Zona 2:2 - ꞌRe Ihâimana Uꞌâsi Mono Zadawa Wasuꞌu

² “Uburé Danhib'apito, 'Re ihâimana u'âsi mono, iwasétézém na te robzépata wa, wa tô ãma aiwi rowaptẽ, ĩpawaptob da. Taha wa, ma tô we ãma ĩzada'â. Adâ 're ihâimana za'ra mono zém hawi, wa tô ãma aiwi rowaptẽ, ĩmreme 'rãihâ na, ĩpawaptob da. Taha zarina, ma tô iwapa, ĩmreme hã.

Zona 2:2 ပူးပေါင်းရင်းမြစ်များ

Salmu 16:10

E marĩ wa. A hã 'Re ihâimana u'âsi mono, dadâ'â nhiptetezé wi 're ĩ'madâ'â u'âsi mono wa. Wa hã ai'ãma si 're ĩmorĩ wa, ĩrẽme õ di za, dadâ'â pese zéb u ĩmorĩ da hã.

Salmu 22:24

Ta hã isimarĩ'õ norĩ hã te te 're arẽme waihu'u mono õ di. Duré 're po're simrami mono õ di, te te 're irobzépata za'ra mono ãma hã. Tiwi hã 're sima'uri waihu'u za'ra mono õ di. Mreme 'rãihâ na te te isõ'reptu za'ra zé te te tiwi 're waptẽrẽ za'ra mono wamhã, te za te te 're amreme wapari.”

Salmu 34:6

Wa hã, ĩnhimarĩ'õ robzépata'wa, wa tô ĩhârâ 'rãihâ na hâ. Tahawa, Uburé Danhib'apito ma tô ĩwapa. Taha zarina, ma tô ĩma ropire hawimhã ĩnho'reptu.

Salmu 4:1

'Re ihâimana u'âsi mono, ĩ'wawi 're i'aimapa mono, ma'ãpé te ãma i'ai'mahârâzém na we ĩzada'âbâ! Ropire na ĩhâimanazém na, we ĩpawapto na. Duré ĩ'ãma aiwamri wamhã, ma'ãpé ãma aima ĩmremezé hã wapari!

Luca 22:44

Tiwi robzei'õ uptabi nherẽ, ma tô duré mre, Timama ma, mreme 'rãihâ na. Tahawa, ma tô 're su'u a'a, dawapru ne, ti'ai wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:27

Ĩdâ'â nherẽ, ĩrẽme õ di za, adâ 're ihâimana za'ra mono zéb ãma hã. Wa hã te aima 're romhuri wẽ u'âsi mono wa, ĩdâ'â wamhã, ĩhâiba 'roi õ di za. Tahawa, ĩdâ'âzé, wa hã te ĩsima pipa õ di za.

Hebreu 5:7

Zezusi hã ti'ai ãma 're morĩ ré hã, ma tô wawa sina Timama ma mre, mreme 'rãihâ na, za te te irobzépatazém na te te pawaptob da. Tawamhã 'Re ihâimana u'âsi mono, Zezusihi mreme te te wapari wamhã, ma tô sima wẽ tô, te te pawaptob da. Zezusi hã uburé marĩ hã Imama te te tãma ipisutuzéb uwaibaba si, te te 're ab'manharĩ mono da, te te sima 're wẽ u'âsi mono wa, ma tô Imama hã sima wẽ, te te pawaptob da. Duré 'Re ihâimana u'âsi mono, niha na hã te te sima wẽ 'wa'âhã, te aré tô tiwaihu'u pese na hã sõ'reptu, dâ'â tõ da.

1 Samuéu 1:16

Tahawa, ĩ'ãma rosa'rata tõ, wa hã pi'õ siwa'ru 're ĩhâimana mono na hã. Wa hã wa tô mre, Wanhib'apito ma. E tihai wa. Ĩma robzei mono õ wa, duré te robzépata mono wab zama.

1 Samuéu 30:6

Tawamhã Dawihi ma hã ropire uptabi di. E marĩ wa. Ite aibâ norĩ hã 'ra ãna oto hâimana za'ra wa, ma te oto isé pire hã sô tiwatobro za'ra. Tahawa, Dawi hã ẽtẽ na te te siwi wĩrĩ da te ãma sima robzanhamri pibu za'ra. Tane nherẽ, ma tô Uburé Danhib'apito ite 'Re ihâimana u'âsi mono nhimipawaptobzém na hã ipẽ'ẽ 'remhã aptete.