dadaha ghuni! Vlaŋwa vla ta ghəŋa ghuni ta Yawe, vragaghawa vra da vla ni nda ghuɓa, vli ya faghu tsi ŋa ɗekɗek. Maganawa maga ta slna ta Yawe, Lazglafta ghuni, ŋa mbəɗaghuta gufatá ŋuɗufa ni katakata ta vgha nda kaghuni.

Izra 7:23

Inda skwi dzaʼa mnata Lazglafta ta luwa, ta nghanatá həga ni, magata manda va tsaya. Kada kwala ɓasa ŋuɗufa Lazglafta ta luwa lanaghatá vla ga mghama ɗa, nda zwana ɗa tani.

Sabi 3:18

Dzaʼa sna sna həŋ ta gwaɗa gha. Ŋa sliʼafta gha kawadaga nda tsa la galata mnduha la Israʼila ya slanaghatá mghama Masar. Ka kuni dzaʼazlay nda tsi na: “Yawe, Lazglafta la Hebru, ta guyata nda aŋni. Ndanana ta ndəɓa dzvu ŋni da kagha, zlaŋna zla ka dzaʼa ŋni za fitik hkən ta mbaɗa ma mtak, da planatá ghəŋ ta Yawe, Lazglafta ŋni.”

Sabi 7:16

Ka ka dzaʼazlay nda tsi mantsa: “Yawe, Lazglafta la Hebru, ta ghunaktá iʼi da kagha. Kaʼa na: Zliŋ zla ta mnduha ɗa ka dzaʼa həŋ da tsəlɓu ŋa ɗa ma mtak,” kaʼa, ama ha gita ka kwalahutá ka ta snata.

Sabi 8:1

Ka Yawe nda Musa mantsa: « Mnana mna ta Haruna, ka tɗapta tsi ta dzvu ka fadaptá dafa ni ta ghəŋa zalaha, nda ghwaha, nda drəfha, ŋa sliʼaganapta kləŋha təɓsaʼ ta haɗika Masar, » kaʼa.

Sabi 8:20

Ka magatá Yawe manda va ya mna tsi. Ka sliʼadaghata zuɗiha tuvulvulvul bəɗukw da həga ga Firʼawna, nda ya da həga kwalvaha ni, nda ya ta haɗika Masar demdem. Ka ɓadzanatá tsa zuɗiha ya ta vli katakata ta haɗika Masar.

Sabi 8:27

Ka magatá Yawe manda ya ɗawaŋ Musa da tsi, ka zlanatá tsa zuɗiha tuvulvulvul ya ta Firʼawna, nda kwalvaha ni tani, nda mnduha ni tani. Haɗ zuɗi ta pɗata dər turtuk wa.

La Levi 26:25

Dzaʼa ghungaghunagha ghuna yu ta kafay ŋa plamta dzratá wa ɗa nda kaghuni ɓlanap kuni. Ɗifaghu kuni ma luwa ghuni, dzaʼa ghundaghunagha ghuna yu ta zləmnda ŋa vlatá kaghuni ma dzva ghumaha ghuni.

Vrafta ta zlahu 28:21

Dzaʼa favagha fa Yawe ta zləmnda, ha ka zaɗaghunata ni ta tsa haɗik dzaʼa lam kuni dida ŋa nzakwa ni ka ŋa ghuni ya.