Zenezi 3:8 - ꞌRe Ihâimana Uꞌâsi Mono Zadawa Wasuꞌu

⁸ Tawamhã taha bâtâ na hâiwahâ pesere rowa'u atãma na te te rowapõrĩ ré, aibâ norĩ timro me, ma tô Uburé Danhib'apito 'Re ihâimana u'âsi mono, rob're wa'waibaba 're imorĩ parahâ'ra hã wapari zahuré. Tahawa rowede norĩ wede wa'wa ma tô tiwi aima'uri zahuré.

Zenezi 3:8 ပူးပေါင်းရင်းမြစ်များ

Zenezi 18:33

Tawamhã Uburé Danhib'apito, Abra'ãhã ma, te te nharĩ pari, ma tô oto tiwi mo apâ. Abra'ãhã zama te duré oto apâ mo, tinhorõwa u.

Zenezi 3:10

Tawamhã aibâ, ma tô sada'â ãne: — Rowede wa'waibaba we i'aimorĩzé aipara 'ra te wapari wa, wa tô aima ĩpahi, ai'uréiwi ĩhâimana zép te. Tahawa wa tô aiwi aima'u.

Provébiu 15:3

Uburé Danhib'apito, titõmo na te ropâ te te 're rob'madâ'â. Iwẽ norĩ hã te duré iwasété norĩ me uburé te te 're a'madâ'â.

Zona 1:3

Tawamhã Zona hã ma tô oto sima rob'ubumro, morĩ da aré. Tane nherẽ, Uburé Danhib'apito te te tãma irob'ruzéb upana, ma tô aimawi Zope na 'ri wa'õtõ nhisi u si mo. Tame ma tô uba're isa'ẽne hã sõpẽtẽ, Espãnha na romnhisi u iwara da hã. Ma tô sima wa'â, ãma imorĩzéb da. Taha pari ma tô oto ãzé uba're wa dame, isari'wa norĩ me, Espãnha u morĩ da, Uburé Danhib'apito nhiti hâimana da, romhâ na.

Roma 2:15

Ta norĩ hã si'uihâ na 're hâimana wẽ za'ra mono wamhã, 'Re ihâimana u'âsi mono nhimiroti hã ipẽ'ẽ 're, tãma 're ihâimana u'âsi za'ra mono zé, te wasu'u. Duré iwẽ hã te te dama 're 'manharĩ za'ra mono wamhã, 'râwi te za tipẽ'ẽ na 're sisaze za'ra. Duré marĩ iwasédé hã te te 're 'manharĩ za'ra mono wamhã, 'râwi te za tiwasété na 're sisãmri za'ra. Tahawa, tipẽ'ẽ na 'râwi 're sisaze za'ra mono wamhã, duré 'râwi tiwasété na 're sisãmri za'ra mono wamhã, 'Re ihâimana u'âsi mono nhimiroti, ipẽ'ẽ 're, tãma 're ihâimana u'âsi za'ra mono zé, te wasu'u.

Hebreu 4:13

Marĩ hã 'Re ihâimana u'âsi mono wi isima'uri pese na hã 'maihâimana õ di, te te 're i'ab'madâ'â mono õ na hã. Ai'uréiwi te uburé marĩ hã tãma 're hâimana, sõ'awi. Taha ma si, wa za nimahã na hã wahâimanazém na tãma wasiwasu'u za'ra ni, wahâiba mono bâ. Tahawa, wahi'rata norĩ ne, 're wahâimana za'ra mono õ di za, wa norĩ hã.

Apocalipsi 6:15

Tawamhã ti'ai ãma danhib'apito mono bâ dama ipire mono bâ ma tô ẽtẽ 'rãihâ zahâpâ sima'uri, da'madâ'â'wa norĩ hã, duré da'wapéi'wa norĩ nhib'apito norĩ hã. Isibrob ahâ norĩ zama ma tô sima'uri, isibrob'õ norĩ zama, pawa'âbâ ãna iwada'uri zarina si te te dama 're iromhuri za'ra mono norĩ zama, duré wada'uri ãna si'uihâ na 're ihâimana za'ra mono norĩ zama. Uburé ma tô dasima'uri, ẽtẽ 'rãihâ zahâpâ ẽtẽ're 're, duré ẽtẽ nhi'riti 're, dasi'utõrĩ tõ mono da.