Zuéu 2:29 - ꞌRe Ihâimana Uꞌâsi Mono Zadawa Wasuꞌu

²⁹ Pawa'âbâ ãna dama romhuri'wa norĩ si'aibâ ma, wa za ãma ropé, Ĩpẽ'ẽzani na hã, pawa'âbâ ãna dama romhuri'wa norĩ sipi'õi ma zama, tô taha bâtâ mono na hã.

Zuéu 2:29 ပူးပေါင်းရင်းမြစ်များ

1 Corĩtu 12:13

Wa norĩ hã wasiré isazei'wa norĩ hã aiwa 're wahâimana za'ra mono õ di. Ni'wam norĩ hã zudeu. Duré ni'wam norĩ hã zudeu'õ. Duré ni'wam norĩ hã pawa'âbâ ãna iwada'uri zarina si, te te dama 're iromhuri za'ra mono. Duré ni'wam norĩ hã wada'uri ãna si'uihâ na 're ihâimana za'ra mono. Ãne hã aiwa 're wahâimana za'ra mono õ nherẽ, simisutu wa oto 're wahâimana za'ra, wahâiba misi ne, 'Re ihâimana u'âsi mono pẽ'ẽzani na â dawabzuri uburé, wa te 're 'manharĩ za'ra mono wa, duré 'Re ihâimana u'âsi mono hã, Tipẽ'ẽzani, uburé te te wama 're anhomri mono wa, wapẽ'ẽ 're, oto 're isãmra mono da hã.

Galata 3:28

Taha zarina, 'Re ihâimana u'âsi mono hã te te siwi 're da'aba'a waihu'u mono õ di, zudeu norĩ hã, duré zudeu'õ norĩ hã, iwada'uri zarina si, pawa'âbâ ãna dama romhuri'wa norĩ hã, duré wada'uri ãna si'uihâ na 're ihâimana za'ra mono norĩ hã, aibâ norĩ hã, duré pi'õ norĩ hã. Simisutu Cristu Zezusihi nhib'a'uwẽ si, te 're aihâimana za'ra wa'aba mo. Tahawa, te oto Abra'ãhã nhihudu na te te 're asisi za'ra wa'wa, 'Re ihâimana u'âsi mono hã. Ãhã wa, iwẽ na si, Abra'ãhã ma te te iropisutuzéb zarina, te za iwẽ na si te te aima ãma 're a'uwaimrami 'wa, Aimama 'wa hã.

Colosu 3:11

Tahawa, dapoto mono bâ dasipu'u pese na tãma 're dahâimana za'ra mono nherẽ, te te siwi 're da'ahâiba wẽ'õ mono õ di oto, 'Re ihâimana u'âsi mono hã. E marĩ wa. Cristuhu zazei'wa norĩ hã aiwapsi te te 're azawi pese mono wa, zudeu'õ norĩ hã zudeu norĩ me, duré sihâiwata nhihâri ré 're inomro mono norĩ hã, duré sihâiwata nhihâri ãna 're inomro mono norĩ hã, duré a'uwẽ pahi norĩ, marãi 'rowi 're ihâimana za'ra mono hã darob amoi ãma, duré iwada'uri zarina pawa'âbâ ãna te te dama 're iromhuri za'ra mono norĩ hã, duré wada'uri ãna si'uihâ na 're ihâimana za'ra mono norĩ hã. Ãne hã te uburé isazei'wa norĩ hã aiwapsi tãma 're hâimana za'ra, 'Re ihâimana u'âsi mono ma hã. Cristuhu si te pire uptabi na wama 're hâimana za'ra, danhipai u. Taha si wama ipire uptabi za'ra hã, wasiré isazei'wa norĩ ma hã. Taha si te za tizazei'wa norĩ pẽ'ẽ 're, 're sãmra u'âsi, ihâiba mono bâ.