Zuéu 2:32 - ꞌRe Ihâimana Uꞌâsi Mono Zadawa Wasuꞌu

³² Tawamhã ni'wam norĩ hã Uburé Danhib'apito nhimipawaptobzé te te tiwi iwaptẽrẽ za'ra hã te za uburé sõ'reptu za'ra. E marĩ wa. Wanhib'apito hã ma tô ropisutu, ni'wam norĩ hã isi'utõrĩ'õ hã za Siã na ẽtẽ'rãihâ nhisi ãma, Zeruzalẽ ãma 're si'ubumroi mono da. Ã norĩ hã Uburé Danhib'apito te te ipisutu za'ra norĩ si te za tinho'reptuzé hã sina uwaimrami za'ra, hâiba ré.

Zuéu 2:32 ပူးပေါင်းရင်းမြစ်များ

Zenezi 4:26

Tawamhã duré Setihi ma, ma tô i'ra hã tãma 'maipodo. Ta hã ma tô duré sisi, Enosi na. Tawamhã tame ma tô oto Uburé Danhib'apito nhisi waptẽrẽ na hã ãma 're dawata na'rata za'ra.

Zuwã 10:16

Ni'wam norĩ hã te duré 're nomro, ĩnhib'a'uwẽ 're hâimana za'ra mono da hã. Ta norĩ ãma, wa za pone'ẽrebâ na simiré'é za'ra, ĩnhimiwa'ra 're, 're isi'ubumroi mono õ na hã. Ta norĩ zama wa za ĩsitẽme ubumro. Tawamhã te za ĩmreme hã te te 're wapari pese za'ra. Pone'ẽrebâ norĩ hã maparane danhimi'ubumro hã siré oto 're isi'ubumroi mono ne, te za simisutu ĩnhib'a'uwẽ 're nomro, misi i'madâ'â'wa, tãma 're ĩhâimana za'ra mono wa za.

Zuwã 4:22

Ãhã na te za oto daro mono bâ ãma 're wata za'ra, isazei uptabi 'wa norĩ hã. 'Re ihâimana u'âsi mono pẽ'ẽzani ré 're nomro mono wa, te za tô sena ãma 're wata za'ra. Te za duré tãma 're sisõmri u'âsi za'ra, isimiroti zarina si 're nomro mono da. Ta norĩ si ma tô te te sima 're awẽ, ãma 're wata u'âsi za'ra mono da. 'Re ihâimana u'âsi mono hã waihu'u pese uptabi di. Hâiba õ nherẽ, te daro mono bâ 're sãmra, Ipẽ'ẽzani hã. Tahawa, te za oto daro mono bâ ãma 're wata za'ra, isazei uptabi 'wa norĩ hã. Ipẽ'ẽzani ré 're nomro mono wa, te za tô sena ãma 're wata za'ra. Te za duré tãma 're sisõmri u'âsi za'ra, isimiroti zarina si 're nomro mono da. A norĩ wa'wa hã te ãma 're aiwata za'ra wa'aba mo. Tane nherẽ, waihu'u za'ra wa'aba õ di, 'Re ihâimana u'âsi mono hã. Wa norĩ hã wa tô waihu'u za'ra ni. Tahawa, wa ãma 're wawata u'âsi za'ra. 'Re ihâimana u'âsi mono te te ipisudu hã Danho'reptui'wa da, ta hã zudeu. Ãne na hã wama waihu'u pese za'ra di.

Zezusihi zadawa wasuꞌuꞌwa norĩ nhimiromhuri na robꞌuiꞌéré 15:17

Tawamhã zudeu'õ norĩ zama te za ĩzô 're sõpré, ĩnhib'a'uwẽ da, te ĩsima ipisutu za'ra norĩ hã te te 're ĩzaze za'ra mono da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:39

Ãne ma tô aima ropisutu siromo za'ra wa'wa, te te aima 're sõmri za'ra wa'aba mono da, asihudu norĩ ma zama. Wasiré'õ norĩ ma zama ma tô tãma ropisutu siromo za'ra. Wanhib'apito, 'Re ihâimana u'âsi mono, za sitẽme sô 're ihârâ za'ra mono norĩ ma, ma tô ropisutu siromo za'ra, Tipẽ'ẽzani na hã.

Roma 11:26

Ãne 'Re ihâimana u'âsi mono te te 're isõ'reptu za'ra mono zéb da hã, Izaraéu nhihudu norĩ hã. Ãne na ma tô duréihã Izaia hã ãma rob'ui'éré siro, ta norĩ ãma hã: “Danho'reptui'wa da hã, Zeruzalẽ ãma Siã na sa'a nhisi ãma, dasiré za 're ihâimana mono hã, tame. Ta hã Zacoho nhihudu norĩ 're iwasété za'ra mono zé hã te za te te tãma 're apari.

Roma 11:5

Tane te duré ãhã na hã dama 're romhâimana za'ra. Da'ãma 're pẽ'ẽzé mono wa, da'ãma 're isiwãrĩ mono zéb zarina, ma tô 'Re ihâimana u'âsi mono hã Izaraéu nhihudu norĩ hã te te sima 're apisutu, umro na, isib'a'uwẽ uptabi si oto 're hâimana za'ra mono da.

Roma 11:7

Tawamhã e niha, wa za ãne na hã ãma waihu'u pese za'ra ni. Ãne, wa za oto ãma waihu'u za'ra ni. Izaraéu nhihudu norĩ hã 'Re ihâimana u'âsi mono, iwasédé hã te te oto ãma 're ab'madâ'â tõ mono da, duré taha zarina te te 're iwẽsãmri za'ra mono zéb da hã, sô 're sõpré u'âsi mono nherẽ, te te sina tãma ãma 're uwaimrami za'ra mono õ di, ta norĩ hã. 'Re ihâimana u'âsi mono, umro na te te sima 're ipisutu za'ra mono norĩ si, ma tô te te sina tãma 're uwaimrami za'ra, 'Re ihâimana u'âsi mono te te 're iwẽsãmri za'ra mono zém na hã. Tane nherẽ, ni'wam norĩ hã Izaraéu nhihudu nherẽ, 'Re ihâimana u'âsi mono nhiti 're ihâimana za'ra mono norĩ hã, ta norĩ si ma tô 'Re ihâimana u'âsi mono hã po're nhitob za'ra, imreme hã te te 're waihu'u za'ra mono ãna, a'â 're nomro mono da.

Roma 9:24

Wa norĩ hã ma tô 'Re ihâimana u'âsi mono hã te te 're wa'apisutu, isib'a'uwẽ uptabi hã oto 're wanomro mono da. E 'wam norĩ hã tawamhã, 'Re ihâimana u'âsi mono te te 're i'apisutu mono norĩ hã. Wa norĩ hã zudeu norĩ hã aihĩni õ nherẽ, duré zudeu'õ norĩ hã aihĩni õ nherẽ, ma tô wasiwazari te te 're wa'apisutu, isib'a'uwẽ oto 're wanomro mono da, wasiré.

Roma 9:27

Izaia hã ma tô duré ãne na ãma rob'ui'éré, Izaraéu nhihudu norĩ ãma hã: “'Re ihâimana u'âsi mono hã Wanhib'apito hã te za sa'ẽtẽ da'ahâ za'ra waptu na, daro mono bâ dawasété na te te 're ida'awaihu'u mono zéb zarina. Tahawa, Izaraéu nhihudu norĩ hã â poré zaihâ na supara 're isimi'wara mono ne, ahâ uptabi nherẽ, te za umro na te te 're anho'reptu, 'Re ihâimana u'âsi mono hã.”

Hebreu 12:22

Tazahã, a norĩ wa'wa hã tane 're aihâimana za'ra wa'aba mono õ di oto, ãhã na hã. 'Re ihâimana u'âsi mono u aipẽ'ẽ na 'râwi asina 're rob'umhutu za'ra wa'aba mono wamhã, hâiwa ãma Siã na ẽtẽ 'rãihâ nhisi u ne, ma tô 're irob'umhutu za'ra wa'aba mo. Duré hâiwa ãma Zeruzalẽ hã 'ri nho'õmo u ne, ma tô 're irob'umhutu za'ra wa'aba mo, 'Re ihâimana u'âsi mono 're isãmra u'âsi mono zéb u hã, hâiwa ãma tãma iromhuri'wa norĩ hã ahâ uptabi na, i'rata 're isi'ubumroi mono zéb u zama.