Zenezi 30:32 - ꞌRe Ihâimana Uꞌâsi Mono Zadawa Wasuꞌu

³² Ãne na ĩnhimirosa'rada te aima ipibuzém na hã: Ã bâtâ na wa za uburé asimizama wa'waibaba hã 're mo, te ĩsima azani mono da, pone'ẽrebâ 'ra i'rãdâ'â norĩ hã, pone'ẽrebâ zéré mapure i'upto norĩ hã, duré pone'ẽrebâ zéré uzé i'upto norĩ hã. Ã norĩ na si ĩpawa'âbâ da hã, wa tô oto wa hã ĩsima wẽ zahi.

Zenezi 30:32 ပူးပေါင်းရင်းမြစ်များ

Zenezi 30:31

Tawamhã Labã te duré ãma sadanha ãne, tô õhõ na: — E niha te asima iwẽ, za nasi te aima iwa'âbâzéb da hã. Tawamhã Zaco, ma te ãma sada'â ãne: — Te ĩsima wẽ õ di, dapawa'âbâzé hã. Wa za tô asimizama 'madâ'â na romhuri na ãma aima uzusi za, ãne na ĩnhimirosa'rada te aima ipibuzém na ãma ĩzaze da hã wamhã.

Zenezi 30:33

Apto'o ré wamhã, sena na 're ĩhâimana mono zém na ĩwaihu'u da hã aima wapure di za. Nimahã na ãma ĩpawa'âbâ da, aza'rata wamhã, pone'ẽrebâ 'ra i'rãdâ'â'õ norĩ, pone'ẽrebâ zéré mapure i'upto'õ norĩ, duré pone'ẽrebâ zéré uzé i'upto'õ norĩ 'masãmri wamhã, te za iwaihu'u, wa hã te aiwi i'manhimi'uri na hã.

Zenezi 30:35

Tane nherẽ, Labã, tô taha bâtâ na ma tô uburé pone'ẽrebâ zéré uzé si'aibâ i'upto norĩ hã, isipi'õ i'upto norĩ hã, duré uburé pone'ẽrebâ 'ra i'rãdâ'â norĩ me hã sima sani za'ra. Taha pari, ma tô ã norĩ hã ti'ra norĩ ma tãma sa'ré za'ra, te te siwi 'madâ'â da hã.

Zenezi 31:10

— Tawamhã nimahã bâtâ na pone'ẽrebâ si'aibâ norĩ, tinhipi'õ te te wasã za'ra ré, wa tô te saho ãne. Pone'ẽrebâ zéré uzé si'aibâ norĩ, tinhipi'õ te te iwasã za'ra hã iwawi si, duré i'upto si wa tô ab'madâ.

Zenezi 31:8

Ãne te te ĩma nharĩ wamhã: “Pone'ẽrebâ 'ra i'upto na si za aipawa'â hã”, tawamhã ma tô nasi isarina si tipoto zara, i'upto na. Duré te te ĩma nharĩ wamhã ãne: “Pone'ẽrebâ zéré uzé 'ra iwawi na si aipawa'â hã za”, tahawa ma tô duré tô nasi isarina iwawi na si tipoto za'ra.