Tahawa aibâ norĩ ma, wa tô pẽtẽ za'ra. Wa tô duré 'Re ihâimana u'âsi mono nhimi'ahârizé hã sada waptẽrẽ za'ra. Tahawa, wa tô duré hâ za'ra. Wa tô duré séré zano za'ra. Tawamhã 'Re ihâimana u'âsi mono nhisi na wa tô tiwi waptẽrẽ za'ra, niwamhã i'ra norĩ hã wasiré a'uwẽ'õ norĩ nhipi'õ na hã 're mro zahu za'ra mono tõ da.
Zuda 1:3 - ꞌRe Ihâimana Uꞌâsi Mono Zadawa Wasuꞌu3 Ĩsisãnawã norĩ, ĩma asawi pese za'ra wa'aba norĩ hã, wa tô aré ĩsima rosa'rata, 'Re ihâimana u'âsi mono te te 're iwa'anho'reptui mono zém na te aima rob'ui'éré za'ra wa'aba da. Tane nherẽ, marĩ iwasétére hã ai'ãma 're hâimana za'ra wa'aba mono wa, wa tô ĩnhimirosa'rata na ĩsima ãma saprĩ, taha na si te ãma aima rob'ui'éré za'ra wa'aba da. Wa norĩ hã 'Re ihâimana u'âsi mono nhib'a'uwẽ, wa oto 're wahâimana za'ra. Ta hã ma tô misi haré te te wama 're anhomri, Cristuhu wasu'uwẽ na roti na ãma 're iwanomro mono zéb da hã. Tahawa, wa oto aima ãma rob'ui'éré za'ra wa'wa, tô da'ãma 're ai'aba'ré za'ra wa'aba mono da, Cristu, da te dasina 're i'umnhasi za'ra mono zéb udâna. အခန်းကိုကြည့်ပါ။ |
Zuda 1:3
44 ပူးပေါင်းရင်းမြစ်များ
Ãne ma tô dama rob'rãzarõtõ: — “Cristu hã Danho'reptui'wa da, 'Re ihâimana u'âsi mono te te wama ipisudu hã te za robzépata. Te za duré dârâ. Dâ'â uptabi nherẽ, te za apâ hâiwa'udu.” Ãne te wama ãma rowasu'u, irob'ui'éré 'rata na hã. Zezusi hã te aima iwasu'u za'ra wa'wa hã wa tô waihu'u pese za'ra ni, tô õ hã Cristu, 'Re ihâimana u'âsi mono te te wama ipisudu, Danho'reptui'wa da.
Tawamhã mreme nhiptete na te nasi zudeu norĩ ma tãma ãma wa'rãmi za'ra. 'Re ihâimana u'âsi mono nhimiroti 'rata na rob'ui'éré zarina, ma tô nasi tãma rowasu'u za'ra danho'a, Zezusi hã Danho'reptui'wa da, 'Re ihâimana u'âsi mono te te ipisutu na sena na da te 're waihu'u za'ra mono da. Zudeu norĩ hã te te ãma wa'rãmi za'ra neza, Zezusihi zazei'õ'wa norĩ hã. Tane nherẽ, Apolu hã ma tô aiwétési ãma ai'uté za'ra, zudeu norĩ ãmamhã, tinhimirowasu'u na.
Saulu hã te te rowasu'u waihu'u pese di. Simirowasu'u pire di duré. Tawamhã tinhimirowasu'u pire na ma tô te te ãma rosa'ré. Zezusi hã Danho'reptui'wa da, 'Re ihâimana u'âsi mono te te ipisutu wasu'u na ma tô mreme pire na tãma rowasu'u za'ra, zudeu norĩ ma. Tawamhã te te rowasu'u pire wa, zudeu norĩ hã te te sada'âbâ waihu'u za'ra õ di.
Zezusihi wasu'uwẽ hã danhipai u ipire uptabi hã, wa tô te aima 're wasu'u za'ra wa'wa, da te ĩma 're irowasu'u za'ra mono zéb zarina. Ãne, Zezusihi wasu'u hã ipire uptabi hã: Cristu hã ma tô, u, wazada dârâ, uburé wawasété na 're iwahâimana za'ra mono norĩ zada. Taha pari, ma tô dasiwi sẽrẽ ni, u, ab're 're. Tawamhã bâdâ maparane ãma si'utõrĩ õ ré, ma tô duré Imama hã, u, hâiwa'utu, 'Re ihâimana u'âsi mono hã. Ãne ma tô tãma tiromhâiba, duréihã 'Re ihâimana u'âsi mono zadawa 'mahârâ'wa norĩ hã ibaihâ na te te ãma irob'ui'éré siromo za'ra zéb zarina.
Taha zarina, 'Re ihâimana u'âsi mono hã te te siwi 're da'aba'a waihu'u mono õ di, zudeu norĩ hã, duré zudeu'õ norĩ hã, iwada'uri zarina si, pawa'âbâ ãna dama romhuri'wa norĩ hã, duré wada'uri ãna si'uihâ na 're ihâimana za'ra mono norĩ hã, aibâ norĩ hã, duré pi'õ norĩ hã. Simisutu Cristu Zezusihi nhib'a'uwẽ si, te 're aihâimana za'ra wa'aba mo. Tahawa, te oto Abra'ãhã nhihudu na te te 're asisi za'ra wa'wa, 'Re ihâimana u'âsi mono hã. Ãhã wa, iwẽ na si, Abra'ãhã ma te te iropisutuzéb zarina, te za iwẽ na si te te aima ãma 're a'uwaimrami 'wa, Aimama 'wa hã.
Wa hã Paulu, Cristu Zezusihi zadawa wasu'u'wa, wa 're ĩhâimana, 'Re ihâimana u'âsi mono te te sima ĩwẽzéb zarina. Tahawa, wa ãma aima rob'ui'éré za'ra wa'wa, Éfézu na 'ri nho'õmo nhisi ãma, 'Re ihâimana u'âsi mono nhib'a'uwẽ, 're i'aihâimana za'ra wa'aba mono norĩ ma. A norĩ wa'wa hã ma tô õne u'â Zezusihi ãma si 're anomro aba mo, aihâimana nhiptete sina.
Wa hã Paulu, Timotiuhu me, Cristu Zezusihi ma romhuri'wa norĩ, wa ãma aima rob'ui'éré za'ra wa'aba ni, Filipu na 'ri nho'õmo nhisi ãma uburé 'Re ihâimana u'âsi mono nhib'a'uwẽ 're i'aihâimana za'ra wa'aba mono norĩ ma. Uburé Cristu Zezusihi ãma si 're anomro aba mono norĩ ma, wa ãma aima rob'ui'éré za'ra wa'aba ni, duré isazei'wa norĩ 'madâ'â'wa 're ihâimana za'ra mono norĩ ma zama, duré dapawapto'wa na 're ihâimana za'ra mono norĩ ma zama hã.
Niha za ĩma romhâimana nherẽ, te za Cristuhu wasu'uwẽ zarina si 're anomro wẽ wa'aba mo, taha si aima pire za'ra wa'aba wa, ãma 're aihâimana za'ra wa'aba mono zéb da hã. Ãne 're aihâimana za'ra wa'aba mono ré, ãma atẽme ĩmorĩ za'ra wa'aba wamhã, wa za ai'ãma waihu'u za'ra wa'wa, simisutu asiptete sina asitob'ru norĩ da, 're aihâimana za'ra wa'aba mono zém na hã, asimirosa'rata misi na, taha zarina 'Re ihâimana u'âsi mono, da te dasina 're umnhasi za'ra mono da, Cristuhu wasu'uwẽ hã da te 're isaze za'ra mono zéb zarina. Duré ãté ãma atẽme ĩmorĩ za'ra wa'aba õ nherẽ, wa za tô õhõ na si ai'ãma waihu'u za'ra wa'wa, simisutu asiptete sina ãma 're aihâimana za'ra wa'aba mono na hã.
Filipu na 'ri nho'õmo nhisi ãma zahadu wasi'ubumroi ré, wa tô robzépata za'ra ni, isazei'õ'wa norĩ nhimihâzém na, duré damreme wasété na zama. Taha na ma tô wa'ãmamhã iwaihu'u za'ra wa'wa. Tane nherẽ, Wanhib'apito 'Re ihâimana u'âsi mono hã ma tô wapawaptob za'ra, wapahi ãna, isadawa wasu'u hã wa te aima wasu'u za'ra wa'aba da, Cristuhu wasu'uwẽ hã. Tahawa, wamreme wa'rãmi, da te wawi ro'wa'rutu za'ra nherẽ, wa tô iwasu'uwẽ na aima rowasu'u za'ra wa'aba ni tô, wapahi za'ra ãna.
Duréi pese hã ma tô ni'wam norĩ hã Wamama zadawa hawimhã marĩ na aima rowasu'u za'ra, za tãma asimiromhuri na iwaihu'u siromo zéb da. Taha zarina ĩ'ra Timotiu, wa za aima ti'ru, da te aima iwaihu'uzé hã asina 're 'madâ'â u'âsi mono da, roti tô senai õ, ãma 're 'wapéi u'âsi mono da. Ãne te za 're aimo, ãma 're 'wapéi u'âsi mono da. Roti tô sena si te za 're i'madâ'â pese mo, Zezu Cristuhu wasu'uwẽ hã wa te 're isaze za'ra mono zép si. Te za duré 're aimorĩ wẽ. Ãne wamhã, aiwasété õ wamhã, 'râwi 're asisãmri mono õ di za, aiwasété na. Ãhã na ni'wam norĩ hã tiwasété na 're sisãmri za'ra mono nherẽ, 're siwẽ'õ za'ra mono õ di. Tahawa, ma tô oto sazei utõrĩ za'ra, Wanhib'apito nhimiroti hã wa te 're isaze za'ra mono zé hã.
Titu, tahawa, wa ãma aima rob'ui'éré. Te i'aipawaptobzéb zarina, wasiré Wanhib'apito zazei'wa 're aimorĩ wa, wa ĩ'ra na asisi, asawi te. Wamama ma, wa ai'ãma 're ĩmreme u'âsi, 'Re ihâimana u'âsi mono ma, duré Wanhib'apito Cristu Zezusihi ma zama, isimizawizé hã ai'ãma 're hâimana u'âsi mono da, rowẽ u'âsi, ãma 're aimorĩ da.
Ĩsisãnawã norĩ, ĩma asawi pese za'ra wa'aba norĩ hã, ãne na te aima ãma romnhimiré'é za'ra wa'aba nherẽ, ai'ãma 're ĩhâtâ'â za'ra wa'aba mono õ di. Sena na wa tô oto ãma aiwaihu'u za'ra wa'wa, marĩ iwẽ si 're i'manharĩ za'ra wa'aba mono zém na hã, 'Re ihâimana u'âsi mono te te 're i'asõ'reptu za'ra wa'aba mono zéb zarina.
Sila hã ma tô ĩpawapto, aima ĩnhimiroti suru za'ra wa'aba nherẽ, te te aima rob'ui'éré za'ra wa'aba da. Ta hã ĩsisãnawã ne, te ĩma 're hâimana. Tahawa, ĩma umnhasi di. Wa hã wa tô ĩsima aiwẽ za'ra wa'wa, ĩnhimiroti na te aipawaptob za'ra wa'aba da, Wanhib'apito ãma si asiptete sina 're anomro aba mono da, 'Re ihâimana u'âsi mono nhimipawaptobzé hã asi'uihâ na asina 're waihu'u za'ra wa'aba mono da. Taha wasu'u na si, wa tô te aima 're rowasu'u za'ra wa'wa, tô sena wa ta hã. Tahawa, te te 're aipawapto wẽ za'ra wa'aba mono wa, te za asiptete sina ãma 're anomro aba mo.
Wa hã Sima Pedru, Zezu Cristuhu ma romhuri'wa, duré isadawa wasu'u'wa, wa ãma aima rob'ui'éré za'ra wa'wa, wasiré isazei'wa 're i'anomro aba mono norĩ ma. Wanhib'apito 'Re ihâimana u'âsi mono hã wẽ uptabi di. Duré wa'anho'reptui'wa Zezu Cristuhu zama wẽ uptabi di. Wẽ uptabi zahuré wa, ma tô te te 're aipawaptob za'ra wa'wa, wasine asina 're umnhasi za'ra wa'aba mono da, te te 're asõ'reptu za'ra wa'aba mono da.
Wa hã Zuda, Zezu Cristuhu ma romhuri'wa, Tiaguhu no, wa aima ãma rob'ui'éré za'ra wa'wa. 'Re ihâimana u'âsi mono hã ma tô te te 're aipisutu za'ra wa'wa, isib'a'uwẽ na oto tãma 're aihâimana za'ra wa'aba mono da. Tahawa, tãma asawi pese za'ra wa'aba di, Wamama ma hã. Duré Zezu Cristu hã te te oto 're ai'madâ'â pese za'ra wa'wa.
Ĩsisãnawã norĩ, tane nherẽ, te za ãma 're asipawaptob u'âsi za'ra wa'aba mo, Wanhib'apito wasu'uwẽ na 're isaze za'ra wa'aba mono zém na, aihâimana prédubzé hã asima 're sa'ẽtẽ u'âsi za'ra wa'aba mono da. Duré 'Re ihâimana u'âsi mono ma, 're aimreme zusi aba mono wamhã, Ipẽ'ẽzani te te aima 're iwaihu'u za'ra wa'aba mono zém na si, te za tãma 're aimreme zusi aba mo.
Pone'ẽrebâ hã dazada idâ'âzéb zarina, ma tô wasiré isazei'wa norĩ hã ãma ai'uté za'ra, Satanasihi ãma. Iwasu'uwẽ hã sena na te te dama 're isadawa wasu'u za'ra mono zém na zama, ma tô ãma ai'uté za'ra. Duré da te 're 'ruiwapari za'ra mono wa, dawi 're sihâiba zawi za'ra mono õ di, 're dâ'â tõ za'ra mono da. Tahawa, 'Re ihâimana u'âsi mono wi sipizari ãna, ma tô duré Satanasihi ãma ai'uté za'ra.
Za 're irobzépata za'ra wa'aba mono zém na hã asina 're aipahi za'ra wa'aba mono õ di za. Ĩwapari pese za'ra wa'aba. Wa'uburé hã nimahã na te za dama ai'mai'ru wasété 'wa, da te ai'maimrami aba da, dazazéb 're, da te ai'manheme aba da, te te aipibu za'ra wa'aba da, tô sena ĩzaze za'ra wa'aba zô. Tawamhã 10 na bâdâ hã te za ai'ãma 'maihai'utõrĩ 'wa, dazazéb 're ai'masima'wara aba ré, niha aihâiba za'ra wa'aba na 're 'mairobzépata za'ra wa'aba mono ré hã. Ãne wamhã, ma'ãpé asiwi ĩrẽme aba tõ, tô'ã. Tawamhã da te ai'manhimroi wa'aba zém na ai'masi'utõrĩ aba nherẽ, ĩ'mairẽme aba õ wamhã, duré dawi ĩ'mai'udâ wa'aba õ wamhã, wa za aima wa'âbâ za'ra wa'wa. Rowẽ, wa za aima pisutu za'ra wa'wa, ĩ'rata 're i'ai'ubumroi u'âsi aba mono zéb da hã.
ကြော်ငြာတွေ