Sabi 13:12 - Hdi

¹² ka faghuta kuni ŋa Yawe ta inda zumali yaga lu nda ya. Inda dugzum, nda maŋazak, nda lghəŋ ka zumali mataba rina ghuni guli ná, ŋa Yawe həŋ.

Sabi 13:12 ပူးပေါင်းရင်းမြစ်များ

Nəhemiya 10:36

Inda vaku, dzaʼa hlakta ŋni da həga Yawe ta taŋtaŋa yakwa inda skwi hva ŋni nda hva, nda taŋtaŋa yakwa inda fuha ŋni.

Nəhemiya 10:37

Dzaʼa hlak hla ŋni ta zumaliha mataba zwana zgwana ŋni, nda ŋa riniha ŋni, manda ya nda vinda ma zlahu. Dzaʼa hlak hla ŋni ta zumala slaha ŋni, nda rina fisik da həga Lazglafta mu, ŋa vlaŋtá gwal ta dra skwi ŋa Lazglafta ma həga Lazglafta mu.

Sabi 13:1

Ka Yawe nda Musa mantsa:

Sabi 13:2

« Faghu fa ŋa ɗa ta inda zumali. Zumaliha yayaga lu mataba la Israʼila, dər mndu tsi, dər rini a tsi, ŋa ɗa həŋ demdem, » kaʼa.

Sabi 22:28

Ma gərɗana kuni ta klaɗiktá mayaka ɗa ma skwiha ta tska kuni ta vwah, nda ima inaba ghuni. Dzaʼa vliha vla kuni ta zumaliha mataba zwana zgwana ghuni.

Sabi 22:29

Mantsa ya guli dzaʼa maga kuni nda taŋtaŋa zwaŋa sla, nda rina fisik, dzaʼa zlana zla lu ka fitik ndəfáŋ mista ma ni, baɗ matghasa fitik ya, dzaʼa vliha vla kuni.

Sabi 34:19

Inda zumali ka zgun ná, ŋa ɗa ya, nda zumali ya lu mataba rina ghuni, dər ŋa sla tsi, dər ŋa rina fisik tsi, ŋa ɗa ya.

Sabi 34:20

Ama inda zumala kəɗih ya, varata ghuni nda rina fisik. Ka vara a kuni wu, dzuŋta ghuni ma warga ka dzata. Zwana zgwana ka zumali mataba mnduha ghuni ya, varata ghuni nda vara. Haɗ kuni dzaʼa sagha ta kəma ɗa nda dzvu bətbət.

La Levi 27:26

« Ama laviŋta a dər wati ma mndu ta fata ka ŋa Yawe ta zumala rini, kabga inda zumala sla, nda ŋa rina fisik ná, nda ghada nzakwa ni ka ŋa Yawe.

Mbsak 18:15

Inda zumaliha mndu, nda inda zumaliha rini ta hlakta lu ŋa Yawe ná, ŋa gha tsaha ya guli. Ama nziya nza tsi ná, ka tsuʼa ka ta skwa vara inda zumaliha ka zgwana, ka tsuʼa ka ta skwa vara inda zumaliha rini ya ta tsaɗ lu.

Mbsak 3:12

« Wya hlaf hla vərɗa iʼi mataba la Israʼila ta la Levi ma vla inda zumali ta tagatá mndər ma inda la Israʼila. La Levi ná, ŋa ɗa həŋ,

Mbsak 3:13

kabga inda zumali ná, ŋa ɗa həŋ. Baɗ dzuŋta ɗa ta inda zumaliha ma haɗika Masar ná, pghawu pgha yu ŋa ɗa ta inda zumali ma Israʼila, nda ŋa mndu tani, nda ŋa rini tani, ŋa ɗa həŋ. Iʼi ná, Yawe yu! » kaʼa.

Mbsak 8:17

Inda zumali mataba la Israʼila ná, ŋa ɗa həŋ, nda ŋa mnda səla tani, nda ŋa rini tani. Baɗ pslata ɗa ta inda zumaliha ma haɗika Masar ná, pghaghu pgha yu ta hahəŋ ka ŋa ɗa.

Lukwa 2:23

Manda ya nda vinda ma deftera Lazglafta kazlay: Inda zumali ka zwaŋa zgun ná, ŋa Lazglafta ya kəʼa ya.

Vrafta ta zlahu 15:19

« Inda taŋtaŋa zwaŋa sla, nda inda zwana rina fisik ka zgun ta yata ga ghuni ná, fanata ghuni ta tsaya ta Yawe, Lazglafta ghuni. Yaha kuni dá maga slna ma vwah nda taŋtaŋa zwaŋa sla ghuni, yaha kuni da gatsa swida taŋtaŋa zwaŋa tuwaka ghuni.