Zuda 1:7 - ꞌRe Ihâimana Uꞌâsi Mono Zadawa Wasuꞌu

⁷ Duré ãma asipo're pu'u za'ra wa'aba, duréihã Sodoma na 'ri nho'õmo nhisi ãma 're idahâimana wasété za'ra mono norĩ ãma, duré Gomora na 'ri nho'õmo nhisi ãma 're idahâimana wasété za'ra mono norĩ ãma, duré i'rata 'ri wa'õtõ mono bâ 're idahâimana wasété za'ra mono norĩ ãma hã. Tamemhã ma tô uburé dahâimana wasété uptabi na 're dahâimana za'ra, dasiwazari. Dahâiba na ma tô dasina 're danhimisaihuri za'ra. Duré aibâ nherẽ, ma tô aibâ si'uiwa na dasina 're dawasété za'ra. Hâiwa ãma aré te te 're iromhuri za'ra mono norĩ hã, 'Re ihâimana u'âsi mono hã te te 're iwapari za'ra mono õ ne, da te 're wapari za'ra mono õ di. Tahawa, ma tô unhama ro'o na dama rob'manharĩ za'ra, 'Re ihâimana u'âsi mono hã, da te 're robzépata u'âsi za'ra mono da, wẽ te bâ, unhama ro'o u'âsi na. Taha na te za ãma 're dasipo're pu'u u'âsi za'ra, ta norĩ zarina ãma 're danomro wasété tõ mono da, isirã za'ra zéb zarina.

Zuda 1:7 ပူးပေါင်းရင်းမြစ်များ

Zenezi 13:13

a'uwẽ wasété uptabi na si 're ihâimana za'ra mono ãma, tiwasété si 'Re ihâimana u'âsi mono zada, te te 're i'manharĩ za'ra mono zéb ãma.

Zenezi 18:20

Tawamhã Uburé Danhib'apito, te Abra'ãhã ma oto tinha ãne: — Sodoma norĩ ãma Gomora me, iwasédé da te ãma 're inomri zahuré mono zé sa'ẽtẽ uptabi di. Duré iwa 're idahâimana za'ra mono norĩ wasété za'ra zé hã pire uptabi di.

Zenezi 19:5

Tawamhã ta norĩ ma tô Lo hã siwi 'mahâ, ãne: — E mahãta aibâ norĩ, ã bara na asõrõwa u we izasi zahuré hã. Ma'ãpé we rob u wama za'ra sani zahuré na. Wa wasima wẽ za'ra ni, ãma zahuré wahâimana za'ra da.

Mateu 10:15

Tô sena, wa aima waihu'u za'ra wa'wa. Niwapsi 'Re ihâimana u'âsi mono, da'ãma isipo'ozéb ãma hã Sodoma ãma duré Gomora ãma 're idahâimana wasété uptabi za'ra mono norĩ ma, te te irob'manharĩ pipa zém nhipai u, te za asô 're itob'uzu za'ra wa'aba mono õ norĩ ma hã te te tãma 're arob'manharĩ za'ẽtẽ.

Mateu 11:24

Niwapsi 'Re ihâimana u'âsi mono hã da'ãma isipo'ozéb ãma hã Sodoma ãma 're idahâimana wasété za'ra mono norĩ ma, te te irob'manharĩ pipa zém nhipai u, te za te te 're aihâ za'ra za'ẽtẽ 'wa, tô sena. — Ãne ma tô Zezusi hã dama waihu'u, Cafanau ãma 're idahâimana za'ra mono norĩ ma hã.

Mateu 25:41

— Tawamhã isimi'e niwĩ isimasam norĩ ma, te za oto nharĩ za'ra, ãne: “A norĩ wa'wa hã ma tô 'Re ihâimana u'âsi mono hã te te siwi 're aiwẽ'õ pese za'ra wa'wa. Mo oto ĩnhiti ai'aba'réi wa'aba, unhama ro'o u'âsi u, wa'uburé norĩ zô 'Re ihâimana u'âsi mono te te ipisutuzéb u, duré ta norĩ nhib'apito zô zama.

Luca 17:29

Tawamhã bâtâ na, Sodoma hawi Loho watobrozém na hã ma tô dasi'utõrĩ. Tã we ita'a ne, ma we uzâ hã asa'wa ti'ai u, ẽtẽ ro'o nhizédé uzé pire zama. Tahawa, ma uburé dasi'utõrĩ.

1 Corĩtu 6:9

Tiwasété si te te 're i'manharĩ u'âsi za'ra mono norĩ hã, ta norĩ hã 'Re ihâimana u'âsi mono, da'ãma 're isib'a'uwẽ mono zé hã te te dame sina 're uwaimrami za'ra mono õ di za. E ãne hã, zahadu waihu'u za'ra wa'aba õ di bété. Ãne na hã taré 'râwi asima 're asadawa nhipese za'ra wa'aba mono õ di za. Dahâiba na dawasédé te te 're i'manharĩ za'ra mono norĩ hã, ta norĩ hã 'Re ihâimana u'âsi mono, da'ãma 're isib'a'uwẽ mono zém na, dame 're hâimana za'ra mono õ di za, duré 'Re ihâimana u'âsi mono upana, romhâiba 'manharĩ ãma 're iwata za'ra mono norĩ hã, duré damro na dawi 're isimisaihuri za'ra mono norĩ hã, duré aibâ si'uiwa na si'ãma 're iwasété za'ra mono norĩ hã, duré danhibrom na dawi 're isipsaihuri za'ra mono norĩ hã, duré danhibrom na te te 're ida'ruiwapari za'ra mono norĩ hã, duré âzézei'wa 're ihâimana za'ra mono norĩ hã, duré te te da'ãma 're iwasété za'ra mono norĩ hã, duré danhibrob zô dapãrĩ'wa norĩ hã. Ta norĩ hã dasiré 're hâimana za'ra mono õ di za, 'Re ihâimana u'âsi mono, da'ãma 're isib'a'uwẽ mono zéb ãma hã.

2 Tesalonita 1:7

Duré te za te te 're aipawaptob za'ra wa'wa, rowẽ na si 're aihâimana za'ra wa'aba mono da. Wa norĩ zama, robzépata na 're iwahâimana za'ra mono norĩ zama, te za te te 're wapawaptob za'ra, rowẽ na si 're wahâimana za'ra mono da. Tô sena, te za Wanhib'apito Zezusi hã wei wama sihâi'ré za'ra hâiwa hawi, te te tãma 're iromhuri pese za'ra mono norĩ me. Tawamhã wei morĩ wamhã, te za tô dahâ za'ra. Te za duré wa norĩ hã wapawaptob za'ra.

2 Tesalonita 1:8

Tawamhã unhama ro'o wa'wam ne na, te za we nhamra, Zezusi hã. Niha na te za ãhã wamhã dama arob'manha, 'Re ihâimana u'âsi mono, da te dasima 're iwẽ'õ pese za'ra mono norĩ ma, duré Wanhib'apito Zezusihi nhiminho'reptuzém na, iwasu'uwẽ te te 're isazei õ za'ra mono norĩ ma zama.

2 Pedru 2:2

Ta norĩ hâimanazéb zarina, te za da'ahâ na da te ãma 're sasõmri za'ra, dahâimana nhiséb'õ na, Wanhib'apito zazei'wa na dama 're siwasu'u za'ra mono nherẽ. Tahawa, te za da'ahâ na Wanhib'apito nhimiroti ma, da te 're nharĩ wasété za'ra, taré.

2 Pedru 2:6

Duré, dahâimana wasété wa, ma tô 'Re ihâimana u'âsi mono hã siwi da'awẽ'õ, Sodoma na 'ri nho'õmo nhisi ãma, duré Gomora na 'ri nho'õmo nhisi ãma zama. Unhama ro'o na ma tô da'uprosi, da te ãma waihu'u za'ra da, dawasété na si 're dahâimana za'ra mono wa, aiwa za te te 're ida'ahâ za'ra mono na.

2 Pedru 3:7

Duré 'Re ihâimana u'âsi mono mreme zarina, hâiwa norĩ hã ti'ai me te za a'â 're hâimana zahuré. Bâdâ iwa iwaptã'ãzéb u, te za dahâimanazéb zarina dama arowairébé, 'Re ihâimana u'âsi mono hã. Tawamhã te za da'uprosi, 're idahâimana wasété za'ra mono norĩ hã. Duré unhama ro'o na te za oto hâiwa norĩ hã uprosi zahuré, ti'ai me.