Mata 6:10 - Hdi

¹⁰ Ka sagha sa fitika ga mghama gha, ka maga ka ta skwi ta kum ka ta haɗik, manda ya ta magaku ta luwa.

Mata 6:10 ပူးပေါင်းရင်းမြစ်များ

Nəhemiya 9:6

Kagha turtukwa gha Yawe! Kagha ta zlagigiŋtá luwa, luwa ta ghəŋa luwa nda inda skwiha tida tani. Kagha ta zlagigiŋtá haɗik nda inda skwiha mida tani. Mantsa ya drəfha guli nda inda skwiha mida. Kagha ta famtá hafu ma inda tsa skwiha ya. Ta tsəlɓu inda skwiha ta luwa ta kəma gha.

Danyel 2:44

Ma tsa fitik dzaʼa gə tsa mghamha ya ta mghama taŋ ya, dzaʼa fafta Lazglafta ta luwa ta ga mgham ya dzaʼa kwal kul zaɗavata ɗekɗek. Haɗ tsa ga mgham ya dzaʼa walaŋta laghu nzakway mista sana mndəra mndu wa. Dzaʼa huʼanap huʼa ta inda tsa ga mghamha ya, ŋa zaɗanata ni ta həŋ. Ama tsatsi, dzaʼa gɗava gɗa ŋa kɗekedzeŋ.

Danyel 7:13

Ka nghə yu manda skwi ma suni girviɗik, ta sana skwi manda mnda səla, ta saha ma ghwayak ta luwa. Ka lagha tsi da tsa mndu daga bamma ya, ka kladaghatá lu da tsi.

Danyel 7:27

ŋa nzakwa ga mgham, nda mbraku, nda glakwa inda ga mghamha ta ghəŋa haɗik, ka ŋa mnduha nda ghuɓa ka ŋa Lazglafta Dagala. Dzaʼa gɗava gɗa ga mghama tsa mndəra mndu ya ŋa ɗekɗek. Dzaʼa snay inda ga mgham ta gwaɗa da tsi, ka maganatá slna.”

Mata 12:50

Dər wati ma mndu ta maga skwi ya kumaŋ Da ɗa ta nzakway ta luwa ná, tsa mndu ya ta nzakway ka zwaŋama ɗa, nda makuma ɗa, nda ma ɗa, » kaʼa.

Mata 16:28

Kahwathwata ka yu ta mnaghunata ná, haɗ sanlaha mataba na gwal hadna na dzaʼa rwuta kul nghaŋtá həŋ ta sagha Zwaŋa mndu ma ga mghama ni wa. »

Mata 26:42

Ka zəgladaptá tsi dawʼ ka mahis, ka ndəɓəgəltá dzvu, kaʼa mantsa: « Da ɗa, ka va a ka ta diʼiŋaghuta na leghwa ghuya ɗaŋwa na nda iʼi wu katsi, ka nda nza tsi ŋa say ɗa ná, ka maga tsi manda ya kumaŋ ka, » kaʼa.

Mata 3:2

« Mbəɗanafwa mbəɗa ta nzakwa ghuni, kabga ndusa ga mghama Lazglafta ka sagha, » kaʼa.

Mata 4:17

Daga ma tsa fitik ya zlrafta Yesu ta mna gwaɗa, kaʼa mantsa: « Mbəɗanafwa mbəɗa ta nzakwa ghuni! Ndusa ga mghama Lazglafta ka sagha! » kaʼa.

Mata 7:21

« Inda gwal ta mnay kazlay: Mghama ɗa, Mghama ɗa! kəʼa a dzaʼa lami da ga mghama ɗa wa. Ba mndu ya ta maga skwi ta kum Da ɗa ta nzakway ta luwa kweŋkweŋ dzaʼa lami.

Markus 11:10

Ka tfanagha tfa Lazglafta ta wi ta ga mgham ta sagha, ga mghama Dawuda ta nzakway ka da ŋni! *Glaku ŋa Lazglafta ta luwa! » ka həŋ.

Markus 3:35

kabga inda mndu ta maga skwi manda ya ta kum Lazglafta, tsaya zwaŋama ɗa, tsaya makuma ɗa, tsaya ma ɗa, » kaʼa.

Lukwa 19:11

Tata snay snay həŋ ta tsa skwi ya, ka sganaghatá *Yesu ta mahdihdi kabga ndusanavatani ta luwa Ursalima. Guli ná, zlah gi dzaʼa zlagap zlaga ga mgham Lazglafta, ka mnduha ta ndanay.

Lukwa 19:38

« Ka tfanagha tfa Lazglafta ta wi ta Mgham ta sagha ma hga ni. Zɗaku ta luwa, glaku ŋa Lazglafta ta luwa nda gaftək, » ka həŋ.

Lukwa 22:42

« Da! Ka má ta kumay ka, klaghu kla ta na ghuya ɗaŋwa na ta ghəŋa ɗa! Tsaw yaha da nzaku manda ya ta kum iʼi, ka nza tsi manda ya ta kum kagha, » kaʼa. [

Yuhwana 4:34

Ka Yesu nda həŋ mantsa: « Maga skwi ta zɗəganatá mndu ya ta ghunigihata ka kɗinistá slna ni, skwa zaya ɗa.

Yuhwana 6:40

Wya skwi ta kum Da ɗa, dər wati ma mndu ta nghaŋtá zwaŋ ka zlghaftá tsi, nda mutsa hafa ni ŋa kɗekedzeŋ. Dzaʼa sliʼaganapsliʼa yu baɗu kɗakwa ghəŋa haɗik, » kaʼa.

Yuhwana 7:17

Ka fa fa mndu ta ghəŋa ni ka maga skwi ta kum Lazglafta, dzaʼa nda sna ka ta sagha da Lazglafta na skwi ta tagh yu na tsi, ka ta klaʼata ma ghəŋa ɗa a yu.

Slna gwal ghunay 13:22

« Ka mbəɗanatá Lazglafta ta hul ta Sawul, ka mbəɗanamtá ga mgham ta Dawuda ta ghəŋa taŋ. “Slaf sla yu ta Dawuda, zwaŋa Yesay. Zɗəgiha zɗa, dzaʼa magay ta inda skwi ya ta kum ŋuɗufa ɗa,” kaʼa.

Slna gwal ghunay 21:14

Na tsa trapta ŋni mida ya ná, ŋəvglaŋ a aŋni guli wa. « Ka maga Mgham Yesu ta skwi ya kumaŋ tsi, » ka aŋni ta ghəŋa ni.

Slna gwal ghunay 22:14

Ka Hananiya nda iʼi guli mantsa: “Zbuzba Lazglafta dzidzíha mu ta kagha daga ghalya ŋa snaŋtá skwi ta kum tsi, ŋa nghaŋta gha ta tsa tɗukwa mndu ya, ŋa snaŋta gha ta gwaɗa vərɗa tsatsi nda wa ni.

La Ruma 12:2

Ma ksə kuni ta saɗa mnduha ma na ghəŋa haɗik na, zlaŋwa Lazglafta ka mbəɗaghunafta tsi ta ndana ghuni ka lfiɗ, kada laviŋta kuni ta tsatsaftá skwi ta kum Lazglafta, skwi ya ta ɗinuta, ta zɗəganata, ta payuta.

Afisus 6:6

Ta wa ira taŋ kweŋkweŋ yeya a dzaʼa maga kuni manda gwal ta zba rfanaghata mnduha ta həŋ wa. Magawa maga ta inda slna ghuni nda ŋuɗuf turtuk manda ya ta kum Lazglafta, kabga kwalva Kristi kaghuni.

Kwalus 1:13

Tsatsi ta hlaptá amu ma dzva mbrakwa grusl, ka hladamamta da ga mghama zwaŋa ni ya ɗvu tsi.

Kwalus 1:9

Tsaya tama, manda kɗakwa ŋni ta snaŋtá gwaɗa ta kaghuni, zlana a ŋni ta maga duʼa ta ghəŋa kaghuni, ŋa ndəghaghunaftani nda hiɗaku, nda ɗifil ya ta vlə Sulkum wa. Tsaya dzaʼa kəl kuni ka snaŋta ta skwi ya ta kum tsatsi,

1Tes 4:3

Skwi ya kum Lazglafta ná, nzata ghuni hezleʼ a ta kəma ni kul haɗ hliri.

1Tes 5:18

Rfanaghawa Lazglafta dər ta ghəŋa wati ma skwi tsi, kabga tsaya skwi ŋa magay ghuni ta zɗəganatá Lazglafta, na tsa kaghuni gwal nda ndiʼa nda *Yesu *Kristi ya.

Hebru 1:14

*Duhwalha Lazglafta ná, sulkumha ta maganatá slna ta Lazglafta, ta ghwanu lu ta həŋ ŋa kataŋtá gwal ta nzakway ŋa mutsa mbaku ya.

Hebru 10:36

Skwi ya ta raghunata ná, nzata ghuni nda suʼay, ka maga skwi ya ta zɗəganatá Lazglafta, ŋa vlaghunata ni ta skwi ya taghunaf tsi ta imi ta sləməŋ.

Hebru 10:7

Ka yu mantsa: “Wana yu Lazglafta, sasa yu ta ghəŋa haɗik da maga skwi ya ta kum ka, manda ya nda vinda ta ghəŋa ɗa ma deftera zlahu,” » kaʼa.

Hebru 13:21

Ka vlaghuna vla Lazglafta ta mbrakwa maga inda skwi ɗina, ŋa magay ghuni ta skwi ya ta kum tsi. Ka maga tsi ma amu ta skwi ya ta zɗəganata nda ma Yesu *Kristi ta nzakway ŋa ni glaku ŋa kɗekedzeŋ ya. *Amin!

1 Piyer 2:15

Kumaŋ kuma Lazglafta ta magay ghuni ta skwi ɗina, ŋa hanaftá wi ta gwal kul snaŋtá skwi, ta gutá rgha taŋ.

1 Piyer 4:2

Ma na pɗakwa fitik ŋa zay ghuni nda hafu ta na ghəŋa haɗik na ná, nzawa nza ta nzaku manda ya ta zɗəganatá Lazglafta, manda ya ta haraʼu sluʼuvgha ya a wa.

Suna Yuhwana 11:15

Ka vyata mandəfáŋa duhwala Lazglafta ta ŋa ni ma duli. Ka snaku sana lwiha dagala dagala daga ta luwa. Ka həŋ mantsa: « Mgham Lazglafta ŋni nda Kristani ta ga mgham ta ghəŋa haɗik ndana. Tsatsi dzaʼa ga Mgham ŋa kɗekedzeŋ, » ka həŋ.

Suna Yuhwana 12:10

Ka snaŋtá yu ta sana lwi ta luwa ta gwaɗata nda mbraku, kaʼa mantsa: « Ndana tama, mbamaf mba Lazglafta, maraŋ mara ta mbrakwa ni. Tsatsi ta ga Mgham. Maraŋ mara Kristi ta ŋa ni ma mbraku guli, kabga sliŋwigiŋtani ta haɗik ta mndu ya ta gɗata ta nana zwana ma mu. Tsatsi ya ta gɗata ta wula zwana ma mu ta kəma Lazglafta mu nda fitik tani nda rviɗik tani.

Suna Yuhwana 19:6

Ka gi snaŋtá yu ta sana lwi manda lwa tskata mnduha, ta ghudzagata manda zala dagala ma ghwa, ta ŋəzlu manda ŋəzla luwa ta ghudzagata nda mbraku. Kaʼa mantsa: « Zləzlvawa Lazglafta! Mghama mu Lazglafta ta mbruta, tsatsi ta ga Mgham.

Suna Yuhwana 20:4

Tahula tsa guli, ka nghaŋtá yu ta dughurukha. Ka vlaŋtá lu ta mbrakwa tsa guma ta gwal ta nzaku tida. Ka gi nghaŋtá yu ta hafa gwal ɗatsaghu lu ta ghəŋa taŋ ta ghəŋa vəl mna gwaɗa Yesu nda ya ta ghəŋa gwaɗa Lazglafta. Hahəŋ ná, tsəlɓaŋ a həŋ ta tsəlɓu ŋa tsa nimtak ya nda ya ŋa skwa wuyay ni tani wa. Haɗ ŋizla ni ta kuma taŋ nda ya ta dzvuha taŋ wa. Ka vramtá həŋ, ka gə həŋ ta mgham kawadaga nda Yesu Kristi ka vaku dəmbuʼ.