Zuéu 2:26 - ꞌRe Ihâimana Uꞌâsi Mono Zadawa Wasuꞌu

²⁶ A norĩ wa'wa hã te za 're asaihuri u'âsi aba mo, 're i'mahâpãrĩ za'ra wa'aba mono zéb u. Tahawa, te za ĩ'ãma si 're aiwata u'âsi za'ra wa'aba mo, wa hã Asib'apito za'ra wa'wa 'Re ihâimana u'âsi mono, ai'u'âbâ za'ra wa'aba, marĩ isa'rese'õ iwẽ hã te 're i'ab'manharĩ mono zém na. Tawamhã ĩnhib'a'uwẽ norĩ hã niwamhã isiséb zahu za'ra da hã mare di za.

Zuéu 2:26 ပူးပေါင်းရင်းမြစ်များ

Zenezi 33:11

Tahawa ma'ãpé ĩzawi na hã aima ĩnhoprubzé te we isimroi mono hã asima wẽ za'ra na. 'Re ihâimana u'âsi mono ma tô iwẽ na si ĩma 're hâimana. Tahawa uburé marĩ ĩwi sô 're irobaba mono hã ma tô te te ĩma 're anhomri. Tawamhã Zaco, Ezauhu ma hã te te nasi tãma 'ruzadawa za'rei'õ wa, ma tô oto sima wẽ.

Neemia 9:25

Asib'a'uwẽ norĩ, 'ri nho'õmo norĩ 'wawi wa'ra pe, te te siwi i'uirĩ norĩ ãma hã, ma tô ãma ai'uté za'ra. Ma tô duré ti'a iwẽ hã siwi ti'â, marĩ iwa'âbâ za'ẽtẽ na 'ri i'masisi mono ré hã, duré â zô ab're siromo mono ré hã, oriwera wede iwa 're isimasa mono ré hã, wede norĩ i'rãi pe, iwa 're isimasa mono ré hã, duré uwa 'ru, da te iwa 're izuri mono ré hã. Tawamhã ta norĩ hã ma tô sima iwẽ na uburé marĩ hã te te 're huri. Tahawa, ma tô ãma 're sihâipese za'ra. Uburé marĩ iwẽ tãma 're isõmri za'ra mono na hã ma tô duré te te sima ãma 're rowẽ za'ra.

Salmu 103:5

Õ hã te duré marĩ iwẽ na ĩpẽ'ẽ 'remhã te te ĩma 're sa'ẽtẽ. Ãne wa, wa tô ĩhâiba tém na 're ĩhâimana mono zém na, te ãma uzusi u'âsi, si'õmo wawẽ siptete na 're ihâimana mono ne.

Salmu 22:26

Isimarĩ'õ norĩ te za tisa hã te te ãma 're huri, te te 're i'mahâpãrĩ za'ra mono zéb u. Duré Uburé Danhib'apito zô 're isõpré mono norĩ si, te za ãma 're wata u'âsi za'ra. Ta norĩ hã õne u'â rowẽ sina 're ihâimana za'ra mono da si, ĩma iwẽ hã.

Salmu 72:18

Uburé Danhib'apito, Izaraéu nhihudu norĩ te, 'Re ihâimana u'âsi mono ãma si 're wawata za'ra wa'aba mono, õhõ si marĩ iwẽ uptabi hã te te 're ab'manharĩ mono wa.

Provébiu 13:25

Sena na 're ihâimana za'ra mono norĩ hã te tisa hã te te 're 'mahâpãrĩ u'âsi za'ra. Tanei õ di, iwasété na 're ihâimana za'ra mono norĩ hã. Te za mra hã te te 're sépata u'âsi za'ra, ta norĩ hã.

Roma 10:11

Duréihã Izaia hã ma tô duré ãne na ibaihâ na rob'ui'éré: “'Re ihâimana u'âsi mono hã, Danho'reptui'wa da, te te ipisudu hã da te dasina 're umnhasi za'ra mono wamhã, niwamhã te te sina 're umnhasi baba za'ra mono õ di za. Te za te te dama ãma 're a'uwaimrami u'âsi.” Ãne Izaia hã te te ãma irob'ui'érézé hã.

Roma 5:5

Ãhã zô, taré sô 're wanhimipari baba za'ra mono õ di za. E marĩ wa. 'Re ihâimana u'âsi mono hã Tipẽ'ẽzani te te wama 're i'anhomri mono na, tinhimizawi pese zé hã te te wama 're awaihu'u mono wa. Tahawa, taré sô 're wanhimipari za'ra mono õ di za, marĩ iwẽ hã te te wama 're i'apisutu mono zéb zô hã.

Roma 9:33

Duréihã Izaia hã ma tô ãne na ãma rob'ui'éré, 'Re ihâimana u'âsi mono mreme na: “Ma'ãpé, ĩwapari pese za'ra wa'aba. Zeruzalẽ u, wa za ni'wa hã satõ, Siã na sa'a nhisi u. Ẽtẽ tõmo wawẽ hã bâdâdi wa, dawi 're isa'wari mono hã, te te 're da'marõpãrĩ za'ra mono wa, 're idasirẽme za'ra mono ne, 'Re ihâimana u'âsi mono 'rata 're idanomro u'âsi mono zé hã da te dasina 're uwaimrami za'ra mono õ di za, da te dasiwi 're wẽ'õ pese za'ra mono wa, 'Re ihâimana u'âsi mono Zeruzalẽ u te te isatõrĩ hã. Tane nherẽ, ni'wam norĩ hã te te sina 're umnhasi za'ra mono wamhã, taré te te sina 're umnhasi baba za'ra mono õ di za. Iwẽ hã te za tô te te tãma ãma 're a'uwaimrami, 'Re ihâimana u'âsi mono hã. Tahawa, tãma 're rowẽ u'âsi za'ra mono di za.” Ãne ma tô duréihã Izaia hã ãma rob'ui'éré siro, Cristu za da te dasiwi iwẽ'õzém na hã.

1 Timotiu 6:17

Ãne te za duré isibrob ahâ norĩ ma 're i'aroti mo, sibrob ahâ wẽ te, 'râwi sina 're wata tõ za'ra mono da. Danhibro hã dama 're hâimana u'âsi za'ra mono õ di za, dama ãma 're irowẽ za'ra mono zéb da hã. Tahawa, tinhibrop si te te 're 'madâ'â za'ra mono õ di za. 'Re ihâimana u'âsi mono zô si, te za 're simnhasi za'ra, taha si, marĩ wẽ na uburé wama 're sõpru mono wa, wama ãma 're irobze za'ra mono zéb da hã.

1 Zuwã 2:28

Ĩ'ra norĩ, ãne wa za oto aima roti za'ra wa'wa. Zezusi hã apâ wei morĩ õ ré, ma'ãpé õhõ ãma si 're anomro u'âsi aba mono, niwa apâ za wei morĩ wa, tãma aipahi za'ra wa'aba tõ da, duré rowazép te, tãma ai'rãpo za'ra wa'aba tõ da.