Zuize 5:2 - ꞌRe Ihâimana Uꞌâsi Mono Zadawa Wasuꞌu

² Uburé Danhib'apito ãma 're wawata za'ra wa'aba mono! Izaraéu nhihudu norĩ, si'wapé za'ra da, ma tô sima waprosi za'ra. Ma tô duré rowẽ sina 're sipisutu za'ra.

Zuize 5:2 ပူးပေါင်းရင်းမြစ်များ

Neemia 11:2

Tawamhã Zeruzalẽ ãma 're hâimana za'ra mono da, te te sima irowairébé za'ra norĩ hã, ma tô dapẽ'ẽ to sina dasima wasu'u wẽ za'ra ni.

Salmu 103:2

Uburé Danhib'apito, ĩpẽ'ẽ na tô ai'ãma 're ĩwata mono da si, wa ĩsima te 're 'ruiwapari! Duré marĩ iwẽ na 're ĩpawapto mono zém na 're ĩpo're simrami tõ mono da, wa tô ĩsima te 're wẽ u'âsi!

Salmu 110:3

Nimahã na asitob'ru norĩ zada aihâimana da, bâdâ pisutu wamhã, te za asib'a'uwẽ norĩ hã oto aima sihâi'ré za'ra, sihawim na isipisutu za'ra norĩ hã. Awẽ wi atébré 're ihâimana mono ne, te za ihâiba tém norĩ hã ẽne iwazéb zahi ãma siwi asõpẽtẽ.

Salmu 94:1

Uburé Danhib'apito, a hã 'Re ihâimana u'âsi mono, dama 're i'arob'manharĩ mono 'wa na 're i'aihâimana mono! Ma'ãpé 're i'asimi'ruiwa'âbâ mono zém na hã asihâi'ré na.

1 Corĩtu 9:17

Ãne na te tãma 're iromhuri mono zéb da hã, wa hã ĩsi'uihâ na ĩsipisutu 'wa'âhã, aré ibâre ĩpawa'âbâ ré, iwasu'uwẽ na te tãma 're iromhuri mono da hã. Tane nherẽ, ĩsi'uihâ na ĩsipisutu õ di. 'Re ihâimana u'âsi mono si, ma tô ĩpisutu, taha ma ĩ'umnhasi zarina, te tãma 're romhuri wẽ u'âsi mono da.

2 Corĩtu 8:12

Ato sina, ãma asõprub za'ra wa'aba wamhã, 'Re ihâimana u'âsi mono si te za asõprubzém na aiwẽsãmri za'ra wa'wa. Asimarĩ aba õ wa, tô suru na isõmri za'ra wa'aba zéb zarina, te za duré ãma aiwẽsãmri za'ra wa'wa, ato sina ãma asõprub za'ra wa'aba wa.

2 Corĩtu 9:7

'Râwi aipẽ'ẽ 're, asima iwaihu'u za'ra wa'aba zéb zarina si, te za aihâiba mono bâ dama asõprub za'ra wa'wa, ãté sa'ẽtẽ na, ãté suru na. Robzei'õ nherẽ, dama asõprub za'ra wa'aba õ di za. Duré taré da te aima i'ru za'ra wa'aba zéb zarina, dama asõprub za'ra wa'aba õ di za. Mare di. Asi'uihâ na si te za asima iwẽ za'ra wa'aba zéb zarina, dama asõprub za'ra wa'wa, ato sina. Ãne si iwẽ uptabi hã, 'Re ihâimana u'âsi mono ma hã, dato sina dasima 're idanhoprub za'ra mono zé hã.

Filipu 2:13

E marĩ wa. 'Re ihâimana u'âsi mono hã aipẽ'ẽ 're, te te ai'ãma 're romhuri u'âsi za'ra wa'aba mono wa, isimipawaptobzém na marĩ na ãma 're sazei pese za'ra wa'aba mono da, duré taha zarina i'uwaibaba si marĩ hã tãma 're 'manharĩ wẽ za'ra wa'aba mono da, te te sima 're i'aiwẽ za'ra wa'aba mono zéb uwaibaba.

Filemo 1:14

Tane nherẽ, te za asi'uihâ na si tãma ipisu, apâ we ĩtẽme satõrĩ da, ãne hã aima wẽ wamhã. Duré aima wẽ õ wamhã, mare di za. Ãne wapsi hã tô marĩ õ di za, ĩma hã wẽ di za tô. Wa hã, ãne hã te ãma aima pisutu õ di. Mare di.

Apocalipsi 18:20

Ãne te i'awapari mono hã, ĩnhotõ 'rowim ne, ĩpo're na. Tahawa, ma'ãpé hâiwa ãma 're aihâimana za'ra wa'aba mono hã ãma 're atoi u'âsi za'ra wa'aba mono, 'ri nho'õmo za'ẽne hã isi'utõrĩzém na. Duré 'Re ihâimana u'âsi mono nhib'a'uwẽ norĩ, ma'ãpé 're atoi u'âsi za'ra wa'aba mono, isadawa wasu'u'wa norĩ zama, duré Cristuhu zadawa wasu'u'wa norĩ zama. E marĩ wa. Babilonia ãma da te aima 're rob'manharĩ wasété za'ra wa'aba mono wa, 'Re ihâimana u'âsi mono hã te te da'uprosi wa oto. Tahawa, te za ãma 're atoi u'âsi za'ra wa'aba mo.

Apocalipsi 19:2

Marĩ na te te upai ãna, te i'uwaibaba si te te dama 're arowairébé, sena na. Pi'õ siwa'âbâ zô 're isisõmri mono 're ihâimana wasété mono zéb zarina, isine daro mono bâ 're dahâimana wasété za'ra mono wa, ma tô 'Re ihâimana u'âsi mono hã iwasédé hã ãma tihi. Ma tô wẽ'õ pese. Isib'a'uwẽ norĩ te te 're simroi mono wa, ma tô 'Re ihâimana u'âsi mono hã uprosi, pi'õ hã.

Zuize 5:9

Izaraéu nhihudu norĩ wada'uri'wai ãma wa ãma 're ĩsiri u'âsi za'ra, duré a'uwẽ norĩ to sina 're isipisutu za'ra mono norĩ ãma. Uburé Danhib'apito ãma si 're wawata za'ra wa'aba mono!