Zuize 8:3 - ꞌRe Ihâimana Uꞌâsi Mono Zadawa Wasuꞌu

³ 'Re ihâimana u'âsi mono, midiãnita norĩ ma i'rãnho'u, Orebe norĩ, Ze'ebehe me ma tô aima za'ra wa'aba hâiba nhomri zahuré. Ãne wa, e marĩ, wa tô bété wa hã 'manha, asimi'manharĩ za'ra wa'aba zé ma ipire hã. Baba di. Tawamhã ãne na Gidiã te te tãma nharĩ za'ra wa, ma tô Efraĩhĩ nhihudu si'aibâ norĩ hã suru na ti'rãiwahâ za'ra.

Zuize 8:3 ပူးပေါင်းရင်းမြစ်များ

Salmu 44:3

Wahi'rata norĩ hã sib'ézé i'wa pa nai õ di, ti'a te te siwi dawi i'âri hã. Duré tinhiptete nai õ di, te te da'ãma i'ai'uté za'ra hã. Ta norĩ hã aiwaihu'u pese na si, duré asiptete na si duré ai'ãma rowa'a na si ma tô da'ãma ai'uté za'ra. Ãne zarina, ma tô a hã asimizawizé hã ãma ihâi'ré za'ra.

Provébiu 15:1

'Re dazahi za'ra mono nherẽ, damreme wẽ na da te ãma 're idazada'âbâ za'ra mono zé hã, te za atãma na dahâimanazéb u hã dawi ãma saprĩ ni. Tazahã, damreme tete na dazada'âbâzé hã te za dazahi hã ãma dama hâimo ni.

Provébiu 16:32

Iwa'ro su'u õ norĩ hã wẽ uptabi di, isib'ru norĩ, isiptete norĩ nhipai u. Duré 'ri ahâ ãma da te 're i'ai'uté mono zém nhipai u, marĩ da te 're 'manharĩ za'ra mono tõ da, dasiwi 're idanhimi'rãmi za'ra mono zé hã wẽ uptabi di.

Provébiu 25:11

Damreme iwẽ hã aiwa bâtâ uwaibaba na da te dama 're iroti za'ra mono zé hã, aiwa ẽtẽ waipo pré oru na ropodo ẽtẽ waipo prã prata 'manharĩ na da te ãma isa'ra ne hã.

Provébiu 25:15

Dahâimana wahâ zarina, te za dama ipire norĩ hã marĩ na te te ãma 're dazaze za'ra. Duré danhimirobzanhamri wẽ hã te za ropire hã te te 're uprosi za'ra.

Zuwã 4:37

Daburu na da te 're robzuri za'ra mono wamhã, te za duré da te 're 'rãihâri za'ra. Tawamhã ni'wa hã te te rob're nherẽ, te te 'rãihâri õ wamhã, te za wasu'u ni, ãne: “Õ hã ma rob're 'rata. Tane nherẽ, te te 'rãihâri õ di, si'uihâ na hã. I'upana sô iromhuri'wa si ma isimiromhuri hã uprosi.” Ãne te za wasu'u ni. Tane ma tô aibâ norĩ hã aiwana te te dama 're ĩwasu'u 'rata za'ra. Tahawa, te za oto da te 're ĩzaze za'ra, a norĩ wa'aba zama 're ĩzadawa wasu'u za'ra wa'aba mono nherẽ, datẽme te 're asatõrĩ za'ra wa'aba mono wamhã.

Roma 12:3

'Re ihâimana u'âsi mono hã tinhimizawi pese zéb zarina, ma tô ĩpisutu, isadawa wasu'u'wa na oto 're ĩhâimana mono da. Tahawa, wa za oto ãne na aima roti pese za'ra wa'wa. Dama aipire na, duré dama aiwẽ na 're aihâimana za'ra wa'aba mono õ nherẽ, 'râwi aipire na 're asi'madâ'â za'ra wa'aba mono õ di za. 'Re ihâimana u'âsi mono, ma tô te te sima 're aipisutu za'ra wa'wa, õhõ ãma si oto 're anomro aba mono da. Tane nherẽ, aihĩni isazei'wa, asiré 're anomro aba mono nherẽ, ni'wam norĩ si te isazei pese 'wa hã 're hâimana za'ra. Duré ni'wam norĩ hã isazei prãi 'wa, te 're hâimana za'ra. Isazei prãi 'wa norĩ hã 're sazei pese za'ra wa'aba mono newa, 'râwi asi'ãma 're rosa'rata za'ra wa'aba mono õ di za, 're sazei pese za'ra wa'aba mono õ nherẽ.

Roma 12:6

Tahawa, 'Re ihâimana u'âsi mono hã simizawi pese uptabi wa, romhuri te te wama 're i'apisutu mono zéb zarina, wasipu'u pese na, wa za wa te tãma 're romhuri za'ra, wate mono bâ, ãma 're iwasipawaptob za'ra mono zéb da hã. 'Re ihâimana u'âsi mono zadawa wasu'u na, sena na isazei'wa norĩ ma si te te ãma 're irowasu'u za'ra mono zéb da, te te sima 're wa'apisutu mono wamhã, taha zarina si, wa za tô ãma 're wasipawaptob u'âsi za'ra. Isimiroti zarina si, wa za wa te 're sadawa wasu'u za'ra, wasiré isazei'wa norĩ ma.

Filipu 2:3

'Râwi asima si 're irosa'rata za'ra wa'aba mono zéb zarina, marĩ hã asima 're 'manharĩ za'ra wa'aba mono õ di za. Duré aipire na dama 're aihâimana za'ra wa'aba mono newa, taré asina 're aiwata za'ra wa'aba mono da, marĩ hã asima 're 'manharĩ za'ra wa'aba mono õ di za. Duré dama aipire na 're asi'madâ'â ze za'ra wa'aba mono õ di za. Taha wa'rãmi te za iwẽ na si 're idahâimana wazéb za'ra wa'aba mo, aima dapire na da'ãma 're irosa'rata za'ra wa'aba mono zéb zarina.

Zuize 8:2

Tane nherẽ, Gidiã te ãne tãma nharĩ za'ra: — Midiãnita norĩ ma, marĩ wa hã te i'manharĩzé hã marĩ dai õ di, niha na marĩ 're i'manharĩ za'ra wa'aba mono zé ma hã. E bété wasété di, uwa 'rã, Efraĩhĩ nhihudu norĩ te te 're isinarĩ za'ra mono si'atarẽme hã. Ta hã wẽ uptabi di tãma hã, uburé Abi'ézéhé te aibâ norĩ te te siwi 're isinarĩ mono nhipai u hã.

Zuize 8:4

Tawamhã Gidiã tite aibâ norĩ 300 na ihâiba za'ra norĩ siré, wasutu uptabi za'ra nherẽ, õne haré tinhitob'ru zarina isisa'rei mono na te te ãma uzusi za'ra wa, ma tô oto panho'u Zodã pa u hã aihutu. Sihutu wamhã, ma tô taha pa na oto saprĩ za'ra.