Zenezi 42:21 - ꞌRe Ihâimana Uꞌâsi Mono Zadawa Wasuꞌu

²¹ Tahawa te ãne sima nharĩ za'ra: — Sena na wa oto robzépata za'ra ni, wanoi ma, wa te tãma irob'manharĩ za'ra zarina. Ta hã te te robzépata wa, wapo're na'rata te te sina wawi rowaptẽrẽ za'ra nherẽ, wa te wasiwi wapari õ di. Tahawa awa'awi na wa oto robzépata za'ra ni.

Zenezi 42:21 ပူးပေါင်းရင်းမြစ်များ

Zenezi 41:9

Tahawa uwa 'rãi wa'u isé za'wari'wa norĩ nhib'ihâ'a hã ma tô apito ma tinha ãne: — Ãhã na ĩwasété na te ãma i'upazém na hã wa oto ĩsina po're puru.

Zenezi 44:16

Tawamhã Zuda ma te ãma sada'â: — Apito, e niha wa za marĩ na aima wasiwasu'u za'ra ni. E niha na wa za duré marĩ na wasiwi asada'âbâ ni. E niha wa za wawasété za'ra ne wahâimanazé hã wasima hiri wẽ za'ra ni. Waihu'u õ di. 'Re ihâimana u'âsi mono, ma tô wawasédé wa te ĩ'manharĩ za'ra zém na wawi a'upsibi me. Ãhãta wa ãme wa norĩ hã uburé wahâimana za'ra ni. Tahawa wa za aihĩni wa norĩ hã hâsizé ite sa'ui 're inomro me, wapawa'âbâ ãna wa te aima 're romhuri za'ra taré.

Zenezi 45:3

Tawamhã Zuzé, te ãne tisisãnawã norĩ ma oto tãma siwasu'u za'ra: — Wa hã Zuzé. E ĩmama te zahadu hâiba ré 're hâimana. Tawamhã ãne na isisãnawã norĩ, imreme te te wapari za'ra wamhã, ma tô tãma a'rãmi za'ra. Tahawa niha na timreme na te te ãma tãma wa'rãmi waihu'u za'ra õ di.

Zenezi 50:15

Tawamhã imama tiwi si'ré za'ra parimhã, ma tô Zuzéhé sisãnawã norĩ ãne sima ãma romnomri za'ra, tinoi hâiba na: — Ãté Zuzé te za oto wazada tinhiti'ru za'ra. Ãté te za duré si'ruiwa'â, iwasédé wa te tãma i'manharĩ za'ra wa'rãmimhã.

Provébiu 21:13

Ni'wa isimarĩ'õ norĩ hârâ te te wapari tõ da, sipo're nhidâ wamhã, õhõ hârâ zama duré da te isada'âbâ da hã mare di.

Provébiu 28:17

Dapãrĩ'wa hã sa'ẽtẽ te za sisada te te 're ab're za'ra. Ni'wa te te tiwi sawi za'ra ãna, ãne na hã te te 'manharĩ tõ da.

Mateu 7:2

Asi'uihâ na asiwi 're dawẽ'õ pese za'ra wa'aba mono wamhã, taha zarina te za tô duré 'Re ihâimana u'âsi mono hã te te siwi 're aiwẽ'õ pese za'ra wa'wa, iwa'rãmi. Asiwi 're dawẽ'õ za'ra wa'aba mono õ wamhã, tawapsi, te te duré siwi 're aiwẽ'õ za'ra wa'aba mono õ di za, ãne na hã aiwa.

Marcu 9:48

Ropipa ãma ubu hã te te 're idahâiba uprosi za'ra mono hã, si'utõrĩ õ di. Duré uzâ hã si'utõrĩ waihu'u õ di. Õne u'â te 're hâimana u'âsi.

Luca 16:28

Tame te ĩsisãnawã norĩ hã 're si'ubumro, 5 na ihâiba za'ra hã. Ropipa, wa oto te 're sépata. Tahawa, te za isatõ, itẽme morĩ za'ra da, te te tãma rowasu'u za'ra da, ĩzarina we 're sisisi tõ mono da, ropipa u.”

Zezusihi zadawa wasuꞌuꞌwa norĩ nhimiromhuri na robꞌuiꞌéré 19:18

Ni'wam norĩ hã te te 're saze za'ra mono õ ré, abzé te te 're i'manharĩ za'ra mono zém na ma tô siwasu'u za'ra danho'a, tiwasédé te te 're i'manharĩ za'ra mono zém hawi isipizari za'ra na hã.

Tiagu 2:13

Nimahã bâtâ na dahâimanazém na te te da'awaihu'u wapsi, da'ãma 're ipẽ'ẽzé za'ra mono õ norĩ ãma, pẽ'ẽzé õ di za, 'Re ihâimana u'âsi mono hã, ti'ab ré da'ãma 're isiwamri za'ra mono õ norĩ ãma hã. Da'ãma 're ipẽ'ẽzé u'âsi za'ra mono norĩ ãma si, te za ãma 're pẽ'ẽzé za'ra.

1 Zuwã 1:9

Tane nherẽ, wawasédé hã wa te 're i'manharĩ za'ra mono na 'Re ihâimana u'âsi mono ma, 'râwi 're wasiwẽ'õ za'ra mono wamhã, te te dama 're i'aropisutu mono zéb zarina, te za te te wama ãma 're a'uwaimrami, te te wama ãma 're a'upai mono ãna. Tãma 're iwasiwasu'u za'ra mono zéb zarina, wawasédé hã wa te 're i'manharĩ za'ra mono hã te te wa'ãma 're ab'madâ'â mono õ di za oto. Te za tô te te wama 're apari, wawasédé hã.

Zuize 1:7

Ãhã wa, te Adoni-Bezequi hã tinha ãne: — Wa hã wa tô ti'ru, 70 na apito norĩ nhiptõmohi na'rata za'ra hã, duré iparadub'rã na'rata za'ra hã, da te tiwi sihâri za'ra da. Ta norĩ hã ma tô ĩte wedeza zahâpâ dasai'a'a hã te te 're waibu. Tahawa, ãhã na awa'awi na hã 'Re ihâimana u'âsi mono, ma tô ãne hã ĩma 'manha, ta norĩ ma, te 're i'ab'manharĩ mono zém ne hã. Tawamhã Adoni-Bezequi, 'rinho'u Zeruzalẽ u ma tô dasiwi saprõni ni. Tahawa, tame ma tô oto dârâ.