Zenezi 6:13 - ꞌRe Ihâimana Uꞌâsi Mono Zadawa Wasuꞌu

¹³ Tahawa te 'Re ihâimana u'âsi mono, Nowéhé ma tinha ãne: — Uburé te da'uprosi da, wa tô ĩsima da'ãma rowairébé. Tahawa wa za uburé pese tô da'uprosi. Duré ti'ai wa, uburé marĩ 're ihâimana za'ra mono zama wa za uprosi. E marĩ wa. Ti'ai ãma da te dasina 're irowamnarĩ za'ra mono zé te te sina rosa'réi u'âsi mono wa, hâimo.

Zenezi 6:13 ပူးပေါင်းရင်းမြစ်များ

Zenezi 49:5

“Simiã, Levi tisisãnawãi me, te tinhimnhi'ãsi na te te ãma dama 're rob'manharĩ u'âsi zahuré.

Zenezi 6:14

Tahawa ma'ãpé wede iwẽ 'mai'âri mono, uba're isa'ẽne hã ãma asima 'manharĩ da. Tawamhã 'ri 're wa'wa hã te za i'remhã i'awa'õtõ mo. Duré te za wedewa'u tom na isi'riti mono hã uburé i'anhito mo i'remhã, duré imana wawi rowi hawimhã.

Zenezi 6:4

Tô taha wamhã, te a'uwẽ poto 'rãihâ norĩ hã 're hâimana za'ra. Duré ronomro pari, te zahadu õ norĩ hã 're hâimana za'ra, hâiwa ãma isãmri'õ norĩ, da'ra sipi'õ norĩ na 're sapa'a za'ra mono wa, i'ra norĩ hã tãma 're poto za'ra mono ré. Tawamhã a'uwẽ ipoto 'rãihâ norĩ, te duréihã siptete na, duré dama wasu'u za'ẽtẽ na hã 're hâimana za'ra.

Zenezi 7:21

Tawamhã uburé ti'ai ãma 're ihâimana za'ra mono, si norĩ hã, abaze da te 're itébré za'ra mono norĩ hã, rom na 're ihâimana za'ra mono norĩ hã, di'i na 're inomro mono norĩ hã, duré a'uwẽ norĩ hã ma tô si'utõrĩ.

Zenezi 7:23

Nowéhé siré uba're wa, ihâimana za'ra norĩ si, si'utõrĩ õ di. Uba're wa, isiré ihâimana za'ra õ norĩ si ma tô ai'utõ, a'uwẽ norĩ hã, abaze da te 're itébré za'ra norĩ hã, rom na 're ihâimana za'ra mono norĩ hã, di'i na 're inomro mono norĩ hã, duré si norĩ hã.

Zenezi 7:4

E marĩ wa. Ã hawimhã 7 bâtâ ãma wa za 40 bâtâ 'rem na, duré 40 mara na tã ta'a da hã tãma rob'ru. Ãne wa za tawamhã uburé hâiba ré 're ihâimana za'ra mono norĩ hã uprosi.

Zenezi 8:21

Tawamhã Nowéhé nhibzari zadaze, Uburé Danhib'apito te te hãi wamhã, ma tô wẽsã. Tahawa te ãne rosa'rata na hã sima tinha: “Niwamhã ti'ai ma, ãne na te irob'manharĩ na isahu da hã mare di za, iwa 're idahâimana za'ra mono norĩ u'âbâmhã, daprédup tém hawim haré, marĩ iwasété na si da te dasima 're rosa'rata u'âsi za'ra mono nherẽ.

Hebreu 11:7

Nowé hã, 'Re ihâimana u'âsi mono si te te sina 're i'umnhasi mono zéb zarina, ma tô duré ãma saze, ropipa hã za dazô iwatobrozém na 'Re ihâimana u'âsi mono hã romhâ ré te te ãma ipo're pu'uzém na, zahadu marĩ hã titõmo na te te 'madâ'â õ nherẽ, Nowé hã. Tahawa, isimiroti zarina ma tô uba're za'ẽne hã 'manha, ti'ra norĩ hã te te ãma sõ'reptu za'ra da, duré timro zama hã, duré tisani'aba norĩ zama hã te te ãma sõ'reptu za'ra da. Taha zarina, ma tô 'Re ihâimana u'âsi mono hã siwi da'awẽ'õ pese, dawasété na si 're dahâimana za'ra mono wa, Nowéhé si isimiroti hã te te 're 'madâ'â pese mono wa. Tawamhã Nowé hã, 'Re ihâimana u'âsi mono si te te sina 're umnhasi mono wa, ma tô 'Re ihâimana u'âsi mono hã ãma tiwata, ãne: “Ãhã si te 're timorĩ wẽ.” Ãne 'Re ihâimana u'âsi mono hã, Nowéhé ãma iwatazé wasu'u hã.

1 Pedru 4:7

Ro isi'utõrĩzéb u hã, romhuture di oto. Tahawa, te za aihâiba na asina 're asiptete za'ra wa'aba mo. Duré aihâimana nhimiza'rese te za 're aihâimana za'ra wa'aba mo, 'Re ihâimana u'âsi mono ma, 're aimreme zusi u'âsi aba mono da.