Zwana ma ɗa, ma nzakwa ndiʼatá vgha mu ma *Yesu Kristi nda ya ma ɗvu ya ta vlamata Sulkum ná, ta ndəɓa dzvu yu da kaghuni ŋavawa ŋa kawadaga nda iʼi ma maga duʼa da Lazglafta ŋa katihata.
Ka kata kuni ta aŋni nda maga duʼa. Ka nda ndəgha gwal ta maga duʼa da Lazglafta ta ghəŋa aŋni katsi ná, dzaʼa nda ndəgha gwal dzaʼa rfu ta ghəŋa ni guli tsuʼafər Lazglafta ta tsa duʼa taŋ ya.
Magawa duʼa guli ta ghəŋa aŋni, kada gunaŋnaŋta Lazglafta ta wa tgha ŋa mnanaŋta gwaɗa ni ta mnduha, mnanaŋha ŋni ta ɗifatá skwa *Kristi guli ta həŋ. Tsa vəl magay ɗa ta ɗifatá skwa Kristi ya kəl lu ka hbamtá iʼi.
Mantsa, ta ɗaway yu ta payiɗifta gha ta dzuguvi guli. Ta grafta yu ná, dzaʼa tsuʼaf tsuʼa Lazglafta ta duʼa ghuni ŋa vlihatani ta tvi ŋa ɓhadaghata ɗa da kaghuni.
