Zuize 1:7 - ꞌRe Ihâimana Uꞌâsi Mono Zadawa Wasuꞌu

⁷ Ãhã wa, te Adoni-Bezequi hã tinha ãne: — Wa hã wa tô ti'ru, 70 na apito norĩ nhiptõmohi na'rata za'ra hã, duré iparadub'rã na'rata za'ra hã, da te tiwi sihâri za'ra da. Ta norĩ hã ma tô ĩte wedeza zahâpâ dasai'a'a hã te te 're waibu. Tahawa, ãhã na awa'awi na hã 'Re ihâimana u'âsi mono, ma tô ãne hã ĩma 'manha, ta norĩ ma, te 're i'ab'manharĩ mono zém ne hã. Tawamhã Adoni-Bezequi, 'rinho'u Zeruzalẽ u ma tô dasiwi saprõni ni. Tahawa, tame ma tô oto dârâ.

Zuize 1:7 ပူးပေါင်းရင်းမြစ်များ

Roma 2:15

Ta norĩ hã si'uihâ na 're hâimana wẽ za'ra mono wamhã, 'Re ihâimana u'âsi mono nhimiroti hã ipẽ'ẽ 're, tãma 're ihâimana u'âsi za'ra mono zé, te wasu'u. Duré iwẽ hã te te dama 're 'manharĩ za'ra mono wamhã, 'râwi te za tipẽ'ẽ na 're sisaze za'ra. Duré marĩ iwasédé hã te te 're 'manharĩ za'ra mono wamhã, 'râwi te za tiwasété na 're sisãmri za'ra. Tahawa, tipẽ'ẽ na 'râwi 're sisaze za'ra mono wamhã, duré 'râwi tiwasété na 're sisãmri za'ra mono wamhã, 'Re ihâimana u'âsi mono nhimiroti, ipẽ'ẽ 're, tãma 're ihâimana u'âsi za'ra mono zé, te wasu'u.

Tiagu 2:13

Nimahã bâtâ na dahâimanazém na te te da'awaihu'u wapsi, da'ãma 're ipẽ'ẽzé za'ra mono õ norĩ ãma, pẽ'ẽzé õ di za, 'Re ihâimana u'âsi mono hã, ti'ab ré da'ãma 're isiwamri za'ra mono õ norĩ ãma hã. Da'ãma 're ipẽ'ẽzé u'âsi za'ra mono norĩ ãma si, te za ãma 're pẽ'ẽzé za'ra.

Apocalipsi 13:10

Ni'wa hã isazei'wai wamhã, dazazéb 're da te 're séme mono da, 'Re ihâimana u'âsi mono te te dawi 're sawi za'ra mono õ wamhã, te za tô da te 're sé. Duré sib'ézé 'wapa na da te 're simroi mono da, 'Re ihâimana u'âsi mono te te dawi 're sawi za'ra mono õ wamhã, te za tô da te 're simro. Ãne da nherẽ, te za sipizari ãna ãma 're nomro, 'Re ihâimana u'âsi mono ãma.

Apocalipsi 16:6

'Re idanomro wasété mono norĩ hã ma tô asib'a'uwẽ norĩ, duré asadawa wasu'u'wa norĩ zama hã te te 're simro. Ma tô te te 're wapru pu'u za'ra. Tahawa, ma tô iwa'rãmi dawapru hã tãma i'anhomri mo, õhõ si da te 're âhuri mono da. Ibâre ma tô oto rowasédé hã sô tiwatobro za'ra tô.

Zuize 1:6

Tahawa Adoni-Bezequi hã ma tô tiwi aimani za'ra. Tane nherẽ, isarina sisa'rei mono wa, ma tô siwi ti'â. Tahawa, ma tô siwi siptõmohi na'rata nhihâ. Ma tô duré siwi paradub'rã na'rata nhihâ.

Zuize 9:24

Abimelequi, Siquẽ ãma aibâ norĩ, Gidiãhã 'ra 70 na ihâiba norĩ te te uprosi za'ra da, te te ipawaptob za'ra me, ma tô tinhimi'manharĩ wasété za'ra zé hã tihâiba na te te wa'âbâ za'ra da hã, ãne tãma tiromhâimana za'ra.

Zuize 9:57

Tawamhã 'Re ihâimana u'âsi mono, Siquẽ ãma aibâ norĩ 're ihâimana za'ra mono ma zama, ma tô duré tãma rob'manharĩ za'ra, uburé tinhimi'manharĩ wasété za'ra zé te te ãma wa'âbâ za'ra da, robzépata na. Tawamhã Gidiãhã 'ra Zotã, iwẽ'õ si te te tãma 're i'apisutu mono zé hã ma tô i'reb za'ra hã tihâiba tô.

1 Samuéu 15:33

Tawamhã te Samuéu hã tãma tinha ãne: — Asi'wa hã dana norĩ 'ra ãna 're hâimana za'ra mono da, te te tãma 're i'manharĩ za'ra mono ne, te za ãhã na hã ana zama oto 'ra ãna tihâiba. Taha pari, ma tô oto Samuéu hã ãma aiwã õne haré, Gilga ãma, danhoprubzéb da, ẽtẽ za'ra nho're.