Zenezi 43:26 - ꞌRe Ihâimana Uꞌâsi Mono Zadawa Wasuꞌu

²⁶ Tawamhã Zuzé ma tô wi, tinhorõwa u. Wisi wi, ma tô tinhibzari hã tãma sõmri za'ra, tiza'rui hawi te te siré tãma i'wasari hã. Te te tãma sõmri za'ra wamhã, ma tô hi'rãtitõ isõ'remhã tãma asimro, ti'ubu na te te tãma roptob za'ra sina, ti'ai u.

Zenezi 43:26 ပူးပေါင်းရင်းမြစ်များ

Zenezi 27:29

A'uwẽ mono bâ asapari te te aima 're iromhuri za'ra mono da si, iwẽ hã. Duré daro mono bâ da te dasiwi 're i'aiwazé mono da si, iwẽ hã. Duré asisãnawã norĩ nhib'apito na 're i'aihâimana mono da si, iwẽ hã. Duré ana zé're hawi a'uwẽ norĩ hã, asõ'remhã aima 're isiwẽ'ẽ za'ra mono da si, iwẽ hã. Tawamhã duré iwasédé te te aima 're ipisutu za'ra mono norĩ ma hã, 'Re ihâimana u'âsi mono, ta norĩ ma, iwasédé te te tãma 're ipisutu za'ra mono da si, iwẽ hã. Duré iwẽ te te aima 're ipisutu za'ra mono norĩ ma, 'Re ihâimana u'âsi mono, iwẽ te te tãma 're ipisutu za'ra mono da si, iwẽ hã.”

Zenezi 33:3

Taha parimhã Zaco ma tô oto sina sõ're za'ra, isõwab za'ra hâimana da. Tawamhã Ezauhu tẽme te te sina rotété mono sidâpâsi ma tô 7 na ãma isahu na hi'rãtitõ tãma simasisi, ti'ai u ti'ubu na te te tãma ropto mono sina.

Zenezi 42:6

Tahawa, Zuzé dama i'rãnho'õmo dâ'âsina daza'rui amoi hawi 're idasihutu mono ma hã ma tô amnho te te dama 're awede. Tawamhã idub'rata norĩ itẽme sihutu wamhã, ma tô isõ'remhã hi'rãtitõ tãma asimro. Ma tô duré ti'ubu na ti'ai u hã tãma roptob za'ra.

Zenezi 43:11

Tawamhã te imama ãne tãma tinha: — Niha hã aimawi hã te oto aima waihu'u õ di. Tahawa ãne te za pé asiwi i'manharĩ 'wa za: Õ hã aibâ ma, taré tãma asõprub za'ra wa'aba zéb da hã te za ate wa'aba mono bâ sa'ui 're asiwi iséme aba mo. Wanhipti'ai 're, marĩ iwẽ 're ihâimana za'ra mono hã te za tãma i'wasari 'wa, taré tãma sõmri za'ra wa'aba da, suru na ba'usamo na wedewa'u tom nhisi hã, suru na ropĩ hã, suru na dasaiwarĩrĩzé hã, duré suru na amiduwi sine hã.

Zenezi 43:28

— Ĩhe, aima romhuri'wa wamama za'ra hã te zahadu rowẽ na 're hâimana.

Salmu 72:9

Rop si 're irosa'wari mono ãma 're ihâimana za'ra mono hã te za isõ'remhã tãma 're siwẽ'ẽ za'ra. Isitob'ru norĩ hã te za duré tãma siséb za'ra wa, ipaparab u hã si'uihâ na tãma sisãmra, robzapru tẽmemhã.

Ezodu 18:7

Tawamhã Mozési, Zetru te te sina uzusi da ma tô watobro. Oto itẽme wisi wamhã, ma tô tãma iwazéb zarina tãma aiwẽ'ẽ. Tob'rata hârâ na ma tô duré sawi. Rowẽ zô te duré sadanharĩ zahuré. Taha pari Mozésihi nhorõwa u ma te oto tizasi zahuré siré.

Roma 14:11

Duréihã 'Re ihâimana u'âsi mono zadawa 'mahârâ'wa, ma tô ãne na ãma rob'ui'éré, imreme na: “Wa hã uburé Danhib'apito, tô sena 're ĩhâimana mono zé hã aima waihu'u pese za'ra wa'aba di. Duré tô sena aima ĩsiwasu'u za'ra wa'aba zéb zarina, wa duré tô sena aima ropisutu za'ra wa'wa. Ãne, wa aima ropisutu za'ra wa'wa. Niwapsi te za a'uwẽ mono bâ dahi'rãtitõ ĩnho're ĩma asimro ni, dama ĩpire uptabi wa. Tawamhã tame dapoto mono bâ te za ĩnhisi za'ra ni, ĩnhisi na 'Re ĩhâimana u'âsi mono na.”