Zenezi 41:43 - ꞌRe Ihâimana Uꞌâsi Mono Zadawa Wasuꞌu

⁴³ Taha pari, Ezituhu nhib'apito uptabi zapari dama i'rãnho'õmo te, awaru na wedewara zapore na 're wara da hã, ma tô duré tãma sa'ré, apito na da te ãma waihu'u za'ra da. Tahawa, ma tô duré tite aibâ norĩ ma, isõwab za'ra ãne hãsi mono sina si'aba'ré da hã, duré tãma rob'ru za'ra: “Tãma hã asiwasi aba mono!” Ãne ma tô Zuzé hã dama si'rãnho'u, Ezitu ãma.

Zenezi 41:43 ပူးပေါင်းရင်းမြစ်များ

Zenezi 41:42

Tawamhã apito Fara'o, ma tô tinhiptõmohi wasisizé danhib'apito waihu'uzém na isihâtâ ré hã waze. Te te wazere wamhã, ma tô Zuzé hã ãma siptõmohi wasisi. Taha pari, ma tô duré da'uza ihâ su'u na hã uza. Ẽtẽ waipo pré oru 'manharĩ na tinho'rebzu hã ma tô duré tãma tisẽ.

Zenezi 41:44

Tawamhã apito Fara'o, te Zuzéhé ma tinha ãne: — Wa hã apito. Tane nherẽ, a hã dama 're rowairébé mono õ nherẽ, ni'wa Ezitu ti'ai 'remhã marĩ te te i'manharĩ da hã mare di za.

Zenezi 42:30

— Aibâ Ezituhu nhib'apito zapari dama i'rãnho'u, mreme tete na ma tô wama nharĩ za'ra. Taré ti'ai wa'õtõ nho'u wa te wasiwi sabu da, wa te dama irobzabu za'ra mono na hã.

Zenezi 42:33

Tawamhã dama i'rãnho'u hã te ãne wama nharĩ za'ra: “Sena na i'uwaibaba na si 're i'aihâimana za'ra wa'aba mono na te aiwaihu'u za'ra wa'aba da, te za misi asisa'u ai'manhamra 'wa, ãme i'rata. Ãhã ré, te za ni'wam norĩ hã dasa i'wasari 'wa, ai'ra norĩ ma, mra hã ãma tãma simroi wa'aba da.

Zenezi 42:6

Tahawa, Zuzé dama i'rãnho'õmo dâ'âsina daza'rui amoi hawi 're idasihutu mono ma hã ma tô amnho te te dama 're awede. Tawamhã idub'rata norĩ itẽme sihutu wamhã, ma tô isõ'remhã hi'rãtitõ tãma asimro. Ma tô duré ti'ubu na ti'ai u hã tãma roptob za'ra.

Zenezi 45:26

Tawamhã te ãne tãma rowasu'u za'ra: — Zuzé hã te zahadu hâiba ré 're hâimana! Ta hã Ezitu ãma te dama i'rãnho'õmo na te te 're da'a'madâ'â. Tawamhã ãne na te te tãma wasu'u za'ra wamhã, ma tô aré Zaco hã simiza'rese'õ hai'utõ. Iwasu'u na te te duré ãma saze waihu'u za'ra õ di.

Zenezi 45:8

Tahawa a norĩ wa'wa we ãwamhã asiwi ĩzatõrĩ aba õ di. 'Re ihâimana u'âsi mono si ma tô we ĩzatõ. Ta hã apito Fara'oho zapari, dama ĩpire na 're ĩhâimana mono da hã, ma tô ĩwapu na 're ĩhâimana mono zém hawimhã oto ĩzarõtõ hâimo. Tahawa wa tô duré oto ti'â, apito nhimiromhurizé 'ri 'rãihâ 're romhuri hã. Ezitu 'remhã danhipai u dama ĩ'rãnho'õmo na hã wa tô oto 're ĩhâimana.

Zenezi 50:18

Taha pari, isisãnawã norĩ si'uihâ na oto itẽme si'aba'réi wa, isõ're tãma siwẽ'ẽ za'ra wamhã, ma tô ãne tãma nharĩ za'ra: — Ãhãta wa wa norĩ asib'a'uwẽ, awa'awi na ãme wahâimana za'ra ni.

Zenezi 50:9

Tawamhã ni'wam norĩ aibâ zama ma tô awaru na, duré wedewara zapore na hã dasiré ai'aba'ré. Tahawa, dawa'õno hã sa'ẽtẽ uptabi di.

Daniéu 2:48

Tawamhã apito ma tô Daniéu danhipai u pire na danhib'ihâ'a na 're hâimana mono da hã pisutu oto. Ma tô duré ãma tãma tinhopru, marĩ iwa'âbâ za'ẽtẽ norĩ na hã. Ma tô duré Babilonia ãma daza'rui wa'õno ihâimana ãma dama i'rãnho'õmo na 're hâimana mono da hã, duré uburé rowaihu'u pese 'wa norĩ nhib'ihâ'a na 're hâimana mono da hã pisutu, ti'ai wa'õtõ nho'õmo 'remhã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:10

Tahawa, te te irobzépata mono zéb sidâpâsi ma tô nasi pawapto, tiwi robzei'õ tõ da. Tawamhã apito Fara'oho nho're nasi hâimana wamhã, 'Re ihâimana u'âsi mono ma tô tiwaihu'u pe hã tãma tisõ, ihâimana wẽ zéb da hã. Tahawa, apito Fara'o hã ma tô wẽsã, Zuzé hã. Taha zarina ma tô tãma pisutu, Ezitu ãma roti'wa da oto, isadawa para. Isibro hã duré isõrõwa zama te te tãma 're 'madâ'â mono da zama, ma tô duré pisutu.

Filipu 2:10

Tahawa, niwapsi te za aihĩni pese dahi'rãtitõ tãma ana ni, Zezusihi ma, dama isisi pire uptabi ma. Ãne da, ma tô 'Re ihâimana u'âsi mono hã tãma pisutu, pire uptabi na 're hâimana mono da. Hâiwa ãma uburé pese hâiba ré 're ihâimana za'ra mono norĩ hã, duré ti'ai ãma uburé pese hâiba ré 're ihâimana za'ra mono norĩ zama, te za dahi'rãtitõ tãma ana ni, dama pire wa, adâ 're ihâimana za'ra mono zéb ãma uburé pese 're ihâimana za'ra mono norĩ zama. Tawamhã tame te za uburé pese dasisõ'a dasiwi sisi za'ra ni oto, ãne: “Õ hã Zezu Cristu, uburé Danhib'apito.” Ãne na Zezu Cristuhu ãma dawata za'ra wamhã, taha u'âbâ, te za duré 'Re ihâimana u'âsi mono ãma tawata za'ra ni, Wamama ãma hã.