Zenezi 47:19 - ꞌRe Ihâimana Uꞌâsi Mono Zadawa Wasuꞌu

¹⁹ Mrap te, wasi'utõrĩ da hã taré wa'madâ'â za'ra tõ. Duré atõmobre, wanhipti'a za'ra baba na 're sa'wari mono da hã, taré 'madâ'â tõ. Ma'ãpé wa'uipra za'ra na. Duré wanhipti'a za'ra hã uipra na, trigu wa'rãmi. Tawamhã wa za wa norĩ hã apito Fara'oho ma, wapawa'âbâ ãna wa te tãma 're romhuri za'ra. Duré romnhamare zama wama 'manhomri za'ra na, wa te zuri mono wa, wahâimanazém na wa te tô ãma uzusi za'ra da, mrap te, wasi'utõrĩ tõ da, wanhipti'a za'ra iwa rob're õ pese na 're sa'wari tõ mono da taré.

Zenezi 47:19 ပူးပေါင်းရင်းမြစ်များ

Zenezi 41:36

Tawamhã amnho ubumro hã te za 7 na mrab zépata ré wahu morĩ ré hã dama tihâimana za'ra, ti'ai wa'õtõ nho'u Ezitu 're. Tahawa, mrap te, idasi'utõrĩ da hã mare di za.

Zenezi 47:15

Tawamhã duré Ezitu ãma duré Cana'ã ãma rob'uiprazé dawi si'utõrĩ mono wamhã, ma tô uburé ezipsiu norĩ, Zuzéhé u hã 're nomro. Ãne te tahawa te te tãma 're nharĩ za'ra: — Ma'ãpé wazawi na hã mra wama a za'ra na. Wasi'utõrĩ da hã taré wa'madâ'â za'ra tõ, wate rob'uiprazé hã wawi si'utõrĩ za'ra wa.

Zenezi 47:18

Tawamhã wahu oto si'utõrĩ wamhã, ma tô wahub amo na apâ Zuzéhé u si'aba'réi wamhã, ãne tãma nharĩ za'ra: — Wanhib'apito, niha na romhâimanazé wa te aiwi udâ waihu'u za'ra õ di, ãne na hã. Wate rob'uiprazé hã ma tô wawi ai'utõrĩ za'ra. Duré tahawa uburé wanhimizama hã oto ate na te 're simasa. Taha zarina marĩ hã wa te aima isõmri za'ra da hã waihu'u õ di. Wahâiba za'ra si te wanhipti'ai me hã oto wama tihâimana za'ra, wa te aima isõmri za'ra da hã.

Zenezi 47:20

Tawamhã Zuzé, uburé Ezitu ãma danhipti'a ma tô apito ma hã uipra, uburé ezipsiu norĩ ma, ti'ai upana marĩ hã hâimana õ wa, te te iwede za'ra da hã, tô mrab zô hã robaba za'ẽtẽ wa. Tahawa ma tô oto apito ma, uburé danhipti'a hã tãma tihâimana za'ra.

Mateu 16:26

Ãté ni'wa hã te za tinhibro hã te te sima 're a'ubumroi pese, sibrob ahâ uptabi da. Tawamhã te za oto dârâ. Ti'ab ré, sibrob ahâ nherẽ, e tãma 're rowẽ mono di za, rowẽ isi'utõrĩ'õ hã te te sina uwaimrami õ wamhã. Mare di. Tãma 're rowẽ mono õ di za. Ti'ai ãma, simarĩ ahâ uptabi nherẽ, tãma hã waihu'u õ di za, tinhimarĩ na rowẽ ãma 're ihâimana mono zé te te ãma sima iwa'âbâzéb da hã.