Zenezi 28:12 - ꞌRe Ihâimana Uꞌâsi Mono Zadawa Wasuꞌu

¹² Tawamhã Zaco ma tô te te saho. Te te isahoi mono 'remhã ma tô sai'urizé hã 'madâ, ti'ai hawi isãna'rada, hâiwa u i'rãsudu hã. Tawamhã 'Re ihâimana u'âsi mono ma romhuri'wa norĩ hã te nasi ãma sai'uri za'ra. Te duré nasi ãma si'ra za'ra, ti'ai u hã.

Zenezi 28:12 ပူးပေါင်းရင်းမြစ်များ

Zenezi 15:1

Tawamhã ãhã parip si Abrã ma tô sõtõ 'rowim ne marĩ 'madâ. Taha na te Uburé Danhib'apito ãne tãma tinha: — Abrã, aipahi tõ. Marĩ isimimnhasi wi wa za wa hã 're ĩsimapa, ai'wawi. Duré iwẽ wa za te aima 're anhomri.

Zenezi 15:12

Tawamhã oto mara wamhã, ma tô Abrã hã sina tipahâ pese, aptâ ãma isimei pese zarina sõtõ pese wa. Taha nherẽ, waptu na ma tô tipahi. Ma tô ipẽ'ẽwara hã iwab ãzé.

Zenezi 20:3

Tawamhã 'Re ihâimana u'âsi mono, bara na Abimelequi sõtõ ré isimirosawẽrẽ na ma tô itẽme wi. Tahawa, ma tô ãne tãma tinha: — Te za atâ, pi'õ imro ré zô da'mazatõrĩ wa, sô da'maimorĩ da hã.

Zenezi 41:1

Tawamhã ma tô oto maparane tiwahu. Nimahã bâtâ na Ezitu te, apito hã ma tô rosawẽ, Nilu na panho'õmo nhisi zaihâ na isam na.

Daniéu 7:1

Béusazaha ãma imorĩ'rata na ãma iwahub ãma Babilonia 're, te te 're ida'a'madâ'â mono na ma tô Daniéu hã nimahã mara na tinhimiwaptâ wa nomro. Sõtõ wamhã, ma tô te te saho. Tame ma tô marĩ sõtõ 'rowi 'madâ'â za'ra. Topo'o wamhã, ma tô duré te te isahoi mono na marĩ te te i'madâ'â za'ra norĩ na hã ãma rob'ui'éré.

Mateu 1:20

Tawamhã ãne na te te sima rosa'rata wamhã, ma tô hâiwa hawi Wanhib'apito ma romhuri'wa hã tãma sihâi'ré, sõtõ 'rowim na. Ãne te taha wamhã tãma tinha: — Zuzé, Dawihi nhihudu, asina aihâtâ'â tõ, Mariaha ãma aimro tõ da hã. Ta hã ma tô tiwasã, 'Re ihâimana u'âsi mono pẽ'ẽzani na.

Mateu 2:19

Tawamhã apito Erodi dâ'â parimhã, ma tô hâiwa ãma Wanhib'apito ma romhuri'wa hã Zuzéhé ma sihâi'ré, sõtõ 'rowi, Ezitu ãma sãmra ré.

Hebreu 1:1

Duréihã 'Re ihâimana u'âsi mono hã ma tô tizadawa 'mahârâ'wa norĩ ma te te 're rowasu'u, ta norĩ hã wahi'rata norĩ ma, te te oto ãma 're rowasu'u za'ra mono da, isadawa nhipai u. Ta norĩ ma, ma tô marĩ na misi si te te tãma 're rowasu'u za'ra, ãma ipu'u na hã, 'Re ihâimana u'âsi mono te te tãma 're iwaihu'u za'ra mono zép sidâpâsi.

Hebreu 1:14

E niha tawamhã, hâiwa ãma romhuri'wa norĩ 're ihâimana za'ra mono zé hã. Ta norĩ hã ihâiba'õ, 'Re ihâimana u'âsi mono ma, romhuri'wa norĩ. Ta norĩ si ma tô 'Re ihâimana u'âsi mono hã te te 're satõrĩ za'ra ti'ai u, za te te isõ'reptu za'ra norĩ hã te te 're pawaptob za'ra mono da, ti'ab ré. Taha na si, ta norĩ nhimiromhurizé hã te tãma 're hâimana za'ra.