Zenezi 39:3 - ꞌRe Ihâimana Uꞌâsi Mono Zadawa Wasuꞌu

³ Ãne wa, Zuzéhé nhib'ihâ'a ma tô ãma waihu'u, 'Re ihâimana u'âsi mono isiré 're hâimana mono wa, uburé marĩ te te 're i'ab'manharĩ wẽ mono na te te 're ipawapto mono na hã.

Zenezi 39:3 ပူးပေါင်းရင်းမြစ်များ

Zenezi 21:20

Tawamhã 'Re ihâimana u'âsi mono, te 'watébrémi siré hã 're hâimana u'âsi, prédu mono ré hã. Tawamhã a'ubuni wi rop si 're irosa'wari mono ãma ma tô 're hâimana. Ma tô duré ti'i na tinhimiromhâ pe hã waihu'u pese.

Zenezi 21:22

Tawamhã Abimelequi, tô taha bâdâ we isisõré mono na ma tô Abra'ãhã ma, te te robzanhamri da hã itẽme mo. Duré taha wamhã Fico, ite dasi'wapéi 'manharĩ'wa norĩ 'madâ'â'wa hã ma tô isiré mo. Tahawa te ãne tãma tinha: — 'Re ihâimana u'âsi mono, uburé marĩ 're i'ab'manharĩ mono zém na hã te we asiré 're hâimana.

Zenezi 21:23

Tahawa, ma'ãpé ãme 'Re ihâimana u'âsi mono nho'a, asadawa nhipese ãna, ĩma, ĩ'ra norĩ ma, duré ĩnhihudu norĩ ma, asimiropisudu hã 'manharĩ. Wa hã wa tô iwẽ na aima ĩ'umnhasi sina 're ĩhâimana. Tahawa te za sena na ĩma iropisu, ĩma, duré ã hã ti'ai wa, 're i'asãmra mono ma, ai'umnhasi sina 're aihâimana mono da.

Zenezi 26:24

Tawamhã tô taha mara na, Uburé Danhib'apito tãma sihâi'ré wamhã, te ãne tãma tinha: — Wa hã, Abra'ã aimama te, 'Re ihâimana u'âsi mono. Aipahi õ di za, wa hã asiré 're ĩhâimana u'âsi mono wa. Ĩma romhuri'wa Abra'ãhã u'âbâ, wa za iwẽ hã te aima 're apisutu. Duré asihudu norĩ ahâ uptabi na 're hâimana za'ra mono da wa za aima 'manha.

Zenezi 26:28

Tawamhã asa ma te siwi sada'â ãne: — Uburé Danhib'apito, sena na asiré 're ihâimana mono na hã wa tô oto ai'ãma waihu'u za'ra ni. Tahawa, wa ãne wasima nharĩ za'ra ni: Ropisutu zahi hã wa za wasima 'manharĩ za'ra ni, itete na, ãne na:

Zenezi 30:27

Tawamhã Labã, ma te ãma sada'â ãne: — Ĩzawi na hã ma'ãpé ĩ'rata 're aihâimana u'âsi mono. E marĩ wa. Wa hã marĩ te i'manharĩ nhipese na, wa tô waihu'u, aihâiba u'âbâmhã Uburé Danhib'apito iwẽ na te te 're ĩpawapto mono zéb zarina hã.

Zenezi 30:30

We ãwa ĩwisi wana ré hã asimarĩ hã aré umrore di. Tane nherẽ, ma tô oto sina hâ. Duré 'Re ihâimana u'âsi mono, nimomo 're ĩne mono sidâpâsi ma tô iwẽ hã te te aima 're apisutu. Tane nherẽ, oto wa hã ãhã na hã ĩhawi a'uwẽ norĩ si te oto 're i'a'madâ'â mono da si, wa tô oto ĩsima wẽ zahi.

Zenezi 39:2

Tame Uburé Danhib'apito, Zuzéhé siré 're hâimana u'âsi mono wa, te uburé marĩ hã te te 're ab'manharĩ wẽ u'âsi. Tawamhã te oto tinhib'ihâ'a nhorõwa ãma 're sãmra, ezipsiu nhorõwa ãma.

Zenezi 39:21

Tane nherẽ, tame 'Re ihâimana u'âsi mono, isiré 're hâimana mono wa, ma tô iwẽ hã te te tãma 're apisutu. Taha zarina, ma tô oto dazazé 'madâ'â'wa Zuzé hã wẽsã.

Zenezi 39:23

Tawamhã dazazé 'madâ'â'wa hâtâ'â waihu'u õ di, Zuzéhé ma, si'upana da'madâ'âzé hã te te sõmri wa. E marĩ wa. Uburé Danhib'apito isiré 're hâimana mono wa, duré iwẽ na te te 're ipawapto mono zarina, uburé marĩ hã te te dama 're ab'manharĩ wẽ mono wa, dazazéb 'remhã.

Neemia 2:20

Tawamhã wa ãma tãma wa'rãmi za'ra ãne: — 'Re ihâimana u'âsi mono, hâiwa ãma 're isãmra mono hã te za iwẽ si wama pisutu za'ra, wa te irowa'õtõ za'ra zéb zarina, wama iwatobro za'ra zéb da hã. Wa norĩ hã tãma iromhuri'wai wa, wa za oto ãma sãna'rata za'ra ni, 'ri 'wawi wa'ra wahutu na hã. Tane nherẽ, a norĩ wa'wa hã Zeruzalẽ 'remhã marĩ tede'wa na hã aihâimana za'ra wa'aba õ di. Duré i're 're aihâimana za'ra wa'aba mono nherẽ, marĩ dai õ di, a norĩ wa'wa hã. Duré Izaraéu nhihudu norĩ 're ihâimana za'ra mono zém na 're i'aihâimana za'ra wa'aba mono da hã mare di.

Salmu 1:3

Ta hã a'uwẽ hã pazaihâ na rowede, da te i're, 're i'rãi mono zéb uwaibaba si, 're i'rãi pese mono ne, duré 're isui mre mono õ ne, te ta hã 're hâimana. Ta hã uburé marĩ te te 're i'a'manharĩ mono hã te wẽ na si 're wairébé.

Mateu 5:16

Tane duré, a norĩ wa'wa hã te za sõ'awi dama 're aihâimana za'ra wa'aba mo, rob'uiwẽzé hã sõ'awi te te dama 're irob'uiwẽ za'ra mono ne. Uburé marĩ hã te za dama 're i'manharĩ wẽ u'âsi za'ra wa'aba mo, dama 're i'manharĩ wẽ za'ra wa'aba mono zé hã da te 're i'madâ'â za'ra mono zéb zarina, Aimama za'ra wa'aba ãma 're dawata za'ra mono da, hâiwa ãma 're isãmra mono ãma.

1 Corĩtu 16:2

Dumigu sidâpâsi 're sãmra aba mono da, te za rob'uiprazé hã 're ipo'o u'âsi za'ra wa'aba mo, aihâiba mono bâ wa'aba. Aipawa'â hã suru na 're waibui wa'aba mono wamhã, suru na te za 're ipo'o za'ra wa'aba mo. Duré sa'ẽtẽ na 're waibui wa'aba mono wamhã, sa'ẽtẽ na te za duré 're ipo'o za'ra wa'aba mo. Atẽme ĩwisi aba wapsi, asiwi 'rã'õtõ aba da, asima rosa'rata za'ra wa'aba õ di za. Ĩwana ré, te za asiwi 're i'rã'õtõ u'âsi aba mo dumigu sidâpâsi, ĩzô nomro siromo da.

Zozué 1:9

Ĩnhimirowaihu'u na aima hã, ma'ãpé ãma aipo're pu'u: “Asiptete, duré asib'ru na! Aiwi robzei'õ tõ, duré aipahi tõ! E marĩ wa. Wa hã Uburé Danhib'apito, ate 'Re ihâimana u'âsi mono, nimomo 're ane mono sidâpâsi, wa za asiré 're ĩhâimana.”

Apocalipsi 3:9

Ma'ãpé duré, waihu'u pese za'ra wa'aba. Satanasihi niwĩ 're ihâimana za'ra mono norĩ hã, e niha wa za tãma rob'manharĩ za'ra, ta norĩ ma hã. Ta norĩ hã zudeu nherẽ, zudeu norĩ hâimana wẽ zém na 're ihâimana za'ra mono na, dama 're siwasu'u za'ra mono zahã, te Satanasihi nhimiroti zarina si 're hâimana za'ra, sadawa nhipese na. Tahawa, wa za ãne tãma rob'manharĩ za'ra. Aipapara te za 're sina wa'wa, tãma aipire za'ra wa'aba wa. Tahawa, te za aiwaihu'u za'ra wa'wa, te 're i'asawi pese za'ra wa'aba mono na.

1 Samuéu 18:14

Tawamhã uburé marĩ hã te te 're ab'manharĩ mono wamhã, ma tô iwẽ na si 're pusi, te te 're i'ab'manharĩ mono da hã. E marĩ wa. Wanhib'apito ime 're hâimana mono wa.

1 Samuéu 18:28

Tawamhã Sau ma tô oto ãma po'repuru, Uburé Danhib'apito Dawihi siré 're ihâimana mono zém na hã, duré i'ra Micau hã Dawi te te 're isawi pese mono na hã.

1 Samuéu 3:19

Tawamhã Samuéu hã ma tô oto tiprédu. Prédu wamhã, ma tô Uburé Danhib'apito hã ime 're hâimana. Uburé marĩ hã te te 're ab'manharĩ mono da, te te tãma inharĩzéb zarina, ma tô ãma uwaimra, 'Re ihâimana u'âsi mono hã.