Zenezi 4:4 - ꞌRe Ihâimana Uꞌâsi Mono Zadawa Wasuꞌu

⁴ Duré Abéu tinhimizama pone'ẽrebâ 'ra poto'rada hã ma tô duré 'mai'â. Tawamhã taha na nimahã inhi wẽ uptabi na ma tô Uburé Danhib'apito ma ãma tãma tinhopru. Tawamhã Abéu ma hã duré isibzari ma zama toi uptabi di.

Zenezi 4:4 ပူးပေါင်းရင်းမြစ်များ

Zenezi 15:17

Tawamhã oto we robra si'réi mono wamhã, ma tô oto tirobra pese. Taha wi, ma tô pré'a ré piza'a 're wawẽ waptu na sihâi'ré, ihawi isisédé isi'réi mono hã. Tahawa, 'rãsitõ ma duré isiré hã sihâi'ré. Tawamhã ta norĩ hã ma tô abaze na ãma isipo'o mono wa'wai baba ro'rahâri zahuré.

Zenezi 4:3

Tawamhã we ropsi'utõrĩ mono pari, nimahã bâtâ na Caĩ ma tô tiburu nho hã 'mai'â, Uburé Danhib'apito ma, ãma tãma isõprubzéb da hã.

Ezodu 13:12

te za Uburé Danhib'apito ma, aibâ na ai'ra aima 're ipoto 'rata za'ra wa'aba mono hã tãma 're isõmri za'ra wa'aba mo. Uburé asimizama 'ra norĩ aibâ na 're ipoto 'rata za'ra mono hã te za tãma 're hâimana za'ra.

Provébiu 3:9

Ma'ãpé 'Re ihâimana u'âsi mono 're wazé mono, asimarĩ na duré amnho iwẽ imorĩ'rata na 're i'atehâri mono 'rã na tãma 're i'asõpru mono zém na.

Hebreu 11:4

Abéu hã, 'Re ihâimana u'âsi mono si te te sina 're i'umnhasi mono zéb zarina, ma tô iwẽ uptabi na tãma tinhopru, 'Re ihâimana u'âsi mono ma. Caĩhĩ nhibzari si, te te wẽsãmri õ di, 'Re ihâimana u'âsi mono hã. Tahawa, Abéu hã 'Re ihâimana u'âsi mono si te te sina 're i'umnhasi mono zéb zarina, ma tô 'Re ihâimana u'âsi mono hã wẽsã, 're imorĩ wẽ na zama. Tahawa, ma tô Abéu nhoprubzép si wẽsã. Ãne na Abéu hã 'Re ihâimana u'âsi mono te te sina 're umnhasi mono wa, duréihã dâ'â nherẽ, zahadu hâiba ré wama 're ihâimana za'ra mono ne, te wama 're hâimana za'ra, taha ãma duré 're wasipo're pu'u u'âsi za'ra mono wa.

Hebreu 9:22

Tane tô. 'Re ihâimana u'âsi mono nhimiroti 'rata na Mozési te te ãma irob'ui'éré zarina, ma tô danhimizama wapru na marĩ hã da te ãma 're di'i za'ra, 'ri para 're isimasa mono hã, wasété ãna 're simasa mono da, 'Re ihâimana u'âsi mono ma hã. Dahâiba wib zama, ma tô duré ãma 're dasihâiba di'i za'ra, 'Re ihâimana u'âsi mono ma, dahâiba wasété ãna oto 're dahâimana za'ra mono da. Danhimizama hã da te 're simroi mono wa, iwapru hã tiwi 're isisa'wari za'ra mono na si, te za ãma 're dasihâiba wẽ za'ra dahâiba mana wawip si, marĩ na 're dasihâiba wasété za'ra mono wamhã.

Apocalipsi 13:8

Tawamhã ti'ai ãma daro mono bâ 're idahâimana za'ra mono norĩ hã te za ãma 're dawata za'ra, da'ahâ uptabi na. Tane nherẽ, ni'wam norĩ hã ãma 're wata za'ra mono õ di za, ibaihâ na 're idahâimana u'âsi za'ra mono norĩ nhisi, 're isimi'wara mono zém na isisi 're isimi'wara mono norĩ hã. Duréihã 'Re ihâimana u'âsi mono hã te te ropoto mono õ ré, danhisi na te te ãma irob'ui'éré za'ra hã ã ibaihâ hã, Pone'ẽrebâ, da te dasiwi iwĩrĩ te hã.

Zuize 6:21

Tahawa, Hâiwa ãma Romhuri'wa, tinhib'rata wedehu te te 're i'âri hã ma tô sarõtõ hâimo. Taha 'rãsutu na ma tô romnhi hã, i'u'ẽtẽ wapu me hã ãma upi zahuré. Tawamhã ẽtẽ hawi uzâ iro'o watobro na, ma tô romnhi norĩ hã, i'u'ẽtẽ wapu me hã ãma sazu zahuré. Ãhã pari ma tô hâiwa ãma romhuri'wa zô hã oto tirobaba.

1 Samuéu 15:22

Tawamhã Samuéu ma duré ãma tãma wa'rã ãne: — E ma hã tawamhã tãma iwẽ, Wanhib'apito 'Re ihâimana u'âsi mono ma hã. E dapo're pe. E abaze da te tãma 're izata za'ra mono na tãma danhoprubzé. 'Re ihâimana u'âsi mono, da te 're iwapari pese za'ra mono zé hã iwẽ uptabi, pone'ẽrebâ zéré mapure si'aibâ iwẽ na tãma 're idanhoprub za'ra mono zém nhipai u.