Zuéu 2:16 - ꞌRe Ihâimana Uꞌâsi Mono Zadawa Wasuꞌu

¹⁶ Uburé da'rã'õtõ aba. Tawamhã uburé te za dama i'ru za'ra wa'wa, dasihâiba pese za'ra da. We dasi'aba'ré da uburé, ihi norĩ hã, ai'uté norĩ hã, dapabre norĩ zama. Duré si'ãma imro téb za'ra norĩ hã te za we wairé 'ri hawimhã, ta norĩ zama we si'aba'ré da, 'Re ihâimana u'âsi mono nhorõwa u hã.

Zuéu 2:16 ပူးပေါင်းရင်းမြစ်များ

Salmu 19:5

Mararé sidâpâsi te bâdâ hã ta hawimhã toi uptabi sina hã 're pusi, aibâ 're mro za'ra mono wa, to sina 're ihâimana za'ra mono ne, duré isisamroi'wa norĩ sisada 're sisa'rei mono da, pẽ'ẽ toi uptabi wa, sirési sina 're isisisi mono ne.

Ezodu 19:10

Uburé Danhib'apito te duré tawamhã tãma tinha ãne: — Ma'ãpé aimorĩ, dama nharĩ za'ra da hã, ã bâtâ na duré awẽmhã dasipese za'ra da, ĩ'ãma idawata za'ra zéb da hã. Duré da'uza hã te za hâ'upsõ za'ra ni za.

Ezodu 19:15

Tawamhã Mozési te dama tinha ãne: — Ma'ãpé awẽ amo na da, asimire sina aihâimana za'ra wa'aba, pi'õ na asiwaihu'u na aihâimana za'ra wa'aba ãna.

Ezodu 19:22

Sasedoti norĩ zama po're pu'u za'ra na, ta norĩ hã duré sipese za'ra da, 'râwi ĩtẽme te te sina rotété za'ra da. Dame sipese za'ra õ wamhã, wa za uprosi za.

Zuéu 1:14

Ma'ãpé asisô aihârâ za'ra wa'aba, ubumroi wa'aba da, 'Re ihâimana u'âsi mono nhorõwa 'ri ãma, misi bâtâ na asaihuri aba ãna aihâimana za'ra wa'aba zé hã asima pisutu za'ra wa'aba da. Duré ubumroi wa'aba, uburé dama ipire norĩ, duré uburé daza'rui 're, 're i'ai'ubumroi wa'aba mono norĩ, Uburé Danhib'apito wate 'Re ihâimana u'âsi mono nhorõwa 'ri 'rãihâ ãma, aimreme 'rãihâ na tãma aimreme zusi aba da, tiwi iwaptẽrẽ za'ra wa'aba zém na, te te aipawaptob za'ra wa'aba da.

Mateu 21:16

Tawamhã ta norĩ hã te Zezusi hã siwi sadanha, ãne: — E wapari õ di, ai'uté norĩ mreme hã. E asina sadawa uwati za'ra ãna. Tawamhã Zezusi hã asa te duré tãma nharĩ za'ra, ãne: — Wa tô wapari za'ra. A norĩ wa'wa hã bété. E sõré za'ra wa'aba õ di, wahi'rata nhimi'ui'éré hã: “Ai'uté norĩ ma, wa tô waihu'u siromo za'ra, duré ai'utépré norĩ ma zama, iwẽ na si ai'ãma 're wata za'ra mono da.” Ãne ma tô wahi'rada hã ĩ'ãma rob'ui'éré siro, ibaihâ na hã.

Mateu 9:15

Tawamhã te Zezusi asa hã tãma nharĩ za'ra ãne: — Aibâ hã imrozéb u, sô ihârâ za'ra norĩ sihutu wamhã, e aibâ imro da hã isiré sãmra za'ra ré, te za robzei'õ na hã tihâimana za'ra, ta norĩ hã. Mare di. Ãne hâimana za'ra õ di za. Niwapsi te za bâdâ hã iwa waptãrã, aibâ imro da hã isiwadi norĩ wa'wa hawi, da te tiwi i'âri za'ra zéb da hã. Tawapsi te za tô sai ãna hã, duré tãma za'ra robzei'õ na hã 're si'ubumro za.

1 Corĩtu 7:5

Tahawa, aimro ré 're i'aihâimana za'ra wa'aba mono norĩ, aimro wi aihâiba hã 're sawi za'ra wa'aba mono õ di za oto. Ãté nimahã bâtâ na si te za ãma 're asisaze za'ra wa'aba mo, aimro ma, aihâiba hã a'â 're sõmri za'ra wa'aba mono tõ da, 'Re ihâimana u'âsi mono ma si, a'â 're asisõmri za'ra wa'aba mono da, tãma 're aimreme zusi aba mono da. Ãne wamhã, 'Re ihâimana u'âsi mono ma, 're aimreme zusi aba mono pari, aihâiba hã aimro wi 're sawi za'ra wa'aba mono ãna, te za tô aihâiba na apâ asima ãma 're atob za'ra wa'aba mo, aiwasédé hã aihâiba na 'râwi nherẽ, aimro õ ne, asiwi 're 'manharĩ za'ra wa'aba mono tõ da, asina 're asiptete za'ra wa'aba mono õ wa, Satanasi hã te te 're aipibu za'ra wa'aba mono tõ da.

Zozué 7:13

Tahawa ma'ãpé aiwahutu, a'uwẽ norĩ ma, waihu'u za'ra da aimorĩ da, ta norĩ hã sipese za'ra da, ĩnho're simasab da, awẽmhã. Tawamhã te za wa hã Uburé Danhib'apito, Izaraéu nhihudu norĩ te 'Re ihâimana u'âsi mono, tãma ĩzadawa wasu'u za'ra, ãne: “Izaraéu nhihudu norĩ, ma tô marĩ asisa isa'ra wa'wa, prub za'ra wa'aba da, wa hã te i'rui 'remhã. Tawamhã marĩ ma, tãma rowairébé za'ra wa'aba õ wamhã, asitob'ru norĩ da, asiptete na i'aihâimana za'ra wa'aba da hã mare uptabi di za.

Zozué 8:35

Mozésihi nhimiroti na ãma irob'ui'éré mono bâ, ma tô Zozué hã uburé pese sõré, Izaraéu nhihudu uburé norĩ ma, pi'õ norĩ ma, ai'uté norĩ ma, duré isiré a'uwẽ'õ iwazari 're ihâimana za'ra mono norĩ ma. Te te 'mairẽme õ pese na ma tô uburé sõré, Zozué hã.

1 Samuéu 16:5

Tawamhã Samuéu ma ãma tãma wa'rãmi za'ra ãne: — Ĩhe. 'Re ihâimana u'âsi mono ma ĩnhoprub da si wa we rob'upa ã wamhã. Tahawa, we ĩme ai'aba'réi wa'aba da hã, ma'ãpé 'Re ihâimana u'âsi mono ma asimirosa'rata na asisõmri za'ra wa'aba. Tawamhã Zéséhé ma, ma tô duré tãma ti'ru i'ra norĩ zama a'â tinhimirosa'rata na sisõmri za'ra da. Taha pari, ma tô oto sô hâ ime si'aba'ré da, 'Re ihâimana u'âsi mono ma danhoprubzéb u hã.