Zenezi 42:6 - ꞌRe Ihâimana Uꞌâsi Mono Zadawa Wasuꞌu

⁶ Tahawa, Zuzé dama i'rãnho'õmo dâ'âsina daza'rui amoi hawi 're idasihutu mono ma hã ma tô amnho te te dama 're awede. Tawamhã idub'rata norĩ itẽme sihutu wamhã, ma tô isõ'remhã hi'rãtitõ tãma asimro. Ma tô duré ti'ubu na ti'ai u hã tãma roptob za'ra.

Zenezi 42:6 ပူးပေါင်းရင်းမြစ်များ

Zenezi 18:2

'Rãi wahutu wa, te te rob'madâ'â wamhã, ma tô si'ubdatõ aibâ norĩ isõ're isimasa 'madâ'â za'ra. Te te 'madâ'â za'ra wamhã, ma tô si'aba'ré na itẽme tiwara za'ra, te te sina uzusi za'ra da. Tawamhã hi'rãtitõ, ma tô isõ'reb za'ra nhamra. Ti'ubu na ti'ai u ma tô ropto.

Zenezi 19:1

Tawamhã robza'rã wi, ma tô hâiwa ãma romhuri'wa norĩ aimasisi zahuré, Sodoma u. Tahawa, te Lo hã 'ri nho'õmo te 'ridawa za'ẽtẽ ãma nhamra. Taha ré hâiwa ãma romhuri'wa itẽme isimasi te te 'madâ'â zahuré wamhã, ma tô wahudu, te te sina uzusi zahuré da. Tawamhã hi'rãtitõ ma tô isõ'reb zahuré hã nhamra. Ipaparab zahuré, ma tô ti'ubu na ti'ai u hã ropto.

Zenezi 33:3

Taha parimhã Zaco ma tô oto sina sõ're za'ra, isõwab za'ra hâimana da. Tawamhã Ezauhu tẽme te te sina rotété mono sidâpâsi ma tô 7 na ãma isahu na hi'rãtitõ tãma simasisi, ti'ai u ti'ubu na te te tãma ropto mono sina.

Zenezi 41:43

Taha pari, Ezituhu nhib'apito uptabi zapari dama i'rãnho'õmo te, awaru na wedewara zapore na 're wara da hã, ma tô duré tãma sa'ré, apito na da te ãma waihu'u za'ra da. Tahawa, ma tô duré tite aibâ norĩ ma, isõwab za'ra ãne hãsi mono sina si'aba'ré da hã, duré tãma rob'ru za'ra: “Tãma hã asiwasi aba mono!” Ãne ma tô Zuzé hã dama si'rãnho'u, Ezitu ãma.

Zenezi 41:54

Tawamhã Zuzé te te iwaihu'uzéb zarina, ma tô 7 wahub da hã oto tinhana'rata, mra da te 're isépata za'ra mono da hã. Ti'ai wa'õtõ nho'u ihâiba amo norĩ ãma hã ma tô mra hã da te 're sépata za'ra. Tane nherẽ, Ezitu ti'ai mono na daza'ru norĩ na hã te mra na dasima iwẽ na 're dahâimana za'ra.

Zenezi 41:57

Tawamhã uburé ti'ai wa'õtõ nho'u ihâiba amo norĩ ãma 're idahâimana za'ra mono, ma tô Ezitu u hã 're danomro, Zuzéhé wi amnho, da te 're uipra za'ra mono da, dasa zô hã ropâ dawi sô 're robaba za'ra mono wa.

Zenezi 44:14

Tawamhã Zuzé zahadu tinhorõwa ãma hâimana ré, ma tô Zuda tisisãnawã norĩ me apâ itẽme aihutu. Sihutu wi, ma tô isõ're hi'rãtitõ tãma asimro, ti'ubu na ti'ai u te te roptob za'ra sina.

Zenezi 45:26

Tawamhã te ãne tãma rowasu'u za'ra: — Zuzé hã te zahadu hâiba ré 're hâimana! Ta hã Ezitu ãma te dama i'rãnho'õmo na te te 're da'a'madâ'â. Tawamhã ãne na te te tãma wasu'u za'ra wamhã, ma tô aré Zaco hã simiza'rese'õ hai'utõ. Iwasu'u na te te duré ãma saze waihu'u za'ra õ di.

Zenezi 45:8

Tahawa a norĩ wa'wa we ãwamhã asiwi ĩzatõrĩ aba õ di. 'Re ihâimana u'âsi mono si ma tô we ĩzatõ. Ta hã apito Fara'oho zapari, dama ĩpire na 're ĩhâimana mono da hã, ma tô ĩwapu na 're ĩhâimana mono zém hawimhã oto ĩzarõtõ hâimo. Tahawa wa tô duré oto ti'â, apito nhimiromhurizé 'ri 'rãihâ 're romhuri hã. Ezitu 'remhã danhipai u dama ĩ'rãnho'õmo na hã wa tô oto 're ĩhâimana.

Zenezi 48:12

Tawamhã Zuzé, timama wai'ré hawi ma tô ti'ra sani zahuré. Te te sani zahuré wamhã, ma tô hi'rãtitõ hã nhamra. Duré ti'ubu na ma tô ti'ai u hã ropto.

Provébiu 11:26

Ni'wa hã amnho zub'a trigu wa'â te te sina hâimo da, te te dawi 're itété mono hã te za da te tãma 're nharĩ wasété za'ra, isõti na hã. Tane nherẽ, te te dama 're i'awede su'u mono ãma hã te za ãma 're dawata za'ra, isõprum na hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:10

Tahawa, te te irobzépata mono zéb sidâpâsi ma tô nasi pawapto, tiwi robzei'õ tõ da. Tawamhã apito Fara'oho nho're nasi hâimana wamhã, 'Re ihâimana u'âsi mono ma tô tiwaihu'u pe hã tãma tisõ, ihâimana wẽ zéb da hã. Tahawa, apito Fara'o hã ma tô wẽsã, Zuzé hã. Taha zarina ma tô tãma pisutu, Ezitu ãma roti'wa da oto, isadawa para. Isibro hã duré isõrõwa zama te te tãma 're 'madâ'â mono da zama, ma tô duré pisutu.

Apocalipsi 3:9

Ma'ãpé duré, waihu'u pese za'ra wa'aba. Satanasihi niwĩ 're ihâimana za'ra mono norĩ hã, e niha wa za tãma rob'manharĩ za'ra, ta norĩ ma hã. Ta norĩ hã zudeu nherẽ, zudeu norĩ hâimana wẽ zém na 're ihâimana za'ra mono na, dama 're siwasu'u za'ra mono zahã, te Satanasihi nhimiroti zarina si 're hâimana za'ra, sadawa nhipese na. Tahawa, wa za ãne tãma rob'manharĩ za'ra. Aipapara te za 're sina wa'wa, tãma aipire za'ra wa'aba wa. Tahawa, te za aiwaihu'u za'ra wa'wa, te 're i'asawi pese za'ra wa'aba mono na.

1 Samuéu 20:41

Tawamhã ai'repudu hã morĩ pari, ma tô oto Dawi hã watobro, ẽtẽ tõmo wawẽ babarãi ãma isima'urizém hawimhã. Tahawa, ti'ai u waptã'ã wamhã, ma tô si'ubdatõ ti'ubu na hã ropto, ti'ai u hã. Tawamhã wawa sina ma tô sisawi zahuré, sitob'rata hârâ na hã. Tawamhã robzei'õ hã sa'ẽtẽ uptabi di Dawihi ma hã, Zonataha nhipai u.